سەرمایەگوزاری رامیاریی پارتەكان لەسەر پرسەكانی كۆمەڵگە وەك ھەر بازرگانێكی دیكە
لێرەدا بەدیاریكراوی مەبەستم ئەو خۆپیشاندانە ڕامیاریی و بازرگانییانەن، كە گروپە چەپ و نەژادپەرستەكان بەس بۆ شەكانەوەی ئاڵای پارت و دەسەڵاتی بۆرجوازیی نەژادەكەیان لە ھەندەران بەرپایاندەكەن.
بەداخەوە ھەوڵەكان ھەم پارتیی [حزبی ] ھەم ناسیونالیستین. بەدڵنیاییەوە زۆرێك لەوانە ئەگەر ئاڵا و دروشمی پارتەكەیان و ئالای دەسەڵاتەكەیان نەشەكێتەوە، ئامادەنین بۆ ساتێك دژی سزای سێدارەبن. خۆ ھەرێمی كوردستان و عیراقیش سێدارەی تێدایە، بۆ كەسیان فزەیان لێوەناێیت. بەداخەوە ناڕەزایەتییەكانیان بەسەر پارتایەتیدا دابەشاندوون.
ھەفتەیەك پێشتر چەپەكان [ناسیونالیستە جوگرافییەكان] و ھەفتەی دواتر ناسیونالیستە نەژادییەكان، ئەگەر بەڕاست ھەردوولا دژی سێدارەن و ئامانجیان سەرمایەگوزاری پارتیی و ئایدیلۆجی نییە، بۆ ھەمووان پێكەوە بەبێ ئاڵای پارت و دەسەلات ناڕەزایەتی دەرنابڕن ؟
ھەڵبەتە ئەمە بێجگە لەوەی كە ھەر ئەمانە كاتێك بەدەسەلات بگەن، وەك كۆماری دیكتاتۆریی خواكان لە ئێران خەڵك لەسێدارەدەدەن و تیرۆردەكەن، ھەروەك چۆن بەخۆیان لە ھەندەران خوازیاری خاوەنماڵبوون و ھەموو مافێكی كاركردن و پەنابەرێتی و جووت نەژادنامەن و ھاوكاتیش لێرەوە تا نیشتمانی ئازیزیان سووكایەتی بە عەرەب و بەنگلادیشیی و ئەفریكییەكان دەكەن، كە ھاتوونەتە نیشتمانەكەیان.
لەبەرئەوە بە بۆچوونی من، پێویستە ھاوكاتی ڕسواكردن و ناڕزایەتی دژی سزای سێدارە و دەوڵەتی خواكان، خودی پارتە رامیارەكان بە چەپ و ڕاستەوە لەسەر بازرگانیكردن بە پرسەكانی كۆمەڵگەوە بۆ بەرژەوەندی ڕامیاریی و ئابوورییا خۆیان، ڕسوابكرێن !