لە “وڵاتی من” لەجیاتی گەزۆ دەبەنگی دەبارێ
٨ی جونی ٢٠١٤
وڵات نامووسە
ژن كاڵایە
كوشتن شانازییە
خۆشەویستی تاوانە
ئازادی “بەڕەڵایی”یە
تۆڵە یاسایە
فێرگە زیندانە
كوتەك پێنووسە
جەستەی مێینە
بۆ نووسینەوەی “شەرەف”
تێنووسە !
لە “وڵاتی من” پێوەری بەھا
دەبەنگیی و نامووسە !
نەفرەت لە “وڵاتی من”، نەفرەت لە نیشتمان
نەفرەت لە نەتەوە، نەفرەت لە دەوڵەت و یەزدان
نەفرەت لە پیاوی كەللەپووت
نەفرەت لە ژنی كێرپەرست
نەفرەت لە مەزاتزانەی دەسەڵاتخوازان [پارلەمان]
ڕۆڵی خوێنەری كورد لە گەمژاندنی نووسەردا
٦ی جولای ٢٠١٤
لەوانەیە لە یەكەم خوێندنەوەدا ئەو دەستەواژەیەی سەرەوە بێواتا و ناكەتواریی بەرچاوبكەوێت، بەڵام من بە ئەزموونكردن بەو سەرەنجامە گەییشتووم، كە ھەموو دیكتاتۆرێك، ھەموو جەلادێك، ھەموو پاوانگەرێك، ھەموو چەپاوڵگەرێك، ھەموو ملھورێك، ھەموو نووسەرێكی تووشبووی نارسیسم Narcissism جەماوەری پاشرەو / خوێنەری نادەربەست پەروەردە و گەورەی دەكات !
ماوەیەك لەمەوبەر بۆ ئەزموونگەریی یا ھەڵسەنگاندنی دەربەستی خوێنەر، بۆچوونێكی خۆمم ئاوەژووكردووە و كەوتمە ڕیزكردنی پووچگەرایی و دەستەواژەی نالۆجیكی و پاشان جارێكی دیكە ھەڵگێڕایەوە سەر خۆی و دامنایەوە، بەداخەوە ھیچ وروژان و ناكۆكی و ڕەتكردنەوەیەك یا پێداچوونەوەیەکم لە ھەڵوێستەكاندا بەدینەکرد.
ھەڵبەتە ئەمە تەنیا بۆ نموونەیە و لەبارەی ماسیگری تاك و سەربەخۆەیە نەك كرێكاری كۆمپانییەكان !
دەقی ئاوەژوكراو :
“مەرج نییە ھەموو ماسیگرێك، ماسی فرۆشبێت، بەڵام بەدڵنیاییەوە ھەموو ماسیفرۆشێك، ماسیگرە ! ”
دەقی دروست :
“مەرج نییە ھەموو ماسیفرۆشێك، ماسیگر بێت، بەڵام بەدڵنیاییەوە ھەموو ماسیگرێك، ماسیفرۆشە ! ”
بەداخەوە لە ھەردوو بارەكەدا ھەژماری لایككەران ھەر یەكسان و ھەر ھەمان كەسان بوون!
سەرەنجام لەتەك ئەم پرسیارە ڕووبەڕووبووم؛ ئایا لایك وەك دەستبەرزكردنەوە و سڵاوە كوردانەكەی لێھاتووە یا بەقەرزدانە بۆ وەرگرتنەوەی لە ڕۆژانی تەنگانەدا ؟
چالاكی ئابووریی/ كۆمەڵایەتیی وەك پێشمەرجی گۆڕان و شۆڕشی كۆمەڵایەتی
هەژێن
٢٣ی جولای ٢٠١٤
بەشی یەكەم :
” گۆڕینەوە و بەخشین لە جیاتی فڕێدان و كڕین “
فیلۆسۆفیی بیرۆكەكە :
هاریكاریی كۆمەڵایەتی، خۆكۆمەكیی/ كۆمەكی خۆبەخشانە، ژینگەپارێزیی و پاراستنی كەرەستەخاوەكان و سامانە سروشتییەكان بۆ نەوەكانی داهاتووی مرۆڤایەتی، دروستكردنی قەیرانی كەڵەكەبوونی كاڵا و كەمی قازانج بۆ سەرمایەداران …تد
وەك دەركەوتووە یەكێك لە نەخۆشییە هاوچەرخەكان، نەخۆشی كڕینی ناپێویست و چاولێگەرییە، كە كاناڵەكانی میدیای بازرگانی و دەسەڵات گەورەترین ڕۆڵیان لە هاندانی بەكاربەری نادەربەستدا هەیە.
ئەگەر بەوردی سەرنجبدەین بازار لە ڕێگەی ڕیكلام و هاندان بەهۆی زنجیرە تەلەفزیۆنییەكان و فیلمەكانەوە لە وڵاتانی ئەوروپی وەك هەر وڵاتانێكی دیكە دوو جۆر بەكاربەری پەروەردەكردووە: بەكاربەری چاولێگەر لە بەرامبەر بەكاربەری هوشیار، بەكاربەری هەژار لە بەرامبەر بەكاربەری دەوڵەتمەند، ئەم دیاردەیە هەم بووەتە مایەی قازانج و فرۆشی زیاتر و هەم مایەی قەیرانی كەڵەكەبوونی كاڵا و بەرزبوونەوەی نرخ…. تد بۆ ئەو مەبەستە پێكهاتەكانی سیستەمی سەرمایەداری و نێوەندە جیهانییەكانی كارێكی زۆریان لەسەر چارەسەری قەیرانەكان یا گواستنەوەیان بۆ شوێنی دیكە و لە كۆڵكردنەوە یا ئارامكردنەوەیان كردووە.
یەكێك لەو چارەسەرانە گواستنەوەی سەرمایەگوزارییە بۆ وڵاتانێك كە كرێی كار هەرزانە و لەو ڕێگەیەوە كاڵای هەرزان بۆ كڕیارانی هەژار لە وڵاتانێك كە بێكاران و كەمدەرامەتان توانای كڕینیان نەماوە، بە كوالێتی خراپ بەرهەمدەهێنرێت، نموونە بەرهەمی چنین و دوورینی كرێكارانی بەنگلادیش و بازارە هەرزانەكانی ئەوروپا، كە ئاساییش بۆ سیستەم و دەوڵەت مسۆگەردەكەن و هەڵچوون و بیركردنەوەی هەژاران لە چارەسەری یەكجارەكی خاو و ئاوەژوودەكەنەوە.
وەها هاوكێشەیەك لە وڵاتانی ئەوروپا و تەنانەت لە وڵاتانی نەوتداری وەك عیراق، كڕیاری چاولێگەر و تووشبوو بە نەخۆشی كڕین بەرهەمدەهێنێت، وەها بازنەیەك لە كەمی كرێی كڕیكاران و نەخۆشی چاولێگەریی كڕیاران تەواودەبێت و خولی سوورانەوەی بۆ كەڵەكردنی قازانج بۆ سەرمایەداران [خاوەنكاران و بازرگانان/ فرۆشەران] بەرهەمدێتەوە.
كاتێك ئێمە بەكاربەری ناچار و ئاسایی، كە توانای كڕینمان لە خوارەوە و هاوكاتیش لەژێر فشاری پێداویستی و وەڵامدانەوە بە ئەندامانی خێزانین، بەتایبەت منداڵان، چۆن دەتوانین خۆمان لە كایەكردن و بەشداری ئەو بازنەیە لادەین و ڕزگاربكەین ؟
ئەمە پرسیارێكی هەر ڕۆژەیە لەبەردەم هەموو تاكێكی خۆهوشیار و چالاكدا قوتدەبێتەوە و بەردەوامبوونەوەی زۆر كەسی چالاكی ژینگەپارێز، ئاژەڵدۆست، پشتیوانی مافی كرێكارانی وڵاتانی بەرهەمهێنی بۆ بیركردنەوە لە چارەسەر و ئەڵتەرناتیڤ هانداوە و لەو بارەوە زۆر شێوازی جۆراوجۆر سەریانهەڵداوە، لەوانە بایكۆتی كڕین لەو بازارانە، كڕین لە كۆنەفرۆشی و هەروەها تازەترین شێواز چالاكی “گۆڕینەوە و بەخشین لە جیاتی فڕێدان و كڕین “ە.
پێشینەی ئەم بیرۆكەیە لە دونیادا كۆنە و هەمیشە لە نێوەندی پەیوەندییە كۆمەڵایەتییەكاندا هەبووە، ئەویش بەخشینە لە جیاتی فڕێدان بە كەسانی دەوروبەر، هەروەها بیرۆكەی گۆڕینەوە كە جاران بە زۆری لە نێوەندی خوێنداكاندا باوبوو. پێشتر وڵاتانی خۆرهەڵاتی ناوین مەیدانی ئەم بیرۆكانە بوون، بەڵام لە ئێستادا بەداخەوە تاكی هەرێمی ئێمە تەنیا تاكێكی بەكاربەری چاولێگەر و ژینگە وێرانكەرە، هەروەها لە ئەوروپا و ئەمەریكا و ئوسترالیا و خۆرهەڵاتی ئاسیا، بەخشەر هیچ پەیوەندییەكی بە كەسی پێبەخشراوە نەماوە و نێوەندە بەناو چاكەخوازە كەنیسەییەكان بەو كارە هەڵدەستن، ئەوەش دەبێتە هۆكاری دوو شتی دیكەی نیگەتیڤ :
– فرۆشتنی بەشی باشی بەخشراوەكان بۆ خەرجی بیرۆكراسیی و سەرمایەی نێوەندەكانی خۆیان ..
– بەكاربردنی كۆكردنەوەی ئەو بەخشینە بۆ ئامانجی مەزهەبیی و هاندانی خەڵك بۆ پەیڕەوی مەزهەبی نێوەندەكە ..
ئەی چارەسەر ؟
بیرۆكەی ” گۆڕینەوە و بەخشین لە جیاتی فڕێدان و كڕین “
شێوەی كارەكە و شێوازەكانی جێبەجێكردنی:
– پێكهێنانی ڕەفەی/ بانكی گۆڕینەوە و بەخشین لە گەڕەك و گوند و شوێنەكانی كار و خوێندندا … بۆ نموونە لە باڵاخانەكاندا كە هەژمارێكی زۆر خێزانیان تێدا دەژی، دەكرێت لە ڕاڕەوی سەرەكیدا ڕەفەیەك بەدیوارەوە هەبێت، بۆ ئەوەی هەر كەس شتێكی زیادە و ناپێویستی هەیە بە نەناسراوی لەوێدا دایبنێت و ئەوی دەیهەوێت و پێویستییەتی دەتوانێت بیبات. ئەم جۆرەیان دەتوانرێت لە هەموو شوێنە گشتییەكانی وەك دایەنگە و باخچەی منداڵان و فێرگە و دانشگە و پەرتووكخانە و پەرستگەكاندا دروستبكرێت و پێویستی بە سەرپەرشتیكار و نێوەنجیكار و ناسینی بەخشەر و وەرگر نییە.
– پێكهێنانی گروپی دەستپێشخەر بۆ كۆمەڵایەتییبوونەوەی بیرۆكەكە، شوێنی چالاكییەکەش گەڕەكەكان و فێرگەكان و باخچە گشتییەكان و مەیدان و شەقامەكانن. چەند كەسێك بە پۆشینی كراس/ T-Shirtی تایبەت كە لە پشتەوەی یا لە پێشەوەی ئەمە نووسرابێت ” گۆڕینەوە و بەخشین لە جیاتی فڕێدان و كڕین “، هەر یەكە لەو چالاكانە هەرچی شتی زیادەی خۆی هەیە دەیكاتە كۆڵەپشتەكەی خۆی و لە شوێنی چالاكییەكەدا بە دانانی شتەكان بەگوێرەی جۆر یا هەڵواسینیان بە تەناف لەنێوان درەختان و بەدیوارانەوە. هەر كەس چ چالاكان و چ ڕێبواران هەر شتێكیان پێویستە دەیبات و بەخۆیشی هەرچی هەیە دایدەنێت. هاوكات لێدوان و زانیارییگۆڕینەوە لەبارەی فیلۆسۆفیی بیرۆكەكەوە دروستدەبێت و دەتوانێت سەكۆیەك بێت بۆ پەرەسەندی خۆهوشیاریی كۆمەڵایەتی بەخشەر و پێبەخشراو و ڕێبواران …
– گۆڕینەوە و بەخشین لە تۆڕە كۆمەڵایەتییەكاندا ڕاستەوخۆ لەنێوان بەخشەر و وەرگردا، بەدانانی شمەكی زیادە و بەخشراو لە شوێنێك كە پێشتر بەخۆیان لەسەری ڕێككەوتوون. بۆ نموونە لە وێستگەكانی باس و شەمەندەفەر و پەرتووكخانە و چایخانە و باخچە گشتییەكاندا، بەبێ ئەوەی بەخشەر و پێبەخشراو یەكدی ببینن یا چاودێریی یەكدی بكەن …
– پێكهێنانی بازنەكانی گۆڕینەوە، ئەم شێوازە پشت بە بنەماكانی پەیوەندی ئەندامانی ئەو بازنە خۆجێییانەی گۆڕینەوە دەبەستێت، لەوانە ئەدرسی پۆستی، ژمارە تەلەفۆن. ئیمەیل ئادرەس. هەروەها دەكرێت لە شێوەی گروپی داخراو یا كراوەی نێو تۆڕە كۆمەڵایەتییەكاندا پێكبهێنرێت، لە هەر دوو شێوەكەدا بەخشین و داواكارییەكان دەخڕینە ڕوو، بەڵام گۆڕینەوە و بەخشینەكە تەنیا لە شمەكدا بەرتەسكنابێتەوە، بەڵكو گۆڕینەوەی كار و هاریكاری ئەوەی كە جاران لەنێو باخەكان و كیڵگەكانی كوردستاندا بە “دەسەوام و كاسەهامسایی” ناسراوبوو و زۆر جار لە شێوەی گەلكاریشدا بەرجەستەدەبوو، بۆ نموونە من ماڵ دەگوێزمەوە و پێویستم بە چەند كەسێكە بۆ باركردن و داگرتن، یا باخچەیەكەم ڕێكدەخەم یا خانوو دروستدەکەم و تۆش بەجۆڕیكی دیكە … تد
– یانە كۆمەڵایەتییەكانی زانیاریی گۆڕینەوە، لەم یانانەدا دەتوانرێت خۆكۆمەكیی [كۆمەككردن و كۆمەكوەرگرتن لە كەسانی خۆبەخش] بۆ خوێندكاران، پەككوتان، ژنانی تەنیا بەخێوكەر، پیاوانی تەنیا بەخێوكەر، پیران و ئاوارەكان و بێكاران و نەخۆشان و لانەوازان ..تد، بۆ نموونە من لە ماتماتیكدا زیرەكم و تۆ لە ڕێزمان و زمانی بیانیدا، من لە بۆیاخكردنی دیوار و تۆ لە چاككردنەوەی كۆمپیوتەردا، من گاڵتە و گەپ و تۆ لە هاریكاری پیراندا و ئەو لە كایە و ڕاهێنانی منداڵاندا و دەستگیرۆیی نابینایان و بێسەرپەرشتاندا …
– بێجگە لە گۆڕینەوە و بەخشین، دەتوانرێت كۆمەڵی/ گروپی كاتیی و هەمیشەیی بۆ كۆكردنەوەی كۆمەكی كۆمەڵایەتی بۆ باخچەی ساوایان و فێرگە و نەخۆشخانە و پاككردنەوەی كۆڵان و باخچەكان و …تد پێكبهێرین و لە كاتی ڕووداوە سروستییەكاندا یا جەنگە سەربازیی و كارەساتە ڕامیارییەكاندا، ئەو كۆمەڵانە كۆمەكەكان بە لێقەوماوان بگەیێنن. بۆ نموونە هاودەمی كارەساتە سروشتییەكەی فلیپین گروپێكی كۆمەڵایەتی خۆبەخش كاری چارچکردنەوەی [شەحنكردنی] مۆبایلفۆنی لێقەوماوان بوو بۆ ئاسانكاریی پەیوەندی بە دونیای دەرەوەی شوێنی كارەساتەكە و دروستكردنی وزەی خۆریی یا وزەی مۆتۆریی بوو بە بایسكیل و مۆتۆری مەكینەی جڵشتن و دابینكردنی یەك گڵۆپ/لامپا بۆ هەر ماڵێك و دابینكردنی شیر بۆ ساوان و بێسەرپەرشتان و كردنەوەی فێرگەی گەڕۆك بۆ منداڵان ..تد ئەمانە و چەندین شێوازی دیكە كە هێشتا پێداویستییەكانی ژیان ئێمەی ناچار بە بیركردنەوە لەبارەیانەوە نەكردووە .
بەم جۆرە دەتوانین تاڕادەیەك سەربەخۆیی ئابووریی بەدەستبهێنین و لە دەرەوەی وابەستەیی بازار و قازانج و چاوچنۆكی سەرمایەداران و ڕامیاران، لە پێكهاتە كۆمەڵایەتییە ناقووچكەییەكاندا خۆمان ڕێكبخەین و ئەزموونی خۆڕێكخستنی ئاسۆیی و ناپێویستی سیستەمی سەروەریی بخەینەڕوو و بسەلمێنن.
چالاکی ئابووری/ کۆمەڵایەتی وەك پێشمەرجی گۆڕان و شۆڕشی کۆمەڵایەتی
هەژێن
٢٢ی جولای ٢٠١٤
پێشەکی
بوارەکانی چالاکی :
– ئابووریی
– کۆمەڵایەتیی
یەکەم کۆی تێکۆشانە ئابوورییەکان دەگرێتەوە:
– مانگرتن …
– نافەرمانی سڤیڵی [مەدەنی] …
– گۆڕینەوە و بەخشین لەجیاتی کڕین …
– پێکهێنانی هەرەوەزییەکانی شوێنی کار و ژیان …
– سەربەخۆیی کار و بازاری کۆمەڵایەتی …
– سەندەنەوەی خانووبەرە و شوێنە گشتییەکان و کەرتەکانی بەرهەمهێنان لە دەوڵەت و سەرمایەداران و ڕامیاران …
– ……………………….. زۆر شتی دیکە
دووەم، کۆی پەیوەندییە کۆمەڵایەتییەکان:
– بەهێزکردنی هاوسێیەتی و کۆمەکی کۆمەڵایەتی …
– گەشت و سەیران و جەژنی گەڕەک و گوندەکان …
– چالاکی هونەریی و ئەدەبی لە گەڕەکەکان و مەیدانەکانی شار و گوندەکاندا …
– یارییە جەستەیی و هۆشییە نادیگیتاڵییەکان و کردنەوەی خولی هاندان بۆ منداڵان و لاوان …
– پێکهێنانی کۆمەڵە خۆکۆمەکییەکان بۆ منداڵان و لاوان و ژنان و پیاوان و پیران و پەککەوتان و کۆچەران و نەخۆشان و ئاواران …
– کردنەوەی خولی خۆکۆمەکی بۆ هەموو تەمەنەکان لە بواری وەرزش [یۆگا و …تد] و پێگەیاندنی ئارەزوو و حەزەکان و گۆڕینەوەی شارەزایی و ئەزموونی کۆمپیوتەری ….
– پێکهێنانی تیپی شانۆیی گەڕۆك و برەودان بە شانۆی سەکۆیی Theatre of the Oppressed/ Invisible theater /Forum theater
– پێکهێنانی پەرتووکخانەی گەڕۆك ، تۆڕ و بازنەی گۆڕینەوەی پەرتووک و زانیاریی …..
– کردنەوەی خواردنگەی هەرەوەزی بۆ لانەوازان و بێکاران و کەم دەرامەتان و ئاوارەکان ….
– کردنەوەی پڕۆژەی دایەنگەو و باخچەی کۆمەڵایەتی ساوان لە گەڕەك و گوندەکاندا …
– ڕێکخستن و پەروەردە و فێرکردن و ڕاهێنانی ئازادیخوازانە/ ناهیرارشی و ناسەروەرانە …
– کردنەوەی نێوەندە سەربەخۆکانی نێوان-کولتووریی/ فرە-کولتووریی بۆ ئاشنایەتی بازنە کولتوورییەکان [intercultural/multicultural] ….
– کردنەوەی نێوەندە کولتوورییەکانی دژە-فاشیزم و شۆڤێنیزم
– بەرپاکردنی فیستیڤاڵە نێوان-کولتوورییەکان [intercultural] بە ئامانجی ئاسانکاریی پەیوەندی بازنە کولتوورییەکان.
– هەڕەوەزیی خۆبەخشانەی تاکگەرایی لەجیاتی هەرەوەزی مەزهەبییانە و خێڵەکییانەی زۆردارەکی …
…. زۆر شتی دیکە
بێگومان هەموو ئەم چالاکی و تێکۆشانانە لەسەر بنەمای دژە-سەروەریی و دوور لە ڕێکخستن و پێکهاتەی قووچکەیی [هیرارشی] و دوور لە بەرجەستەکردنی دەستەگەریی و دەستەبژێریی و پێگەبەخشین بە ڕامیاران، بەڵکو بە پێچەوانەوە پێویستە ئاراستەی هەموو کارەکان ئەوەبێت کە بۆشایی بۆ ڕۆڵ و کایەی دەسەڵاتداران و دەسەڵاتخوازان و ڕامیاران و بەرتەریخوازان و هەڵپەرستان و مشەخۆران نەهێڵێتەوە. بەواتایەکی دیکە گێڕانەوەی خۆموختاریی بۆ تاك و کۆمەڵە کۆمەلایەتییەکان لە کار و ژیان و بەڕێوەبردنی کۆمەڵدا.
لەم مشتومڕە ئازاد و كراوەیەدا، كە لەسەر تۆڕی كۆمەڵایەتی فەیسبووك ئەنجامدراوە و لە سایتە كوردییەكاندا خراوەتە بەرچاوی خوێنەران، ئەم ھێژایانەی خوارەوە بەشدارییان كردووە:
زاھیر باھیر، ** ****، ھەژێن، تاھیر ساڵح شەریف، سیروان عەلی، سەلام عارف، شێخ عەبدول
بۆ خوێندنەوەی پەرتووکەکە لەسەر کۆمپیوتەر و مۆبایل، کلیک لەسەر ئەم لینکەی خوارەوە بکە
https://www.facebook.com/download/652258524882233/dewllet-%20online%20version.pdf
http://issuu.com/home/docs/dewllet-_print_version/edit/embed
بۆ چاپکردنی پەرتووکەکە لەسەر کاخەز، کلیک لەسەر ئەم لینکەی خوارەوە بکە
https://www.facebook.com/download/1399012886987903/dewllet-%20print%20version.pdf
http://issuu.com/home/docs/dewllet-_online_version/edit/embed
ھەیاسە لەودیو دێوجامەی دێمۆكراسی چ باسە ؟ *
ھەژێن
٨ی جولای ٢٠١٤
داعش + قزڵباشی + نێوندە جیھانخۆرەكان = چاوپۆشی لە سەركوتكردنی خۆبەرێوەبەرایەتی كانتۆنە ئازادەكانی خۆراوا “ڕۆژئاوا” **
١. پاش ئەوەی كە ھێزەكانی داعش بە كۆمەكی دەسەڵاتدارانی كوردستان و چاوپۆشی دەوڵەتانی ناوچەكە و ئەوروپا و ئەمەریكا و ڕێگەدان بە سەدان لاوی توندڕەوی ئیسلامی نێو مزگەوتەكانی بریتانیا و ئاڵمانیا و فەرەنسە و ..تد، فرۆشتنی شاری موسڵ لەلایەن فەرماندەی سەربازیی و پارێزگاری (موسڵ)ەوە توانیان موسڵ و دەوروبەری و شوێنەكانی دیكە داگیربكەن، تاكە دەریچە و دەرگەی سنووری و بواری كۆمەكگەییشتن بە خۆبەڕێوەبەرایەتییەكانی خۆراوا “ڕۆژاوا”، كەوتە دەستی داعش و دواتر وەك بەخشیش بە ھێزەكانی (پدك) درا، ڕێگە بۆ بەشی دووەمی پلانەكە كە ھێڕشی ھەمەلایەنە بۆ سەر كانتۆنەكانی خۆراوا، لە ڕۆژی ٢ی جولای ٢٠١٤ دەستیپێكردووە و ئێشتاش ھێرش و تۆپباران بە چەكی قورس ھەر بەردەوامە !
٢. شالیاری نێوخۆی ئاڵمانیا لەبارەی ڕامیاریی پەنادەرییەوە دەبێژێت لە ئێستادا تەنیا پەنابەرانی سوری بە پلەی یەكەم و ڕۆیماكان [قەرەچەكان] بە كەمی و كەسانێك كە ھێزی كاری ھەرزان دەھێننە ئەم ولاتەوە مۆڵەتی مانەوەیان دەدرێت ….
٣. ماوەی ھەفتەیەكە لە كانتۆنی كۆبانی ژنان و پیاوانی ئابڵۆقەدراوی ئەو دەڤەرە لەلایەن ھێزەكانی (داعش)ەوە ھێڕشیان لەسەرە، ھیچ دەزگەیەكی میدیایی وڵاتانی [دێمۆكرات!!!!] و دۆستەكانی كورد لەو بارەوە دەستەواژەیەكیان نەدركاندووە، ھەروەك ئەوەی كۆبانی پارچەیەك بێت لە ئەسترەیەكی دیكە. ئەمە لە كاتێكدا كە ئەمەریكا و دەوڵەتانی ئەوروپا و قسەكەری عەرەبستانی سعودی و ڕژێمی ئسیلامی ئێران بە پاگەندە داعش بە مەترسییەكی گەورە بۆ سەر مافی مرۆڤ و جیھان و ناوچەكە و ئاساییشی نەتەوەییان دەزانن، كەچی لە بەرانبەر ھێرشەكانی داعش بۆ سەر كانتۆنەكانی خۆراوا چاوپۆشیدەكەن. ئا ئەمەیە دەبڵ مۆڕاڵی “بانێكە و دوو ھەوای” (دێمۆكراتە!!!!!)كانی ئەوروپا و ئەمەریكا و ئوسترالیا و كەنەدا و كوردستان !
ئەوانەی كە ڕۆژانە تاعونی دێمۆكراتی پارلەمانی و مافی مرۆڤی نیئۆلیبراڵیستی و دەمارگیریی نەتەوەیی لە تۆڕە كۆمەڵایەتییەكاندا بڵاودەكەنەوە، لە كاتێكدا كە چاویان مایكرۆ-ھەڵەی عەرەبزمان، توركزمان، فارسزمان دەبینێت، بەڵام چاوپۆشی زلھێزەكان لە ھێڕشی داعش بۆ سەر كانتۆنەكانی خۆراوا، پشتیوانی و ھاوپیلانی و ھەڵكەندنی خەندەق و ناردنی دەستەی تیرۆریستی “قزڵباشی” بۆ ڕوخاندنی خۆبەڕێوەبەرایەتییەكانی خۆراوا و لێدان لە یەكەمین ئەزموونی دێمۆكراسی راستەوخۆ و ڕێكخستنی ھەرەزەویی و كۆمونەیی، نابینێت و گوێیان لە ئاستی ھاوار و بانگەواز بۆ فریاگوزاریی و ھاوخەباتیی و ھاوپشتیی نەتەوەیی و نێونەتەوەیی بۆ كانتۆنەكانی خۆراوا، كەڕە!!!
*******************************************
* خوێنەری ھێژا، لەمەولا بەگوێرەی كات و توانا ھەوڵدەدەم لە گۆشەیەكدا بەناوی (ھەیاسە لە دونیای دێمۆكراسی چ باسە؟)، كە مەبەستم دێمۆكراسی پارلەمانی [بۆرجوازیی]یە، ناوبەناو بابەتێك بوروژێنم … ھەژێن
** من واژەی خۆراوا/ خۆرئاوا/ خۆر+ئاوابوون لە جیاتی واژەی جێكەوتەی “ڕۆژاوا/ ڕۆژئاوا/ ڕۆژ+ئاوابوون” بەكاردەبەم، لەبەرئەوەی كە “ڕۆژ” بەو ماوە كاتییە دەگوترێت، كە تێیدا خۆرھەڵدێت و دونیا ڕۆشندەبێتەوە، بەو جۆرە واژەی “ڕۆژاوا” ھەڵەیە، چونكە ناتوانین واژی ڕۆژ، ڕۆژەتاو لە جیاتی خۆر و خۆرەتاو بەكاربەرین.
تا ئەوەندەی من بزانم لە زۆربەی زمانەكاندا بۆ ھەر یەك لە [گۆی ڕۆناككەرەوە/ خۆر] و [ڕۆشنایی خۆر /خۆرەتاو] و [ماوەكاتێك كە تێدا گۆی زەمین بە دەركەوتنی خۆر ڕۆشندەبێتەوە/ڕۆژ] دەگوتڕێت و واژەی تایبەت ھەیە. بۆ نموونە لە زمانی ھۆرامیدا سێ واژەی تایبەت ھەن [ڕوجیار/ خۆر] ، [وەر/ خۆرەتاو] ، [ڕو / ڕۆژ] … ئەمە لە زۆربەی زمانەكانی دونیاشدا ھەر ئاوایە.
لەبەرئەوە، بەبۆچوونی من، زمانە كوردییەكان لەو بارەوە ھەژارنین و ھەر یەكەیان چەندین دیالێكت و لكە-دیالێكتیان ھەیە و دەكرێت بە سوودوەرگرتن لە واژەگەلی زمانە كوردییەكانی دیكە، كەلێنی زمنانێك كە واژەی دروستی بۆ شتێك نییە، پڕبكرێتەوە.
ھەیاسە لەودیو دێوجامەی دێمۆكراسی چ باسە ؟ *
ھەژێن
٧ی جولای ٢٠١٤
ئاوەدانكردنەوەی عیراق + مەرجەكانی قەرزی سندوقی دراوی نێودەوڵەتی و بانكی جیھانی + ھێڕشی داعش و بەرزبوونەوەی نرخی بەنزین لە عیراق
ساڵی ٢٠٠٧ لە وڵاتی كوێت نوێنەرانی بانكی جیھانی و سندوقی دراوی نێودەوڵەتی و ھێزە براوەكانی جەنگی سێیەمی كەنداو كۆبوونەوە و لە بەرانبەر پێدانی قەرز بە دەوڵەتی عیراق بۆ “بنیاتنانەوەی عیراق” كۆمەلێك مەرجیان دانان، ھەندیكیان ئەمانەبوون:
بەرزكردنەوەی نرخی سوتەمەنی [نەوت و گاز و گازوایل و بەنزین] چەند سەد بەرانبەر، لابردنی پشتیوانەی خۆراكی بۆ خەڵك [باییعی]، تایبەتیكردنەوەی گشت كەرتەكان لەوانە خوێندن و تەندروستی و بانكەكان و پیشەسازی [بەتایبەت نەوت] …تد، ئەو كات چەند جار ھەوڵ بۆ جێبەجێكردنی ئەو مەرجانە درا، بەڵام سەركەوتوو نەبوو، بەتایبەت ھەڵوەشاندنەوەی كۆمەكی خۆراكی [باییعی].
ئەوەی لەم ڕۆژگارەدا ڕوودەدا، دروستكردنی فشارە بۆ جێبەجێكردنی ئەو مەرجانە و یەكێك لە ھۆكارەكانی دروستكردنی داعش و ھێنانیان بۆ عیراق ئەوەیە و دژایەتیی ھەموو لایەنەكان بۆ خۆبەڕێوەبەرایەتییەكانی خۆراوا، لەبەر ئازادنەبوونی بازار و ملنەدانە بە مەرجەكانی ئەو نێوەندە جیھانخۆرانە !
*******************************************
* خوێنەری ھێژا، لەمەولا بەگوێرەی كات و توانا ھەوڵدەدەم لە گۆشەیەكدا بەناوی (ھەیاسە لە دونیای دێمۆكراسی چ باسە؟)، كە مەبەستم دێمۆكراسی پارلەمانی [بۆرجوازیی]یە، ناوبەناو بابەتێك بوروژێنم … ھەژێن
لەبارەی دەوڵەتی کوردییەوە
سڵاو هاوڕێ *****
ببوورە ئێستا پەیامەکەتم دیت، دواکەوتنی وەڵامەکەشم هەر ئەم هۆیەیە. لەوانەیە لەو کاتەدا تۆ پەیام و پرسیارەکەت ناردبێت، کە من لەتەك هاورییەکی ئازیزدا خەریکی گفتوگۆ و بۆچوونگۆڕینەوە بووین لەم بارەوە.
راستییەکەی زۆر جار دەخوازم لە هەندێك شوێندا ڕۆشنکردنەوەی زیاتر بدەم، بەڵام لەبەرئەوەی کە شێوازی داڕشتن و خێرایی گەیاندنی مەبەست دەگۆڕێت، لەبەرئەوە چاوپۆشی لێ دەکەم.
وا هەوڵدەدەم لێرەدا زۆر بە کورتی و بە چەند خاڵ وەڵام بە پرسیارەکەی تۆ بدەمەوە و کەلێن و ناڕۆشنی بۆچوونەکانم لەو بارەوە پڕبکەمەوە:
– من وەك ئازادیخوازاێك دژی هەموو دەوڵەتێك و دەسەڵات و بەڕێوەبەرایەتی و ڕێکخستنێکی نێوەندییم. لەبەرئەوە لەم بارەدا هەم لایەنگریی لە وردبوونی هەموو دەوڵەت و بەڕێوەبەرایەتییەکی نێوەندیی دەکەم، هەم دژی دروستبوونی هەر دەوڵەت و پێکهاتەیەکی نێوەندگەرایی و دەسەڵاتێكی سەرووخەڵکیم.
– بەڵام ئەگەر بڕیاربێت پێکەوەمانەوەی ئێتنیی و ئایینەکانی نێو چوارچێوەی جوگرافیای ڕامیاریی عیراق بە نرخی خوێنی کەسانێك و دروستبوونی کینەدۆزی و جەنگی نەبڕاوەبێت لەنێوان پێکهاتەکاندا، ئەوا پارچەپارچەبوون و نەمانی ئەو پێکهاتە شەڕەنگێزییە بە باشتر دەبینم.
– بە بۆچوونی من، هەڵای دەوڵەتی کوردی لەم کاتەدا تەنیا دێوجامەیەکە و هەموو لایەنەکان وەك کارتی فشار بۆ مسۆگەرکردنی بەرژەوەندییەکانیان بەکاردەبەن، لەوانە ئیسرائیل وەك کارتی فشار بۆ سەر دەوڵەتانی عەرەبی و فەلەستینییەکان، بەرامبەر ئێران بە ئەگەری پارجەپارچەبوونی، بەرامبەر تورکیە بە ئەگەری پارچەپارجي بوونی وەك تۆڵەی پشتیوانی لە ناردنی کەشتییەکانی کاروانی ئاشتی و شکاندنی ئابلۆقە لەسەر کەناری خۆراوا.
بەکاربردنی هێزی داعش و پاگەندەکانی دەسەڵاتدارانی هەرێم وەك کارتی فشار لەلایەن دەوڵەتی تورکیە دژی فەرمانداریی نێوەندی عیراق و گۆڕینی پێگەی تورکمانە لایەنگرەکانی لە هاوسەنگی و کێشەکانی عیراقدا، هەروەها پشتپەردەخستنی دەستتێوەردانەکانی خۆی لە سوریە و فشارخستنە سەر خۆبەڕێوەبەرایەتی خۆراوا. ئەمە بێجگە لەوەی کە هەوڵێکە بۆ ئارامکردنەوەی قەیرانی ئابووریی خۆی بە بەدەستهێنانی دەستکەوتی نەوتی لە ناردنەدەرەوەی نەوتی هەرێم و عیراق، لەولاشەوە بەرپەرچدانەوە و کەمکردنەوەی فشاری كێشە ئایینی و ئێتنییە نێوخۆییەکانی خۆی بە فشارخستنە سەر دەوڵەتی ئێران و فەرمانداریی نێوەندیی و دەوڵەتی سوریە، لەوانە کێشەی کوردان و کێشەی عەلەوییەکان.
هەروەها هاوکات دەسەڵاتدارانی پدک و فەرمانداریی هەرێم هەمان کارت و ئامانجیان هەیە، بەوەی لە لاوازی دەوڵەت و فەرمانداریی نێوەندی عیراق و لاوازیکردنی خۆبەڕێوەبەرایەتی خۆراوا بە قازانجی “البارتي” لەوێ.
دەوڵەتانی کەنداویش بە لاوازکردنی دەسەڵاتی فەرمانداریی نێوەندی کە لەژێر ڕکێفی ڕامیارانی (شیعە)دایە، بەوە هەم هەژموونی ئێران لە ناوچەکە کەمدەکەنەوە و هەم لێدان و تەریککردنەوەی بزووتنەوە ناڕازییەکانی شیعەیە لەنێوخۆی خۆیان.
– دەوڵەت تورکیە تەنیا لە یەك باردا لەتەك پارچە پارچەکردنی عیراقە، ئەویش گێرانەوەی وڵایەتی (موسڵ)ە بۆ خۆی.
دەوڵەتی ئەمەریکا لە قازانجی نییە کە عیراق پارچە پارچە بکرێت، بەڵام حەز بە لاوازکردنی فەرمانداریی نێوەندی عیراق و لەوێشەوە فشار بۆ خستنەسەر ئێران.
– ئەوەی من دژایەتیدەکەم، بەکاربردنی پرسی نەتەوەیی و خەونی دەوڵەتی کوردی تاکی ناهوشیارە لەلایەن فەرمانداریی هەرێم و دەسەڵاتدارانی (پدک)ەوە، کە تەنیا یەك ئامانجیان هەیە، دەیانەوێت لە کێشەی دەسەڵاتی ڕامیاریی نێوان ڕامیارانی سنوننە و شیعە، بە دوو دەستکەوت براوەبێت :
یەکەم سەپاندنی مەرجەکانی کۆمپانییە نەوتی و بازرگانییەکانی دەسەڵاتدارانی هەرێم بەسەر فەرمانداریی نێوەندییدا.
دووەم توندکردنەوەی بازنەی ئابلۆقەی هەمەلایەنە لەسەر خۆبەڕێوەبەرایەتی خۆراوا و ناچارکردنی گەلی کورد لەوێندەرێ بە ملدان بە دەسەڵاتی زیاتر و ملهوڕی البارتي!
خالێك کە هەرگیز نابێت لەم نێوەدا لەبیرمانبچێت، کۆکردنەوەی هەموو دژەکانە لەسەر خوانی دژایەتی خۆبەڕێوەبەرایەتی خۆراوا، کە تێداچوونی ئەو خۆبەڕێوەبەرایەتییە سەربەخۆییە لە بەرژەوەندی دەوڵەتان و فەرماندارییەکان و پارتەکان و ڕامیارانی ناوچەکەیە بەگشتی، ئەوەش لەبەر دوو هۆ:
یەکەم خۆبەرێوەبەرایەتی خۆراوا بە دێمۆکراسی ڕاستەوخۆ پشتئەستوورە،
دووەم بەپێچەوانەی پیلانە ناوچەیی و جیهانییەکانەوە بۆ ئێستای جەنگ و پاش جەنگی سوریە، دانیشتوانی کانتۆنەکانی خۆراوا خەریکی پەرەدانن بە شۆڕشی کۆمەڵایەتی، کە هەر دوو هۆکارەکە زەنگی مەترسیین بۆ سەر هەموو پێکهاتە ڕامیاریی و سەربازیی و ئابووورییەکان لە ناوچەکەدا، بەواتایەکی دیکە نامسۆگەریی برواوەبوون و پشکی شێر بۆ براوەکانی جەنگ!
جارێکی دیکە دەیڵێمەوە داعش مەقاشی دەوڵەتانی ناوچەکەیە و جەنگی سەرەکی لە دژی خۆبەڕێوەبەرایەتییەکانی خۆراوایە نەك شیعە و کوردانی هەرێم یا سعودیە و ئێران.
ئازیزم، هیوادام بە زووترین کات جەنگ کۆتایی بێت و نەبێتە هۆی کۆمەڵایەتییبوونەوەی جەنگی ئێتنی و مەزهەبیی لە ناوچەکەدا، تا ئێستا جەنگەکە ڕامیاریی و سەربازییە، کەی بەرژەوەندی هەڵگیرسێنەرانی کەوتە مەترسی، ئەوا وەك هەموو جەنگە نێوخۆیی و دەوڵەتییەکان بە دوو پێك شەرابخواردنەوە و دوو وێردخوێندن و نوێژکردن کۆتاییپێدەهێنن، بەڵام مەترسی لەوەدایە کە جەنگەکە ڕەهەندی کۆمەڵایەتی بەخۆیەوە بگرێت، ئیدی پاشماوەی تا کۆتایی ژیان لە عیراقدا درێژەی دەبێت.
ئا لەم ڕوانگەوە دەڵێم پارچە پارچەبوونی عیراق لە مانەوەی زۆرەکی و خوێنڕشتن باشترە، چونکە هەموو خاکی عیراق و مێژووەکەی بەهای خوێنی مرۆڤێکی نییە، کە لە پێناویدا بکوژرێت و بڕژێت!
وێڕای ڕێز و خۆشەویستیم، هیوادام وەڵامم بە پرسیارەکەی تۆ دابێتەوە و ناڕۆشنی و کەلێنی بابەتەکانی ئەم چەند ڕۆژەی دوایی خۆمم پڕکردبێتەوە.
کەسانی خۆشباوەڕ خوازیاری ڕاستدەرچوونی درۆ-پیرۆزەکانن
١ی جولای ٢٠١٤
ئەوەی کە لە ماوەی ٢٣ ساڵی ڕابوردوودا، ڕامیاران و دەسەڵاتدارانی بۆرجوازی کورد لە هەرێمی کوردستاندا هەوڵی بەدەوڵەتبوون نادەن، بە بۆجوونی من، لەبەرئەوە نییە کە بەدەوڵەتبوونیان نەوێت، بەڵکو لەبەرئەوەیە کە وەك بەشێك لە چینە جیهانییەکە [بۆرجوازی] و بەشێك لە دەسەڵاتدارانی ئەو چینە ناتوانن پێچەوانەی خواستی سەرەوەی خۆیان هەنگاوبنێن. هەروەك چۆن (پارتی کۆمونیستی عیراق) نەیدەتوانی بەبێ ڕەزامەندی کۆمینتێرن وتارێك بڵاوبکاتەوە. ئەمە دونیای ڕامیاریی و پاراستنی بەرژەوەندییەکانە، نەك حەزحەزۆکی تاکی خۆشباوەڕ بە “نەتەوە” و “نیشتمان-هەمووانی” !
من ناڵێم بۆرجوازی کورد نەیدەتوانی دەوڵەتی خۆی ڕابگەیێنێت، بەڵێ دەیتوانی، بەڵام لەتەك بەرەنگاریی زلهێزەکان و دەوڵەتەکانی ناوچەکە ڕووبەڕوو دەبووەوە، چونکە سروشتی پێکهاتەی چینی بۆرجوا ئاوایە، کە هەموو کەسێك هەوڵی زاڵبوون بەسەر ئەوی دیکەدا دەدات و ئەوی زاڵە هەوڵی پاشکۆهێشتنەوەی ئەوانی دیکە دەدات …تد. لەبەرئەوە بەدڵنیاییەوە دەڵێم کە تاڵەبانی و بارزانی لە هەموو تاکێکی خۆشباوەڕ بە “دەوڵەتی نەتەوەیی” ئارەزووی دەوڵەتبوونیان کردووە و دەکەن، بەڵام بەو چاوەڕوانییەوە نا کە تاکی خۆشباوەڕ لە دەوڵەت هەیەتی، بەڵکو وەك ئامرازی سەروەربوونی بۆرجوازی بەسەر چین و توێژە بندەستەکان و ململانێی دەسەڵاتی زیاتر و چەپاوڵکردنی زیاتر لە هاودەوڵەتییەکانی دەوروبەر.
من ئاوای دەبینم، ئەگەر بەرژەوەندی زلهێزەکان و کۆمپانییە جیهانخۆرەکان لە ناوچەکەدا و لە چوارچێوەی جوگرافیای ڕامیاریی ئێستادا بکەوێتە بەر مەترسی، ئەوا لە ناچارییدا دروستکردنی دەوڵەتێك بۆ بۆرجوازی کورد لە ناوچەکەدا ئەگەری هەیە، بەڵام ئەگەرێکی زۆر دوور. چونکە یەکەم لەو چوار دەوڵەتەدا کە کوردەکانیان بەسەردا دابەشینراون، بەرژەوەندی زلهێزەکان لە مەترسیدا نییە؛ هێشتا مانەوەی ڕژێمی بەعس لە سوریە باشترین پاسەوانە بۆ پاراستنی سنووری ئیسرائیل، دەوڵەتی تورکیە هاوپەیمان و ئەندامی ناتۆیە، ئێران وێرای هەموو کێشنمەکێشەکان، هێشتا بۆ دەوڵەتانی خۆراوا بە بەراورد بە جێگرەوە ئەگەرییەکانی باشترین مسۆگەرکەری بەرژەوەندییەکانیانە، دەوڵەتی عیراق و نەوتی عیراق لە نەوتی هەرێمی کوردستان مسۆگەرتر و بێدەردیسەرترە، بێجگە لەوانەش پێگەی ئابووریی و هاوسەنگی هێزی دەوڵەتە داگیرکەرەکانی کوردستان لە ناوچەکەدا ڕۆڵێکی زۆر گەورە بۆ سیستەمە جیهانییەکە دەبینێت و ئەوانیش کارتی فشاریان هەیە بۆ سەر بڕیارەکانی دەوڵەتە یەکگرتووەکان [UN] و ئەمەریکا و بریتانیا وئاڵمانیا و فەرەنسا، دەوڵەتە زلهێزە کێبڕکێکەرەکانی وەك چاینا و (ڕوسیا)ش قومار لەسەر شتێکی نامسۆگەر ناکەن.
لەبەر ئەو هۆیانە، هەڵای دەوڵەتی کوردی تەنیا پاگەندە و سەرگەرمکردنی تاکی خۆشباوەڕ و دۆڕاوی هەموو جەنگەکان و هەموو هەڵبژاردنەکانە و کەمتر لە درۆودەلەسەی سەردەمی هەڵبژاردنەکان ڕاستی تێدایە !
جارێکی دیکەش دەیڵێمەوە، ڕامیارانی بۆرجوازی کورد لە هەموو تاکێکی دەمارگیر و نەتەوەپەرستی کورد زیاتر ئارەزوومەندی بە دەوڵەتمەندبوونن، بەڵام ئەوان لە تاکی خۆشباوەڕ و ناهوشیاری چین و توێژە بندەستەکان کەتواربینترن*. تاکی چەوساوەی ناهوشیار وێڕای ئەزموونگەلێکی زۆری مێژوویی و ئەزموونەکانی ٢٣ ساڵی ڕابوردوو، کە سەلمێنەری نابرایەتی/ ناخوشکایەتی و ناکۆکی بەرژەوەندی و ئامانجی چین و توێژە مشەخۆرەکان، و ، چین و توێژە بەرهەمهێن و زەحمەتکێشەکانە، کەچی هێشتا تاکی خۆشباوەڕ بە چەقەنەی “دەوڵەتی نەتەوەیی” و “هاوبەرژەوەندی نەتەوەیی” و “نیشتمان-هەمووانی” هەڵدەپەڕێت و گەمژە گەمژە بۆ سەروەرمانەوەی چەوسێنەرانی خۆی، خۆی بەکوشتدەدات و بۆ هاتنەدی شتێك تێدەکۆشێت، کە سەرەنجام بە توندکردنەوەی زنجیرەکانی دەست و پێی خۆی تەواودەبێت، هەروەك هاوچینە تورک-فارس-عەرەبزمانەکانی لە تورکیە و سوریە و ئێران و عیراق دەوڵەتبوونی دەسەڵاتی چەوسێنەرەکەیان بووەتە زنجیری خۆشباوەڕیی لە ملیاندا.
لە باری ئێستادا تاکی کورد هەمان ورە و حەزی بۆ پاراستنی دەوڵەتی ئەو وڵاتانە نییە، کە هاوچینە خۆشباوەڕەکانی بە “دەوڵەتی نەتەوەیی” تورک و فارس و عەرەب هەیانە، لەبەرەئەوەیە کە بە ئاسانی دژیان تێدەکۆشیت و داوای ڕوخاندنی ئەو دەوڵەتانە دەکات، بەڵام کاتێك کە دەوڵەتی ئەفسانەیی نەتەوە وەك تەوق کرایە ملی، ئیدی ئەوسا درەنگە و جەنگکردنی وەك ئێستا ئاسان نییە، چونکە هەروەك چۆن ئێستا داعش بەناوی دژایەتی “اللە” کەوڵماندەکات، ئاواش لە سبەینێی دەوڵەتبوونی بۆرجوازی کورددا، دەسەڵاتداران بەناوی “سەروەریی نەتەوەیی”ەوە کەوڵماندەکەن، هەر بەو جۆرەی کە ڕۆژانە دەبینین دەوڵەت وەك تەوقی کۆیلەتی کراوەتە ملی تاکی فارسزمان و تورکزمان و عەرەبزمانەکان و لە مرۆڤایەتی کەوڵیاندەکات و وەك چینی ژێردەست و چەوساوە بەخۆیان نامۆیاندەکات !
********************
کەتواربین = واقیعبین
وێڕای = سەرەرای
خوشکایەتی، بۆ ئەوەی لە هەڵاوێریی و نێرینەبوونی واتا و چەمك و واژەکان بدەین، پێویستە لە جیاتی چەمکگەلی وەك پیاوکوژی / مرڤکوژی، پیاوبوون و پیاوەتی / مرۆڤبوون و مرۆڤایەتی، برایەتی نێوان مرۆڤەکان / خوشکایەتی و برایەتی نێوان مرۆڤەکان …تد بەکاربەرین … بەداخەوە سەرەڕای پاگەندەی زۆرێك لە نووسەرانی کورد بۆ یەکسانیخوازیی و تەنانەت پێداگریی لەسەر فێمنینیزم، کەچی زمانی ئاخاوتن ونووسینیان پڕە لەو واژە و چەمك و واتایانەی کە نوێنەرایەتی سووکایەتی سەراپای مێژوو بە ڕەگەزی مێینە دەکەن.