ئەوی دەخوازێت عیراقی نەبێت با واز لە راوەشاندنی پەنجەی گەواهی بهێنێت !
عیراقیبوون تەنیا واژەی سەر شوناسنامە نییە، بەڵکو پەروەردەی کولتوورییشە !
زۆرێك لە کوردانی هەرێمی کوردستان نکۆڵی لە عیراقیبوونی خۆیان دەکەن، بەداخەوە ئەوان ئاوا دەزانن، کە عیراقیبوون تەنیا واژەیەکی سەر کاخەزە و بەئاسانی دەسڕدرێتەوە!
ئەوان لەبیریانکردووە، کە زۆرینەیان لە یەکەم ڕۆژی جولای [تەموز]دا لەداکبوون و ئەوەش یەکەم نیشانەی عیراقیبوونە، ئەوە بێجگە لەوەی کە کولتووری تاک و کۆمەڵەکانی جوگرافیایەکی رامیاریی کە ناوی “عیراق”ە، وەك نەوت تێکەڵ بە کولتووری-ئاویی وڵاتانی دەوروبەری نابێت، تەنانەت کولتووری کوردەکانی لە کولتووری کوردانی بەشەکانی دیکە جیاوازە و لە پێکهایەکی دیکتاتۆریی ڕامیاریی و فاشیزمی ئایینی پێکهاتووە !
کەسایەتی تاکی عیراق لە لانکەوە بۆ باخچەی ساوایان و لەوێوە بۆ مزگەوت و لە مزگەوتەوە بۆ فێرگە و دانشگە، پەروەردەی فاشیزمێکی کولتوورییە، کە هەموو ڕۆژێك دەمارگیریی و کینەدۆزیی و جەنگ و یەکدی سڕینەوە بەرهەمدەهێنێتەوە !
داعش هەمان ئاراستەی رامیاریی و هێزیی کولتوورییە، کە لە ساڵی ١٩٨٨دا گوندەکانی کوردستانی ئەنفالکرد و زۆنگەکانی ناوچەی شیعەنشینی وشکردن و قامیشەڵانەکانی سووتاندن.
تایبەتمەندییەکی دیکەی عیراقیبوون، بەرزکردنەوە و ڕاوەشاندنی پەنجەی گەواهی [شەهادەت]ە، هەر بەو جۆرەی کە سەدام حوسەین بەردەوام ڕایدەوەشاند و بەرەوڕووی نەیارەکانی بەرزیدەکردووە.
بە بۆچوونی من، ئەوی دەخوازێت عیراقی نەبێت یا پشت لەو کولتوورە بەعسییە بکات، با لەم یەکەم ڕۆژەی پاش لەدایکبوونییەوە، واز لە بەرزکردنەوە و راوەشاندنی ئەو پەنجەیە بهێنێت !