Xemi Nan & Xewni Azadi

Pagende pûçekanî hellbjardin

Hejên
20î sêptemberî 2013

 

Eger sernicî pagendey partekan û kandîdekan çi desellatdar û çi benaw opozsyon bdeyn, ewa leçaw xellkî wllatanî ewrupa le pirsî dengdan û beşdarîkirdnî galltecarî hellbjardinî xrap le xraptirda, kurdan ew nedî û bdîyen, ke gunî kurrekeyan debrrin û le baştirîn barda bnêştî hellbzirkawî demî koyle û deselatixwazekanî ew ewrupa decûnewe !

 

Em gute pûçe “eger deng nedeyt, dengeket debête behêzkirdnî ew layeney ke pêtxoşnîye”, çend sed salle le ewrupa dengnederanî pêdetrisênin û tenanet çwar sall lemewpêş partî soşyal-dêmokratî allmanî xwazyarî szay (50) yoroyî her kesêk bû, ke dengnadat, keçî êsta le herêmî kurdistan layengranî lîstî newşîrwanîyekan û îslamîyekan bew trrohate xellk detrisênin, eger dengnedeyt, (înk) û (pidk) behêz demênnewe û hellbjardin debenewe ya ewey îslamîyekan be erkî ayînî û berpirsyarîyetî berdem xudakeyanî denasênin !

 

Sallane lelayen nêwende cîhanîyekanî binke le emerîka, çendîn milyard dolar bo handanî lawan bo beşdarîykirdnî ramyarîy û beşdarîykirdnî dengdan le cîhanda xercdekrêt, ke bew brre pareye, detwanrêt çendîn fêrge û nexoşxane û serpena û derman û kerestekanî xwêndin bo danîştwanî kîşwerêkî wek eferîka dabînbikrêt.

 

Hawkat rojane le lankey dêmokrasî parlemanîyewe bîgre ta kawlistanekey [wêranekey] ême, hezaran krêkar û fermanber bemebestî paşekewtî zyatrî sûd bo xawenkarekan û fermanrrewayan, leser karekan derdekrên ya krêy kar û destkewtekanî dîkeyan lêkemdekenewe û eger lepênaw daxwazî zyadkirdnî çend sêntêkda manbigrin, ewa herreşey derkirdin û szadanyan lêdekrêt û ne xawenkaran û ne dewllet amadey zyadkirdnî çend sêntêk nîn!

 

Edî, le katêkda ke xawenkaran û desellatdaran amadey zyadkirdnî çend sêntêk bo krêkaran, baştirkirdnî xizmetguzarî, berizkirdnewey astî guzeran, kemkirdnewey mawey kar be amancî rexsandinî hellî çalakî werizşî û kultûrî bo bêdesellatan nîn, çon detwanîn birrwa bexoman bhênîn, ke desellatdaran û ramyaran le berjewendî takî bêdesellat, amaden sallane çend milyard dolar bo brewdan be ramyarîy û dengdan, xerc bken?

 

Aya lewe şermezaranetir heye, ke komellêk be pagendey pûçî xemî saxtekarî û trrohatî dîke, le rûyan dêt, xellk bo dengdan û debengibûn bangewaz bken?

 

Kemêk lemewpêş le kesêkim pirsî; beyanî deçît bo dengdan ?

Gutî :  erê, detrism şehîdaney pyawekem bibrrin !

Gutim, birrwanakem .

Gutî : birrwabke le layengranî desellat bîstûme!

Gutim: dey başe, sererray eweş her detwanî deng be kes nedeyt !

Gutî: çon ?

Gutim zor asan, bço karteket be spîyetî bxere sindûqekewe. Eger pirsyaryankird, bo nawî hîç kesêkt nenûsîwe, bllê ” min tenya deng bexom dedem û tenya xom be şayistey nwênerayetî xom dezanim, leberewey ke lîstî kandîdekan nawî xomî têdanîye, naçarm karteke be spîyetî bxeme nêw sindûqekewe !”

 

Dey ba be birrwa û huşyarîyewe le yekgirtnêkî cemawerîyda baykotî dengdan bkeyn, ba wek derbrrînî narrezayetîyekî kodengî cemawerîy û nafermanî medenî, le mall neyêêne derewe, eger be her byanûyek û le tirsî her ştêk naçarbûyt brroyte pişt sindûqekanî dengdan, ewa hewillbde be spîyetî karteke bxere sindûqekanî dengdanewe , to deng bdeyt û nedeyt, her komelêk mşexor û desellatixwaz be kursî û xanenşînîy parleman şad debin, bellam eger dengnedeyt, wîjdant asûde bêt, ke be dengdant komellêk ramkart negeyandûnete parlemanî û xanenşînîy paşayane, herweha sbeynêş rûy rexnegirtin û narrezayetî derbrrînt debêt û leberdem kesda şerm le “ne” wtin, nakeyt !

 

Na bo sîstemî nwênerayetî

Na bo serwerîy çînayetî

Bellê bo serbexoyî xom û hemuwan

Tenya xom şayistey deng û hellbjardinî xomim

بۆچی پێویستە دەنگدانەكان بایكۆتبكەین ؟

 

ھەژێن

١١ی سێپتەمبەری ٢٠١٣

دێمۆكراسی چ بەواتا كلاسیكەكەی و چ بەواتای ئازادی تاك لە سایەی سەروەریی چینایەتیدا، تەنیا درۆیەكی پیرۆزكراوە و بەس، چونكە دێمۆكراسی بەواتای خۆبەڕێوەبەرایەتی گەل، جەماوەر، ھەموو تاكەكانی كۆمەڵ، تەنیا ڕاستەوخۆ دەتوانێت بوونی ھەبێت و ناڕاستەوخۆكردنی و ئاوەژووكردنەوەی بە نوێنەرایەتی دەستەبژێرێكی ڕامیار و ئەكادێمی و سەرمایەدار، تەنیا دیكتاتۆری كەمینەی سەروەر دەستەبەردەكات !

لەبەرئەوە ھەڵبژاردن بۆ دەنگدەر، جۆرە قومارێكە و تێیدا دەنگدەر  ھەر چوار ساڵ جارێك، مافی ڕاكێشانی كارتێكی ھەر دوو دیو وەكیەكی ھەیە، بۆ ئەوەی ڕامیارێك [دەسەڵاتخوازێك] بكاتە سەروەری خۆی، بەختی بردنەوەی ئەو قومارە لە بەختی بردنەوەی یاری بەخت (لۆتۆری) كە لە چەند ملیۆندا یەكە، كەمتر و لاوازترە، بەڵام بۆ دەنگپێدراو میكانیزمی مسۆگەركردنی بەدەستھێنانی كورسی پارلەمان [دیواخانی مشەخۆران] و دەسەڵات و مشەخۆرییە.

ئەوی خوازیاری دێمۆكراسییە، پێویستە ئەرك و خەباتی وەرگێڕانەوەی دێمۆكراسی لنگەوقوچكراو بۆ سەر لاقەكانی لە ئەستۆبگرێت و ھەوڵی پیادەكردن و بە كولتووركردنی دێمۆكراسی ڕاستەوخۆ لە شوێنی كار و ژیان، لە ھەموو بوارەكانی ڕێكخستن و بەرێوەبردن و بەرھەمھێنان و دابەشكردن و بڕیارداندا بدات، بەواتایەكی دیكە خەبات بۆ بەدیھێنان و جێكەوتەبوونی دێمۆكراسی ڕاستەوخۆ (بەڕێوەبەرایەتی گەلیی) وەك كولتوورێك، بكات.

ئەگەر خۆمان لە گێڵی بدەین و نادەربەستانە بڕوا بەخۆمان بھێنین، كە ھەڵبژێردراوانی پارلەمانتار خزمەتكاری كۆمەڵگەن و بۆ ئەو مەبەستە خۆیان كاندیدكردووە و دەكەن، ئەوا پێویستە ئەوە لەبەرچاوبگرین، كە خزمەتكردن كار و چالاكییەكی كۆمەڵایەتیی بێپاداشت [بێبەرامبەر]ە و واتای كاری خۆبەخشانەی تاك بۆ ھاوەڵ و ھاوكاران و كۆمەڵگە دەگەیێنێت و لەو بارەدا دەبێت پارلەمانتاران وەك خۆكاندیدكەران بۆ خزمەتی كۆمەڵگە بەبێ مووچە وەك كاری خۆبەخش و خۆكۆمەكی، دەستبەكارببن. ئەگەر وەك ھەر كارێكی ئاسایی كۆمەڵایەتیش بۆی دەستبەكاردەبن، ئەوا ھیچ كات نابێت پاداشتی وەھا كارێك لە كارە كۆمەڵایەتییەكانی دیكە زیاتر بێت . بەڵام ئایا ھیچ پارتێك، ھیچ كاندیدێك، ھیچ ڕامكارێك، ھیچ دەسەڵاتدارێك، ئامادەیە خۆبەخشانە و بەبێ پاداشت و مووچەی پاشایانە و خانەنشینی، مشە كار بۆ كۆمەڵگە بكات، یا ئایا ھیچ یەك لەوانەی كە پاگەندەی خزمەتكردنی كۆمەڵگە دەكەن، ئامادەن [بە مووچەشەوە] یەك خولەك [نەك چوار ساڵ] كرێكاری شارەوانی بن و كۆڵان و شەقام و باخچە و ئاوەڕۆكانی گوند و شار خاوێنبكەنەوە، ئایا ئامادەن لە فێرگە و نەخۆشخانە و نشینگەی پیرساڵان و باخچەی ساوایان و كەمئەندامان و لێقەوماواندا خاوێنكردنەوە و سەرپەرشتی و ئاشپەزیی بكەن ؟ ئیدی مەبەستییان لە خزمەتكردن چییە و  بۆچی دەبێت چەنەبازیی و باوێشكدانی ئەوان لە پارلەماندا دوو ملیۆن دینار مووچە و خانەنشینیی ھەتاھەتایی بێت ؟

ھەڵبەتە ئەمە دیوێكی پرسەكەیە و ئەوانەی كە ئەمڕۆكە بە ھەندێ وردەگیریی دەسەڵاتخوازانەوە بایكۆتی خۆھەڵبژاردن و دەنگدان دەكەن و ئەگەر بوارییان ھەبووایە و سنگەكوتانیان بۆ دەكرد، ھیچ كات پورتوبۆڵەیان لە ناپاكیی ھەڵبژاردنەكان، نایانخاتە ڕیزی ناڕازییانی شۆڕشگێڕەوە، ئەوان ڕەخنەیان لە دەسەڵاتی سەرووخەڵكی نییە، بەڵكو خۆیان بە شیاوترین دیكتاتۆر بۆ بەرێوەبردنی كۆمەڵگە دەبینن. لەبەرئەوە پێویستە ڕیز و شێوازی بایكۆتی خۆمان لە بۆڵەبۆڵی دەسەڵاتخوازانەی ئەوان جیابكەینەوە !

ھەرچەندە لە سایەی سەروەریی ھەندێك بەسەر ھەندێكی دیكەدا، ماف و ئازادی و سەربەخۆیی و یەكسانی و دادپەروەریی  پووچترین و كەوڵكراوترین و دێوجامەترین واژەن، بەڵام ئەگەر لەوە بگوزەرێین و بە گریمانە وەریبگرین، كە دەنگدان و ھەڵبژاردنی مشەخۆران و سەروەران مافی تاك بێت، ئەوا بە ھەمان لۆجیك پێویستە بایكۆتكردنی ھەڵبژاردنیش، مافی ڕەوا و بێچەندوچوونی تاك ھەر كۆمەڵگەیەك بێت !

ھەر بەپێی ئازادی ڕواڵەتییانەی دەنگدان و ھەڵبژاردن و ئەوەی كە بەپێی ھەژماری دانیشتووان، سندووقەكانی دەنگدان دیاریدەكرێن و ھەژماری نوێنەران [پارلەمانتاران] دیاریدەكرێت، ئەوا ھەروا كە دەنگدەران مافی ئەوەیان ھەیە، كۆمەڵێك دەسەڵاتخواز و مشەخۆر بخەنە سەر كورسییەكانی پارلەمان، ھەرواش دەنگنەدەران مافی ئەوەیان ھەیە، ئەو كورسییانەی، كە بە ھەژماری دەنگی ئەوانەوە پەیوەستن و دەنگیان پێنەدراوە، بە خاڵی بھێڵنەوە و بۆشایی لە دەسەڵاتی سەرووخەڵكیدا دروستبكەن ! ئایا دێمۆكراسی پارلەمانی لە لانكەیەوە تا دوا وڵاتی پارلەمانیكراو، بواری پەیڕەوكردنی مافی دەنگنەدەران دەدات؟ ئەگەر وەڵامی لایەنگرانی دێمۆكراسی پارلەمانی ئەوەیە، كە ھەر كەس بەشدارینەكات و ئەو ھەلە لەدەستبدات و مافی بڕیاردانی نییە، ئەوا ئەو وەڵامە ئەوە دەسەلمێنێت، كە دێمۆكراسی پارلەمانی لە باشترین باردا پووچترین خەونی مرۆڤی ناھوشیارە و لە خراپترین باریشدا ئامرازی بەدەسەڵاتگەییشتنی كۆمەڵێك [دەستەبژێری ڕامیار] مشەخۆر و دەسەڵاتخوازە و مافی دەنگدان، ھەمان ڕۆڵی ئێسقانێكی ڕوتاوەی ھەیە، كە قەسابێك فڕێیدەدداتە بەردەم سەگێك بۆ پاسەوانیكردنی خۆی !

تا ئێرە، نە سیستەمی سەروەریی و مشەخۆریی دەستەبژێری ڕامیار دەتوانێت دێمۆكراسی [فەرمانڕەوایەتی گەل] بێت و نە دەنگدان؛ ماف و ئازادییە و نە پارلەمانتاران؛ خزمەتكاری كۆمەڵگەن و نە ھەموو تاكەكان؛ دەنگنەدەران لە بەرامبەر دەنگدەران یەكسانن و نە دەنگدەران؛ كار و فەرمانڕەوایەتی پاش ھەڵبژاردن دیاریدەكەن !

سەرەنجام نە دێمۆكراسی پارلەمانی ئەوەیە، كە تاكی ژێردەست و بێبەش خەونی پێوەدەبینێت و  نە مافی دەنگدانیش دەستكەوتی مێژوویی چەوساوانە و نە دروشمی مافی دەنگدان بۆ ھەمووان لە ھیچ سەردەمێكدا شۆڕشگێڕانە بووە ! چونكە لە كاتێكدا كە دەنگدانی گشتی لێدانبووە لە شان و شكۆی ئاخاكان و بەگەكان و خانزادەكان، ھاوكاتیش ئامرازێك بووە بۆ سەركەوتنی بۆرجوا شارییەكان بەرەو دەسەڵات و بەرتەییی [ﺇمتیاز] بووە بۆ دەستەبژێرە ڕامیارەكان و لەو نێوەشدا ڕۆڵی تاكی جوتیار و كرێكار و زەحمەتكێش؛ ڕۆڵی مێگەل بووە بۆ ڕەوایەتییدان بە شوانەیی ڕامیارەكان و ھیچی دیكە ! بەداخەوە لەنێو بزاڤی سۆشیالیستییدا، وردەبۆرجوازی خۆشباوەڕ بە دێمۆكراسی پارلەمانی، لە پاش تێكشكانی ڕاپەڕینی پاریس [كۆمونە] و لەباربردنی ڕاپەڕینی ئۆكتۆبەری ١٩١٧ەوە، توانیوویەتی ھەژموونی ئایدیۆلۆجی خۆی لەسەر وێرانەی تێكشكانی بەرەی شۆڕش دابنێت و پووچگەرایی “مافی دەنگدانی گشتی” لە سایەی دێمۆكراسی پارلەمانیدا، بە دەستكەوتی مێژوویی ھەژماربكات ! بەبۆچوونی من، كاتی ئەوە ھاتووە، كە ئەو پووچگەراییە بخرێتە خانەی تەرسەقولی ڕامیارییەوە و ڕادیكاڵانە وەڵامی پاگەندەكەرانی بدرێتەوە.

ئەی چارە، ئایا بایكۆت بە تەنیا دەتوانێت چارەسەربێت ؟ ئایا ھەموو بایكۆتكردنەكان ھاوئامانج و ھاوڕەوت و ھاوئاراستەن؟

وەك دەزانین، لە سیستەمی ھەڵبژاردنی نوێنەرایەتییدا، ئەوەی كە بە “دێمۆكراسی” ناسێنراوە، سەرەتا دەنگدان و ھەڵبژرادنیش وەك خۆھەڵبژرادن، پابەندی بوونی پێگەی باڵای ئابووریی و كۆمەڵایەتی و بڕێكی دیاریكراو سامان و سەرمایە بووە، ھەروەك چۆن ئەمڕۆكە خۆھەڵبژاردن بۆ ھەمووان لەبار و بواردراو نییە، ھەرواش جاران، دەنگدان و ھەڵبژاردن، تەنیا مافی كەمایەتی خۆشگوزەران و ساماندار و سەرمایەداربووە .

ھەروا كە دەنگدان و دیاریكردنی سەروەرێك بەھۆی نەبوونی ھوشیاریی شۆڕشگێڕانەوە لەلایەن بندەستانی كۆمەڵگەوە وەك مافێك وێناكراوە و چەندین دەھە و تەنانەت سەدەش تێكۆشانی بۆ كراوە و سەرەنجامیش ئەو گاڵتەجاڕییەی بەرھەمھێناوە، كە ئەمڕۆكە كۆیلانی سەرمایەداری بۆ بەدەسەڵاتگەیاندنی سەروەرانیان سنگی یەكدی ھەڵدەدڕن، ھەرواش بایكۆتی ناھوشیارانە ناتوانێت ھەنگاوێك بەرەو پێشەوەمان بەرێت، چونكە بە یاساكانی سەروەریی ڕامیاران و سەرمایەداران، كورسییە دەنگپێنەدراوەكانی پارلەمان، بەسەر براوەكانی گاڵتەجاریی نوێنەرایەتییدا دابەشدەكرێن. لەبەرئەوە تەنیا بایكۆتكردنی ئازادیخوازانە تەنیا بە ئەڵتەرناتیڤەوە دەتوانێت گۆڕان دروستبكات و پایەكانی سیستەمی سەركوت و نایەكسانی و نادادوەریی مۆلەقبكات !

لەبەر ڕۆشنایی ئەو وانە مێژووییانەدا، كە بەرەنجامی خەبات و پێكدادانی چەند سەدەی ژێردەستان و سەروەران بوون ، ئەوڕۆكە بایكۆتكردنیش جۆر و ئامانجی جیاوازی بزووتنەوە كۆمەڵایەتی و ڕامیارییەكانی لەخۆگرتووە؛ بۆ نموونە چەپ بە گلەییكردن لە مەرجەكانی خۆكاندیدكردن، بۆ قۆستنەوەی دەنگی ناڕەزایەتی تاكە دەنگنەدەرەكان، دروشمی بایكۆتكردن بەرزدەكاتەوە، زۆرێك لە ناڕازییانی نائومێد وەك نادەربەستییەك بایكۆتی دەنگدان دەكەن، لە بەرامبەر دوو دەستەی یەكەم و دووەمدا، دەستەیەك لە ناڕازییانی ھوشیار و ئازادیخواز، ئامانجدارانە و بە ئەڵتەرناتیڤەوە بایكۆتی دەنگدان دەكەن؛ دەنگدان ڕەتدەكەنەوە، لەبەرئەوەی كە ھیچ ناگۆرێت، نەك لەبەرئەوەی كە خۆیان كاندیدناكەن یا بواری بەشداری كایەی پارلەمانیان پێنادرێت، كە ئەوڕۆكە چەپ بە ھەموو جۆر و ناو و پاگەندەكانییەوە، گلەیی لە جۆری كاندیدكردن و جۆری ھەڵمەتی ھەڵبژاردن و جۆری بەشداریكردنی دەسەڵات ھەیە، نەك لە خودی گاڵتەجاڕییەكە، كە ھەڵبژاردنی خراپە لە خراپتر !

ئەوەی ئەوڕۆكە لە ھەرێمی كوردستاندا دەگوزەرێت، ھەرسێ دەستەكەی لە ھەناوی خۆیدا پەروەراندووە و ھەر یەكە لە ڕوانگەی خۆیەوە خەریكە ھەڵوێستگیریی دەكات؛ ناسیونالیستانی ناڕازی، تەنیا گرفتیان لە بەرامبەر دەسەڵاتداران و ھەڵبژرادنەكاندا ئەوەیە، كە گەندەڵن و بواری ئەوان لە سەروەربووندا نەدراوە و پارتە زلھێزەكان، دەسەڵات و پارلەمانیان قۆرخكردووە و  ئەڵتەرناتیڤیان نوێنەرایەتی نیئۆلیبرالیزمە لە ھەرێمی كوردستاندا، كە لە باشترین باردا دەیانەوێت دێمۆكراسی پارلەمانی لە ھەرێمی كوردستاندا بگەیێنە ئاستی وڵاتانی ئەوروپا و ئەمەریكا.  لەبەرامبەر ئەوانیشدا چەپ و باڵەكانی لەسەر بنەمای ھەمان وردەگیریی ناسیونالیستەكان لە گەندەڵیی و قۆرخكردنی دەسەڵات و پارتە زلھێزەكان، لەو بڕوایەدان لە ھەڵبژرادنی [خۆیان واتەنی “عادیلانە”]دا ئەوان باشترین ئەڵتەرناتیڤ دەبن بۆ سەروەران و لە سایەی سەروەریی ئەواندا كۆیلەكانی كۆمەڵگە شاد و خۆشگوزەران دەبن و تەنیا دروشمێك كە چەپ لە دروشم و گلەیی ناسیونالیستەكان جیادەكاتەوە، دروشمی تەرسەقوڵاوی “جیایی ئایین لە دەوڵەت”ە [كاتێكی دیكە بە وردی دەگەڕێمەوە سەر ئەو پووچگەراییە ئایدیۆلۆجییە]، كە بێجگە لە كاوێژككردنەوەی ئایدیۆلۆجیی و دروسكردنی خۆشباوەڕیی لەتوانادابوونی (جیایی دەوڵەت لە ئایین) و نیشاندانی فریوكارانەی، ئەوەی كە گوایە ئەو دوو دوومەڵەی مێژووی مرۆڤایەتی [ئایین و دەوڵەت] لەتەك یەكدیدا ناكۆكن، ھیچی دیكەیان نەخستووەتە سەر پاگەندەی ناسیونالیستەكان و ھیچ جیاوازییەكان لەمەڕ چۆنیەتی ڕێكخستنی كۆمەڵگە و بنەمای ئابووریی و  پەیوەندییەكانی بەرھەمھێنان و دابەشكردن و بەرێوەبردن و ژیان و تەنانەت ئازادی تاكیش نییە !

بەبۆچوونی من، بایكۆتی ئازادیخوازانە لە ڕوانگەی ڕەتكردنەوەی دەسەڵاتی سەرووخەڵكییەوە، ناتوانێت ھەڵمەتێكی چەند ڕۆژەیی پێش دەنگدانەكان بێت و بەبێ ڕەتكردنەوەی سیستەمە چینایەتییەكە وەك گشتێك و میكانیزمەكانی و پایە سەرخانییەكانی كە پیرۆزیی ئایین و دوڵەت و دێمۆكراسی پارلەمانی و پایە ئابوورییەكانی؛ خاوەندارێتی تایبەت و كاریكرێگرتە، بایكۆتكردن ناتوانێت ھەنگاوێك كۆمەڵگە بەرەوپێشەوە بەرێت و خۆھوشیاریی تاك بۆ بایكۆتكردنی ھەڵبژاردنی خراپ لە خراپتر، لە ڕەوتی خەباتی شۆڕشگێڕانەی ڕێكخراو و سەربەخۆدا سەرھەڵدەدات. ھەروەھا كار و خەبات و چالاكی سۆشیالیستە ئازادیخوازەكان بۆ بایكۆتكردن و ڕەتكردنەوەی دێمۆكراسی پارلەمانی لە یەكەم ڕۆژی پاش بردنەوە و سەروەربوونی كۆمەڵێكی دیكە لە مشەخۆرانی ڕامیار تا دەگاتە ڕۆژی پێش خولی داھاتووی ھەڵبژاردن، دەستپێدەكات و ڕەتكردنە و بایكۆتكردنی ملدان بە سەروەریی چینایەتیی، تەنیا دەربڕین و ناڕەزایەتی زارەكی و دەنگنەدان نییە، بەڵكو یاخیبوونە لە سەراپای كۆیلەبوونمان؛ ھەر لە جۆری خواردن و پۆشاك و نیشتەجێبوون و كاركردن و پەیوەندی كۆمەڵایەتی و گوفتار و ڕەفتار و كولتوورمان تا دەگاتە بەرھەمھێنان و دابەشكردن و بەڕێوەبردن، دەگرێتەوە و بەبێ ھەنگاونانی كردەیی لە ھەموو بوارە ھونەریی و كولتووریی و ئابووریی و كۆمەڵایەتییەكان و پێشنیاركردن و جێخستنی ئەڵتەرناتیڤی سەربەخۆ و ئازادیخوازانە لەو بوارانەدا، پاگەندەی بایكۆتكردن دەچێتە خانەی فرەبڵێیی بێكردەوەی تۆڕە كۆمەڵایەتییەكان و چەنەبازیی ڕامیاران بۆ خۆناساندن وەك سەروەری باش !

لەبەرئەوە، پێویستە سۆشیالیستە ئازادیخوازەكان بە پێشنیاركردن و جێخستنی دێمۆكراسیی ڕاستەوخۆ، [كە ھەر لە كۆنەوە ئەڵتەرناتیڤی چەوساوان بووە لە بەرامبەر دێمۆكراسی داراكان (دێمۆكراسی پارلەمانی)دا] ھەر ڕۆژە و لە نێوەندی ژیان و كار و  خەباتی ڕۆژانەدا لە كۆڕ و كۆمەڵە كۆمەڵایەتییەكانیاندا لە گوند و گەڕەك و كارخانە و فێرگە و فەرمانگە و شارەكاندا، ھەنگاو بە ھەنگاو پیادەبكەن، بەوەی بۆ چارەسەری پرسە كۆمەڵایەتیی و ئابوورییەكانیان لە شوێنی كار و ژیانیاندا كۆبوونەوەی گشتی ڕێكبخەن و ڕێكخراوەی سەربەخۆ پێكبھێنن و دەست بۆ پرۆژەی ھەرەوەزیی كۆمەڵایەتی و ئابووریی بەرن و گروپ و ڕێكخراوە خۆجێی و جەماوەرییە سەربەخۆكانی خۆیان دوور لە ھەژموون و پیلانی پارت و فەرمانڕەوایان پێكبھێنن و كەرتە كشتوكاڵیی و پیشەسازییەكان، زەوی بە زەوی و كارگە بە كارگە لە دەسەڵاتداران و سەرمایەداران بستێننەوە و بەكردەوە و لە كەتواری ژیانی ڕۆژانە و كۆمەڵایەتییدا پێویستنەبوون و زیانبخشبوونی دەسەڵات و فەرمانڕەوایی سەرووخەڵكی و دێمۆكراسی پارلەمانی و  گاڵتەجاڕیی ھەڵبژاردنی سەروەر و مشەخۆری باش، بخەنەڕوو  و بیسەلمێنن !

بەكورتی بایكۆتكردن بە مەبەستی پاگەندەی ڕامیاریی و قۆستنەوەی ھەلپەرستانەی ناڕەزایەتی جەماوەر بەرامبەر پارتەكان و دەسەڵاتداران نییە، بەڵكو بریتییە لە كاری بەردەوام و ڕاستەخۆ لەسەر ڕای گشتی بە ئامانجی گێڕانەوەی متمانەی تاك بە ھێز و توانای خۆی و كارایی یەكگرتنی ئەو ھێز و توانایە. بایكۆتكردن تەنیا كاری چەند ڕۆژێك نییە، بەڵكو كولتوورییكردنەوەی متمانەی كۆمەڵایەتی تاكە بەخۆی و یەكێتی چینایەتی و ھێزی ئازادیخوازانەی خۆی و ھاودەردەكانی، پرۆسێسێكی درێژخایەنی چەند ساڵەیە، كە لە دوای ھەڵبژاردنەكانەوە دەستپێدەكات و لە ھەڵمەتی ھەڵبژاردنەكاندا بە ھەڵمەتێكی دژەتەوژم، سەنگەربەندیی كۆمەڵایەتی ژێردەستان بەڕووی دەسەڵاتی ڕامیاریی و ھەوڵی دەسەڵاتخوازانەی ڕامیارەكاراندا ھەڵدەخرێنێت و  یەكدەخات. لەبەرئەوە بۆ بەئامانجگەییشتنی وەھا كار و چالاكییەك، پێویستە لە خۆمانەوە، لە نێوەندی پەیوەندییە كۆمەڵایەتییەكانمانەوە، لە شوێنی كار و خوێندن و ژیانمانەوە، لە خەبات و ناڕەزایەتی ھەر ڕۆژەمانەوە، لە دەركەوتنی ھەر ساتەی ڕووی ڕاستەقینەی درۆی پارلەمانتارەكانەوە، لە پیادەركردنی ھەر ڕۆژەی یاسا دژە جەماوەرییەكانەوە، ھەنگاوی ئامانجدارانە بۆ ھەڵخرانی ھێزی دژەتەوژم بۆ نۆرەی داھاتووی ھەڵبژاردنەكان بنێین و ھەر ساتە و لە ھەموو بوارێكی كۆمەڵایەتییدا، دێمۆكراسیی ڕاستەوخۆ (خۆبەڕێوەبەرایەتی گەلیی / ڕێكخستنی كاروبارەكانی ژیانمان بەخۆمان و لەنێو خۆمان و لەلایەن خۆمانەوە) پیادەبكەین و بیكەینە بەردی بناخەی كولتووری ھەرەوەزیی كۆمەڵایەتیی، بەمەبەستی بەرەنگاریی و ڕێگرییكردن لە تەشەنەی ڕامیاری [وەك نەخۆشییەكی ھاوچەرخی كۆمەڵایەتی] لە پەیوەندی و ژیانی كۆمەڵایەتییدا، بیكەینە بناخەی ڕێكخستنی ھەموو پەیوەندییە تاكەكەسیی و كۆمەڵییەكانمان، بەواتایەكی دیكە كۆمەڵایەتییكردنەوەی ھەموو ئەو پرسانەی، كە لەلایەن پارتەكان و دەسەڵاتدارانەوە بە پلانڕێژیی نێوەندە جیھانییەكانی نیئۆلیبرالیزمەوە، ڕامیاریی كراون و دەكرێن و دەخرێنە دەستی كەمینەیەكی سەرووخەڵكییەوە.

Boçî pêwîste dengdanekan baykotbkeyn?

 

Hejên

11î sêptemberî 2013

Dêmokrasî çi bewata klasîkekey û çi bewatay azadî tak le sayey serwerîy çînayetîda, tenya droyekî pîrozkrawe û bes, çunke dêmokrasî bewatay xoberrêweberayetî gel, cemawer, hemû takekanî komell, tenya rastewxo detwanêt bûnî hebêt û narrastewxokirdnî û awejûkirdnewey be nwênerayetî destebjêrêkî ramyar û ekadêmî û sermayedar, tenya dîktatorî kemîney serwer desteberdekat !

Leberewe hellbjardin bo dengder, core qumarêke û têyda dengder  her çwar sall carêk, mafî rakêşanî kartêkî her dû dîw wekyekî heye, bo ewey ramyarêk [desellatixwazêk] bkate serwerî xoy, bextî birdnewey ew qumare le bextî birdnewey yarî bext (lotorî) ke le çend milyonda yeke, kemtir û lawaztre, bellam bo dengipêdraw mîkanîzmî msogerkirdnî bedestihênanî kursî parleman [dîwaxanî mşexoran] û desellat û mşexorîye.

Ewî xwazyarî dêmokrasîye, pêwîste erk û xebatî wergêrranewey dêmokrasî lingewquçkraw bo ser laqekanî le estobgirêt û hewllî pyadekirdin û be kultûrkirdnî dêmokrasî rastewxo le şwênî kar û jyan, le hemû bwarekanî rêkxistin û berêwebirdin û berhemhênan û dabeşkirdin û birryardanda bdat, bewatayekî dîke xebat bo bedîhênan û cêkewtebûnî dêmokrasî rastewxo (berrêweberayetî gelîy) wek kultûrêk, bkat.

Eger xoman le gêllî bdeyn û naderbestane birrwa bexoman bhênîn, ke hellbijêrdrawanî parlemantar xizmetkarî komellgen û bo ew mebeste xoyan kandîdkirduwe û deken, ewa pêwîste ewe leberçawbigrîn, ke xizmetkirdin kar û çalakîyekî komellayetîy bêpadaşt [bêberamber]e û watay karî xobexşaney tak bo hawell û hawkaran û komellge degeyênêt û lew bareda debêt parlemantaran wek xokandîdkeran bo xizmetî komellge bebê mûçe wek karî xobexiş û xokomekî, destbekarbbin. Eger wek her karêkî asayî komellayetîş boy destbekardebin, ewa hîç kat nabêt padaştî weha karêk le kare komellayetîyekanî dîke zyatir bêt . Bellam aya hîç partêk, hîç kandîdêk, hîç ramkarêk, hîç desellatdarêk, amadeye xobexşane û bebê padaşt û mûçey paşayane û xanenşînî, mşe kar bo komellge bkat, ya aya hîç yek lewaney ke pagendey xizmetkirdnî komellge deken, amaden [be mûçeşewe] yek xulek [nek çwar sall] krêkarî şarewanî bin û kollan û şeqam û baxçe û awerrokanî gund û şar xawênbkenewe, aya amaden le fêrge û nexoşxane û nşîngey pîrsallan û baxçey sawayan û kemendaman û lêqewmawanda xawênkirdnewe û serperşitî û aşpezîy bken ? Îdî mebestîyan le xizmetkirdin çîye û  boçî debêt çenebazîy û bawêşkdanî ewan le parlemanda dû milyon dînar mûçe û xanenşînîy hetahetayî bêt ?

Hellbete eme dîwêkî pirsekeye û ewaney ke emrroke be hendê wirdegîrîy desellatixwazanewe baykotî xohellbjardin û dengdan deken û eger bwarîyan hebuwaye û singekutanyan bo dekrid, hîç kat purtubolleyan le napakîy hellbjardnekan, nayanxate rîzî narrazîyanî şorrşigêrrewe, ewan rexneyan le desellatî serûxellkî nîye, bellku xoyan be şyawtirîn dîktator bo berêwebirdnî komellge debînin. Leberewe pêwîste rîz û şêwazî baykotî xoman le bollebollî desellatixwazaney ewan cyabkeynewe !

Herçende le sayey serwerîy hendêk beser hendêkî dîkeda, maf û azadî û serbexoyî û yeksanî û dadperwerîy  pûçtirîn û kewillkrawtirîn û dêwcametrîn wajen, bellam eger lewe bguzerêyn û be grîmane werîbgirîn, ke dengdan û hellbjardinî mşexoran û serweran mafî tak bêt, ewa be heman locîk pêwîste baykotkirdnî hellbjardinîş, mafî rewa û bêçenduçûnî tak her komellgeyek bêt !

Her bepêy azadî rwalletîyaney dengdan û hellbjardin û ewey ke bepêy hejmarî danîştuwan, sindûqekanî dengdan dyarîdekrên û hejmarî nwêneran [parlemantaran] dyarîdekrêt, ewa herwa ke dengderan mafî eweyan heye, komellêk desellatixwaz û mşexor bxene ser kursîyekanî parleman, herwaş dengnederan mafî eweyan heye, ew kursîyaney, ke be hejmarî dengî ewanewe peywestin û dengyan pênedrawe, be xallî bhêllnewe û boşayî le desellatî serûxellkîda drustibken ! Aya dêmokrasî parlemanî le lankeyewe ta dwa wllatî parlemanîkraw, bwarî peyrrewkirdnî mafî dengnederan dedat? Eger wellamî layengranî dêmokrasî parlemanî eweye, ke her kes beşdarînekat û ew hele ledestibdat û mafî birryardanî nîye, ewa ew wellame ewe deselmênêt, ke dêmokrasî parlemanî le baştirîn barda pûçtirîn xewnî mrovî nahuşyare û le xraptirîn barîşda amrazî bedesellatgeyîştinî komellêk [destebjêrî ramyar] mşexor û desellatixwaze û mafî dengdan, heman rollî êsqanêkî rutawey heye, ke qesabêk frrêydeddate berdem segêk bo pasewanîkirdnî xoy !

Ta êre, ne sîstemî serwerîy û mşexorîy destebjêrî ramyar detwanêt dêmokrasî [fermanrrewayetî gel] bêt û ne dengdan; maf û azadîye û ne parlemantaran; xizmetkarî komellgen û ne hemû takekan; dengnederan le beramber dengderan yeksanin û ne dengderan; kar û fermanrrewayetî paş hellbjardin dyarîdeken !

Serencam ne dêmokrasî parlemanî eweye, ke takî jêrdest û bêbeş xewnî pêwedebînêt û  ne mafî dengdanîş destkewtî mêjûîy çewsawane û ne druşmî mafî dengdan bo hemuwan le hîç serdemêkda şorrşigêrrane buwe ! Çunke le katêkda ke dengdanî giştî lêdanbuwe le şan û şkoy axakan û begekan û xanzadekan, hawkatîş amrazêk buwe bo serkewtinî borcwa şarîyekan berew desellat û berteyîy [ﺇmityaz] buwe bo destebjêre ramyarekan û lew nêweşda rollî takî cutyar û krêkar û zehmetkêş; rollî mêgel buwe bo rewayetîydan be şwaneyî ramyarekan û hîçî dîke ! Bedaxewe lenêw bzavî soşyalîstîyda, wirdeborcwazî xoşbawerr be dêmokrasî parlemanî, le paş têkişkanî raperrînî parîs [komune] û lebarbirdnî raperrînî oktoberî 1917ewe, twanîwuyetî hejmûnî aydyolocî xoy leser wêraney têkişkanî berey şorrş dabnêt û pûçgerayî “mafî dengdanî giştî” le sayey dêmokrasî parlemanîda, be destkewtî mêjûîy hejmarbkat ! Beboçûnî min, katî ewe hatuwe, ke ew pûçgerayye bixrête xaney tersequlî ramyarîyewe û radîkallane wellamî pagendekeranî bidrêtewe.

Ey çare, aya baykot be tenya detwanêt çareserbêt ? Aya hemû baykotkirdnekan hawamanc û hawrrewt û hawarasten?

Wek dezanîn, le sîstemî hellbjardinî nwênerayetîyda, ewey ke be “dêmokrasî” nasênrawe, sereta dengdan û hellbijradnîş wek xohellbijradin, pabendî bûnî pêgey ballay abûrîy û komellayetî û brrêkî dyarîkraw saman û sermaye buwe, herwek çon emrroke xohellbjardin bo hemuwan lebar û bwardraw nîye, herwaş caran, dengdan û hellbjardin, tenya mafî kemayetî xoşguzeran û samandar û sermayedarbuwe .

Herwa ke dengdan û dyarîkirdnî serwerêk behoy nebûnî huşyarîy şorrşigêrranewe lelayen bindestanî komellgewe wek mafêk wênakrawe û çendîn dehe û tenanet sedeş têkoşanî bo krawe û serencamîş ew galltecarrîyey berhemhênawe, ke emrroke koylanî sermayedarî bo bedesellatgeyandinî serweranyan singî yekdî helldedrrin, herwaş baykotî nahuşyarane natwanêt hengawêk berew pêşeweman berêt, çunke be yasakanî serwerîy ramyaran û sermayedaran, kursîye dengipênedrawekanî parleman, beser brawekanî galltecarîy nwênerayetîyda dabeşdekrên. Leberewe tenya baykotkirdnî azadîxwazane tenya be ellternatîvewe detwanêt gorran drustibkat û payekanî sîstemî serkut û nayeksanî û nadadwerîy moleqbkat !

Leber roşnayî ew wane mêjûyyaneda, ke berencamî xebat û pêkdadanî çend sedey jêrdestan û serweran bûn , ewrroke baykotkirdnîş cor û amancî cyawazî bzûtnewe komellayetî û ramyarîyekanî lexogirtuwe; bo nmûne çep be gleyîkirdin le mercekanî xokandîdkirdin, bo qostnewey dengî narrezayetî take dengnederekan, druşmî baykotkirdin berizdekatewe, zorêk le narrazîyanî naumêd wek naderbestîyek baykotî dengdan deken, le beramber dû destey yekem û duwemda, desteyek le narrazîyanî huşyar û azadîxwaz, amancdarane û be ellternatîvewe baykotî dengdan deken; dengdan retdekenewe, leberewey ke hîç nagorêt, nek leberewey ke xoyan kandîdnaken ya bwarî beşdarî kayey parlemanyan pênadrêt, ke ewrroke çep be hemû cor û naw û pagendekanîyewe, gleyî le corî kandîdkirdin û corî hellmetî hellbjardin û corî beşdarîkirdnî desellat heye, nek le xudî galltecarrîyeke, ke hellbjardinî xrape le xraptir !

Ewey ewrroke le herêmî kurdistanda deguzerêt, hersê destekey le henawî xoyda perweranduwe û her yeke le rwangey xoyewe xerîke hellwêstigîrîy dekat; nasîwnalîstanî narrazî, tenya griftyan le beramber desellatdaran û hellbijradnekanda eweye, ke gendelln û bwarî ewan le serwerbûnda nedrawe û parte zilhêzekan, desellat û parlemanyan qorixkirduwe û  ellternatîvyan nwênerayetî nîolîbralîzme le herêmî kurdistanda, ke le baştirîn barda deyanewêt dêmokrasî parlemanî le herêmî kurdistanda bgeyêne astî wllatanî ewrupa û emerîka.  Leberamber ewanîşda çep û ballekanî leser bnemay heman wirdegîrîy nasîwnalîstekan le gendellîy û qorixkirdnî desellat û parte zilhêzekan, lew birrwayedan le hellbijradnî [xoyan watenî “‘adîlane”]da ewan baştirîn ellternatîv debin bo serweran û le sayey serwerîy ewanda koylekanî komellge şad û xoşguzeran debin û tenya druşmêk ke çep le druşm û gleyî nasîwnalîstekan cyadekatewe, druşmî tersequllawî “cyayî ayîn le dewllet”e [katêkî dîke be wirdî degerrêmewe ser ew pûçgerayye aydyolocîye], ke bêcge le kawêjkkirdnewey aydyolocîy û druskirdnî xoşbawerrîy letwanadabûnî (cyayî dewllet le ayîn) û nîşandanî frîwkaraney, ewey ke gwaye ew dû dûmelley mêjûy mrovayetî [ayîn û dewllet] letek yekdîda nakokin, hîçî dîkeyan nexistuwete ser pagendey nasîwnalîstekan û hîç cyawazîyekan lemerr çonyetî rêkxistinî komellge û bnemay abûrîy û  peywendîyekanî berhemhênan û dabeşkirdin û berêwebirdin û jyan û tenanet azadî takîş nîye !

Beboçûnî min, baykotî azadîxwazane le rwangey retkirdnewey desellatî serûxellkîyewe, natwanêt hellmetêkî çend rojeyî pêş dengdanekan bêt û bebê retkirdnewey sîsteme çînayetîyeke wek giştêk û mîkanîzmekanî û paye serxanîyekanî ke pîrozîy ayîn û dullet û dêmokrasî parlemanî û paye abûrîyekanî; xawendarêtî taybet û karîkrêgirte, baykotkirdin natwanêt hengawêk komellge berewpêşewe berêt û xohuşyarîy tak bo baykotkirdnî hellbjardinî xrap le xraptir, le rewtî xebatî şorrşigêrraney rêkixraw û serbexoda serhelldedat. Herweha kar û xebat û çalakî soşyalîste azadîxwazekan bo baykotkirdin û retkirdnewey dêmokrasî parlemanî le yekem rojî paş birdnewe û serwerbûnî komellêkî dîke le mşexoranî ramyar ta degate rojî pêş xulî dahatûy hellbjardin, destipêdekat û retkirdne û baykotkirdnî mildan be serwerîy çînayetîy, tenya derbrrîn û narrezayetî zarekî û dengnedan nîye, bellku yaxîbûne le serapay koylebûnman; her le corî xwardin û poşak û nîştecêbûn û karkirdin û peywendî komellayetî û guftar û reftar û kultûrman ta degate berhemhênan û dabeşkirdin û berrêwebirdin, degrêtewe û bebê hengawnanî kirdeyî le hemû bware hunerîy û kultûrîy û abûrîy û komellayetîyekan û pêşnyarkirdin û cêxistnî ellternatîvî serbexo û azadîxwazane lew bwaraneda, pagendey baykotkirdin deçête xaney frebllêyî bêkirdewey torre komellayetîyekan û çenebazîy ramyaran bo xonasandin wek serwerî baş !

Leberewe, pêwîste soşyalîste azadîxwazekan be pêşnyarkirdin û cêxistnî dêmokrasîy rastewxo, [ke her le konewe ellternatîvî çewsawan buwe le beramber dêmokrasî darakan (dêmokrasî parlemanî)da] her roje û le nêwendî jyan û kar û  xebatî rojaneda le korr û komelle komellayetîyekanyanda le gund û gerrek û karxane û fêrge û fermange û şarekanda, hengaw be hengaw pyadebken, bewey bo çareserî pirse komellayetîy û abûrîyekanyan le şwênî kar û jyanyanda kobûnewey giştî rêkbxen û rêkixrawey serbexo pêkbihênin û dest bo projey herewezîy komellayetî û abûrîy bern û grup û rêkixrawe xocêy û cemawerîye serbexokanî xoyan dûr le hejmûn û pîlanî part û fermanrrewayan pêkbihênin û kerte kiştukallîy û pîşesazîyekan, zewî be zewî û karge be karge le desellatdaran û sermayedaran bistênnewe û bekirdewe û le ketwarî jyanî rojane û komellayetîyda pêwîstnebûn û zyanbxişbûnî desellat û fermanrrewayî serûxellkî û dêmokrasî parlemanî û  galltecarrîy hellbjardinî serwer û mşexorî baş, bxenerrû  û bîselmênin !

Bekurtî baykotkirdin be mebestî pagendey ramyarîy û qostnewey helperistaney narrezayetî cemawer beramber partekan û desellatdaran nîye, bellku brîtîye le karî berdewam û rastexo leser ray giştî be amancî gêrranewey mitmaney tak be hêz û twanay xoy û karayî yekgirtnî ew hêz û twanaye. Baykotkirdin tenya karî çend rojêk nîye, bellku kultûrîykirdnewey mitmaney komellayetî take bexoy û yekêtî çînayetî û hêzî azadîxwazaney xoy û hawderdekanî, prosêsêkî drêjxayenî çend salleye, ke le dway hellbjardnekanewe destipêdekat û le hellmetî hellbjardnekanda be hellmetêkî djetewjim, sengerbendîy komellayetî jêrdestan berrûy desellatî ramyarîy û hewllî desellatixwazaney ramyarekaranda helldexrênêt û  yekdexat. Leberewe bo beamancgeyîştinî weha kar û çalakîyek, pêwîste le xomanewe, le nêwendî peywendîye komellayetîyekanmanewe, le şwênî kar û xwêndin û jyanmanewe, le xebat û narrezayetî her rojemanewe, le derkewtinî her satey rûy rasteqîney droy parlemantarekanewe, le pyaderkirdnî her rojey yasa dje cemawerîyekanewe, hengawî amancdarane bo hellixranî hêzî djetewjim bo norey dahatûy hellbjardnekan bnêyn û her sate û le hemû bwarêkî komellayetîyda, dêmokrasîy rastewxo (xoberrêweberayetî gelîy / rêkxistinî karubarekanî jyanman bexoman û lenêw xoman û lelayen xomanewe) pyadebkeyn û bîkeyne berdî bnaxey kultûrî herewezîy komellayetîy, bemebestî berengarîy û rêgrîykirdin le teşeney ramyarî [wek nexoşîyekî hawçerxî komellayetî] le peywendî û jyanî komellayetîyda, bîkeyne bnaxey rêkxistinî hemû peywendîye takekesîy û komellîyekanman, bewatayekî dîke komellayetîykirdnewey hemû ew pirsaney, ke lelayen partekan û desellatdaranewe be planrrêjîy nêwende cîhanîyekanî nîolîbralîzmewe, ramyarîy krawn û dekrên û dexrêne destî kemîneyekî serûxellkîyewe.

سورانەی سەردەم

شوێن : ژوورێكی ئاسایی، لە‌‌لای ڕاستەوە لاوێك لە‌سە‌ر كورسییە‌ك، لەبەردەم مێزێكی نووسین دانیشتووە، گلۆپێك لە ‌ڕاسە‌ری كزدە‌سووتێت. لە‌لای چەپەوە تابلۆ‌یەكی كیمیابارانی هەڵەبجە و ئەنفال هەڵواسراوە و دەزگەیەكی تێلە‌فۆن بە‌رچاودە‌كە‌وێت. ‌[موزیكێكی ئارام دێتەگوێ] لاوە‌كە‌ نووقمی دە‌ریای خە‌یاڵ بووە و چاوی بڕیوە‌تە‌ خاڵێك لە‌سەر دیوارە‌كەی بە‌رامبە‌ری. سە‌رێكی پێنووسە‌كەی بە‌ددان گرتووە ‌و بە‌دە‌ستی یاری بە ‌پێنووسە‌كە‌‌ دە‌كات. [لە‌م بارە‌دا ماوە‌یە‌ك دە‌مێنێتە‌وە‌] لە‌پڕ وە‌ك لە‌ خە‌و ڕابووبێت، دە‌ستێك بە ‌پرچە ئالۆزكاوە‌كە‌یدا دەھێنێت و سە‌یری دیوارە‌كانی دە‌ورو‌بە‌ری دە‌كات ‌و وەك پەسەندكردنی ئەوەی بە خەیاڵیدادێت، سە‌ری دە‌لە‌قێنێت.

وە‌ك گرێكوێرە‌ی كردبێتە‌وە، بە‌پرتاو پێنووسە‌كە‌ی دە‌گرێتە دە‌ست‌ و دە‌ستبە‌نووسیندە‌كات. لە‌تەك داڕشتنی وشە و ڕستە‌كان دە‌ستە‌كە‌ی دیكەی گرمۆڵەدە‌كات ‌و گرژی دە‌روونی لە‌هێڵەكانی نێوچەوانیدا دە‌ردە‌كە‌وێت، چە‌ندجارێك شتێك دە‌نووسێت و پە‌رە‌ كاخە‌زە‌كان دە‌دڕێنێت، [هە‌ستانە‌وە‌یە‌كی كتوپر، چە‌ند جار هاتووچوون لە‌م سە‌رە‌وە‌ بۆ ئە‌وسە‌ری ژوورە‌كە]‌. لە‌پڕ بزە‌یە‌ك هێڵە‌گرژە‌كانی نێوچە‌وانی دە‌سڕێتە‌وە، هە‌ردوو دە‌ستی بە‌هێمای دۆزینە‌وە‌ی شتێك پێكدادە‌دات. لە ‌شێوە‌ی سە‌مادا لە‌ دە‌وری خۆی دە‌سوڕێتە‌وە‌ و دووبارە‌ پێنووسە‌كە‌ی دە‌گرێتە‌وە‌دە‌ست. لەتەك بە‌رزبوونە‌وە‌ی موزیكە‌كە ڕەوتی نووسینەكەی خێراتر دەبێت، هە‌روە‌ك ئەوەی كە لە‌سە‌ر ئاوازی موزیكە خەریكی ھۆنینەوەی ئارە‌زووە‌كانی بێت.

[لەپڕ زە‌نگی تێلە‌فۆن ڕایدە‌چڵە‌كێنێت، وە‌ك ئەوەی دە‌مێك بێت، كە چاوە‌ڕێی ئە‌و زە‌نگە‌ بێت، بە‌پە‌لە خۆی دە‌گە‌یێنێتە‌ لای تێلە‌فۆنە‌كە]

لا‌وە‌كە : بە‌ڵێ. ئارام [ دە‌نگی ‌كچێك ] دەبیسترێت

دەنگەكە : ئە‌لو .. ئە‌لو ( دە‌نگە‌كە دوور دیارە)

ئارام : [ پاش هە‌ڵوێستە‌یە‌كی كورت، وە‌ك بڵێی دە‌نگە‌كە ناناسێت]

دەنگەكە : ئە‌لو .. ئارام

ئارام‌ : [ وەك بوژانەوەیەك، بەخۆیدا دێتەوە] : ئازیز گیان تۆیت، ‌چۆنیت، گوڵە‌كە‌م‌؟ ئە‌وە لە‌كوێوە، كچی ئاسمان؟

دەنگەكە : لێرە‌م.

ئارام : [ئارامی لێهەڵدەگیرێت، بە‌دە‌م دووانە‌وە هاتووچۆ دە‌كا و دە‌ست ڕادە‌وە‌شێنێت] لێرە ! چۆن هاتی، كەی؟

دەنگەكە : ئە‌وە‌ چی دە‌ڵێی ! من لێرە‌م، لە‌ سولێمانی.

ئارام : [ دووبارە دەگەڕێتەوە سەرباری پێشووی] خە‌نی بووم، وامزانی …

دەنگەكە : واتزانی چی، ئە‌ی بڕیار نییە، خۆت بەدوامدا بێیتە‌وە ؟

ئارام‌ : ئای بە‌دبە‌ختی، خۆ منت كوشت، نە‌دە‌نگ ‌و نە‌ڕە‌نگ !

دەنگەكە : لە خۆت بپرسە، من هە‌ردە‌م چاوە‌ڕێم. كە‌چی تۆش، دەڵیی ئێمە‌ت لە‌بیرنە‌ماوە ؟

ئارام : ئەمە چییە؟ من بە‌ردە‌وام نامەت بۆ دە‌نووسم، ئاگادارت دە‌كەمەوە كە ‌بۆچی نە‌هاتوومەتەوە. ئاخر سە‌فە‌ر بووە بە یاری قومار و من ناتوانم. خۆت دە‌زانیت هە‌ر ڕۆژە‌ و لە‌شكری وڵاتێك كێشدە‌كە‌نە سولەیمانی و هە‌ولێر، تۆ دە‌توانی تە‌نیا سە‌فە‌ربكە‌ی.

دەنگە‌كە : چۆن ، لەتەك كێ ؟ دەڵێی لەبیرتچووە، كە لێرە كچ بۆی نییە تەنیا سەفەربكات، یاسا ڕێگەنادات !

ئارام : ئاخ، لەتەك كەسێك دەربازبە، من بەخۆم لە‌م بە‌ری سنوور چاوە‌ڕێت دە‌كە‌م …

دەنگە‌كە : ئاخر من چۆن لە‌و هە‌موو بازرگە‌ و ڕاوە‌تاژییە ڕزگارمدە‌بێت ؟

ئارام : تۆش وە‌ك هەمووان، دە‌بێت سوورانە بدە‌ی. پێمبڵێ، ئێستاكە چ دە‌كە‌ی‌، ورە‌ی جارانت ماوە؟ لە ئەتك ‌‌و ڕادوونانی جەنگی نێوخۆدا بەرنەكەووتوی ؟

دەنگە‌كە : تا ئێستاكە نا، بەڵام وە‌ختە شێتبم. بەگیانی تۆ لە‌مە زیاتر توانام نییە. وە‌رە ڕزگارمبكە ! دووری تۆ و شە‌ڕ و شۆڕ. هە‌موو ڕۆژێك لە‌ ڕێی كارگە تا دە‌گە‌مە‌وە ماڵ، چاوە‌ڕوانی مە‌رگ دە‌كە‌م. ئاخر تۆ نازانی بارودۆخە‌كە چۆنە‌! هە‌ر كە‌سە ‌و خوا‌خوایە‌تی دە‌رچێ ‌و ڕزگاریبێت. بە‌ڵام توانای دە‌وێت. تۆ بۆم بنووسە، من چیبكە‌م، چۆن بگە‌مە لای تۆ‌؟ بە‌س تە‌نیا جارێكی دیكە بتبینمە‌وە‌. ئیدی ھیچم ناوێت. شادومان دە‌بم، گە‌ر لە ئامێزی تۆدا بمرم. ئای لە تەنیایی و خۆخواردنەوە. خەیاڵ، تاسەم ناشكێنێت. وەختە لە ئاگری …. دەسووتێم و ئاگر لەبیرەوەرییەكانم بەردەدات. ڕۆژانە هەزاران جار حەزەكانم زیندەبەچاڵدەكەم و جەلادی عیشق كفنیان بەباڵادەبرێت و بایەقوشێك بە منارەی مزگەوتێكەوە وێرد و ستایشی بێگەردییان دەخوێنێت. چ ڕۆژگارێكە تێیكەوتین ؟

ئارام : خۆت ڕاگرە، من لە تۆ خراپتر. ئاخر ئە‌گە‌ر تۆ دێوە‌زمە‌ی تە‌نیایی خەریكبێت ڕاوتبكات، ئە‌وا منی قووت داوە! من لە‌ هە‌ناو‌یدا شە‌ڕی هاتنەدە‌رە‌وە دە‌كە‌م، لەتەك نائومێدی دەست و پەنجە نەرمدەكەم. دڵنیابە گوڵەگیان! من لە‌ تۆ حاڵم شڕترە. مە‌گە‌ر بگەیتە لام بۆتی باسكە‌‌م، بێتۆیی واتای چییە! خە‌می تۆ و باری ئە‌و خە‌ڵكە‌، خە‌وی لێزڕاندووم. (٣١)ی ئاب‌ تە‌مابڕتبووم‌. بە‌ڵام هیوام پێتە ئە‌م جارە‌ش دە‌ستبخە‌ینە‌وە نێودە‌ستی یەك، تا لە‌ شە‌وێكی بێهاوتادا لە‌بە‌ر ڕووناكی مانگەشە‌ودا، لە كەناری ڕووباری (ڕاین) خەمەكان بدەینەدەم شەپۆلە سەرشێت و یاخییەكان، قاقڕی ئەم ساڵانە بە ماچ پاراوبێ و سێبەری لێكئاڵاومان بەدەم جریوەی ئەستێرەكانەوە سە‌مابكا و دەنگدانەوەی قاقای پێكە‌نینمان سنوورە‌كان ببڕێت.

دەنگە‌كە : چییە دە‌ڵێی بووی بە‌ ھۆنەر‌‌؟ ئای كە ‌نامە‌كانت‌ چە‌ندە ئارامبە‌خشن.
ئارام : كچێ ئاخر ئە‌وینی تۆ مرۆڤ دە‌كاتە باڵدارێكی بەرزەفڕ. هە‌میشە لە‌ هۆشمدا ئاوازی دوانت موزیكێكی جادوویییە و وشە‌كان لە‌ مێشكمدا دانە‌دانە دەهۆنێتە‌وە، دەنگت لە گوێمدا دەنگدەداتەوە و كێش ‌و سە‌روا بە خەیاڵەكانم دە‌بە‌خشێت. تە‌نیا كاتێ ئارامدە‌بم، كە خە‌یاڵ لە‌ دە‌ریای یادگارییە‌كانتاندا نووقممدە‌كات. پێكە‌نینە سادە‌كە‌ت، مە‌رگێگی ئارا‌مە بۆ ژانەكانی دە‌روونم.
دەنگە‌كە : زوو زوو نامە‌م بۆ بنووسە، تا بزانم چیبكە‌م !

ئارام : بەچاوان. هە‌ر ئاواش دە‌بێ. تۆ بە‌زووترین كات دە‌ربچیت، ئاخر بۆی هە‌یە‌ خواكانی سە‌رزە‌وی دە‌رگەكان دابخە‌ن. ئە‌وساكە دە‌بینە ئە‌كتە‌رێكی شێت لە شانۆگە‌رییە‌كی خە‌مناكدا.

دە‌ی ئازیزەكەم دوو وشە لە ‌دە‌رە‌وە‌ی یاساكان بە‌ گوێمدا بچرپێنە، تا‌وە‌كو ئە‌م شە‌و بە ‌یادی جاران لە سەرمە‌ستیدا سە‌رخە‌وێك بشكێنم.

دەنگە‌كە : گیانەكەم خۆشمدە‌وێی هە‌ر لە‌ سنوورە‌كان دە‌ربازبم، ئە‌وساكە هە‌موو شە‌وێ پێش لەجووڵە‌كە‌وتنی پێڵوە‌كانمان، ئە‌م ڕۆژانەی ڕەبەنی لە‌بیری خۆمان بە‌رینە‌وە ‌و تۆش پارچە هۆنراوە‌یە‌كم لە‌گردنبكە‌ی. هەموو ڕۆژێك بەر لە چوونەسەركار بەگزنگی ‌بە‌یاندا ماچم بۆ بە‌ڕێبكە. شە‌و‌باش خە‌وێكی ئاسوودە و دوور لە جەنجاڵیی ژیان.

ئارام : زۆر سوپاس ئازیزە‌كە‌م‌، ژێی یادگارییە‌كانت تێر ژەنیمە‌وە و بە ‌ئاوازە‌ی ئەوین مە‌ستت‌كردم. شە‌وێكی شاد و خە‌وێكی دوور لە‌ ترس .

[تێلەفۆنەكە دادەنێتەوە و بەهەنگاوی خێرا دێت و دەچێت. ئاهێك هە‌ڵدە‌كێشێت، لە‌ باری سە‌مادا لە‌سە‌ر یە‌ك لاق وەردە‌سووڕێ‌ و بە‌رە‌و تێلە‌فۆنە‌كە دە‌چێتە‌وە] :
ئای كە‌ ژیان چە‌ندە‌ دژوارە. دە‌ست بۆ هە‌ر شتێك دە‌بە‌ی، وە‌كو‌مار پێتە‌وەدە‌دات ‌و ویستە‌كان جوانە‌مە‌رگدە‌كات. تە‌نیا ژیان هە‌رزانە، ژیان، ژیان، ژیان..

[دووبارە‌ لەبەردەم مێزە‌كە‌ دادە‌نیشێتە‌وە‌ و پێنووسە‌كە بە دە‌ستە‌وەدە‌گرێت و ‌سە‌ر‌هە‌ڵدە‌بڕێت]

نا، نا‌توانم بخە‌وم. ئاخر ژاندە‌مگرێ، ژان .. ژانی … [ دە‌ست بە نووسین دە‌كاتە‌وە .. لە ‌دڵی خۆیدا … ]

” ژانی خە‌یاڵێكی دیكە …. سواری ئە‌سپەشێی خۆزگە یاخییە‌كان دە‌بمە‌وە. ئە‌م جارە لە ‌پێدە‌شتێكی دیكە‌وە. لە هە‌ورازێكی‌ دیكە‌وە، دێمەوە كیشوە‌رە‌كە‌ی ئێوە.
سنوور لە ‌دوای سنوور دە‌بڕم، هە‌رچی سە‌ربازی چە‌قیندراوە، چەكی پێدادەنێم. تا جێژووانە‌كە‌ی جاران، خۆم تاودە‌دە‌م. بۆ ساتێك وە‌ك مناڵێكی برسی، لە‌ شیلاوی ئە‌وین تێر‌دە‌خۆمە‌وە. مە‌ستئاسا ئارام ئارام لە‌ ئامێزتدا دە‌نووم. بە‌ڵام داخەكەم، هە‌ر كە دە‌كە‌وینەڕێ، ئە‌سپە‌شێی خەیاڵ بریندارە ‌و لە لوولە‌ی مە‌رگ ترساوە و دوا فرمێسك لە چاویدا قە‌تیس دەمێنێت ….

هە‌رچە‌ندە هێزدە‌داتە بە‌رخۆی، بە‌ڵام درەنگە و ئە‌ژنۆكانی لە‌هێزكە‌وتوون. ناچاردە‌بین ملی ڕێگەی مان ‌و نە‌مان‌ بە‌دە‌شت ‌و كێواندا بگرینەبە‌ر، تا دە‌گە‌ینە دە‌رگەی سنوور. دە‌رگەوان لوولە‌ی مە‌رگ دە‌كاتە دڵمان ‌و داوای بە‌ڵگە‌ی یاسایی دە‌كات، پاشان سوورانە. بە‌ڵام سوورانە‌ی سنووری نیشتیمانی پیرۆز، ئێستاكە وە‌ك جاران نییە‌ ! ناتبە‌نە دیواخانی ئاخا، تا میش ‌و مە‌گە‌زی حە‌زی لە هە‌نگوینی كچێنیتدا تێر‌ بكات.

نا .. نا .. ئێستاكە سوورانە‌ی ئە‌م نە‌زمە نوێیە، دە‌بێ شیلە‌ی گیان بدە‌ی، تا جەنڕاڵەكان لە‌ كۆشكە سپی و شین و بۆرەكانی توركیا و ئۆروپا ‌و ئەمریكادا، هیلاكی‌ و ترس‌ و توڕە‌یی بە‌رە‌كانی جەنگ،‌ بە‌سە‌ر كچە مێر‌مناڵە تایلەندی و پۆلۆنییە‌كاندا دامركێننە‌وە. ئاخر ڕێبوارانی سە‌‌رسنوور زۆرن. بووك ‌و زاوای هە‌ڵهاتوو زۆرن. فریاناكە‌ون لە دیوە‌خانە بە كەلـلەسەر هەڵچنراوەكاندا شە‌وانی سوورانە گە‌رمبكە‌ن. یان لە‌وانە‌یە ترسی نە‌خۆشیە‌ك بێت لە بووكە‌ هە‌ڵبزركاوە‌‌كانە‌وە، كە بوونە‌تە خۆراكی دێوە‌زمە‌ی ئابلۆقە‌ی ئابووری، نەكا جەستەی پیرۆزیان كرماوی بكا. خۆ ئە‌گە‌ر بڵێی كاكی قارە‌مان، خۆ ‌من كارگە‌ی قیرە‌كە یا ‌پەنگەی پەخمە و كارگەی ئاوە‌تە‌ماتە‌م ئاودیونەكردووە و بازرگان نیم، تا باجم لە‌سە‌ر‌دابنین .. خۆ من لە ئۆ‌روپا تۆڕی كڕین ‌و فرۆشتنی ژنانم نییە، لەوێش هەر كۆیلەی سەروەرەكانی ئێوەم. خۆشە‌ویستی خۆمە‌ و گراوی خۆمە، دە‌مهە‌وێ لە‌تەكمدا بژیم …
پاسە‌وانەكان ڕۆ‌بۆتئاسا، بێ یە‌ك‌‌ و دوو بەسەرماندا دەگوڕێنن:
بڕۆ بابە بڕۆ، خوشە‌ویستی چی ‌و گراوی چی. مەم‌ و زینە! زووكە دە‌ی، خوا‌خوات بێت یە‌كێ لە لێپرسراوە‌كان لە‌م نێوەدا پە‌یدانە‌بێت. خۆت دەزانیت، ئە‌م ژنەجوانە ببینێت، ئە‌وكات ئیدی…

[موچركێك بە‌لە‌شیدا دێت، بەپە‌لە لەسەر نووسینەكەی بەردەوام دەبێت ]

“خێراكە دە‌ی ! یارمە‌تی حكومە‌تی ساوای هە‌رێم بدە … ”

[ماسوولكەكانی گرژدەبن و هەڵدەستێتەوە و ڕوو لەبینەران]

“بە‌ڵێ ئازیزەكەم، ئا بە‌م جۆرە، بۆ بەیەكگەییشتنەوە و دەربازبوون لە جەنگ و مەینەت، دە‌بێت سوورانە بدە‌ین، سوورانە‌ی سە‌ردەم …. سورانەی سەردەم …. سورانەی سەردەمممم ….”

Suraney Serdem

Şwên : Jûrêkî asayî, lelay rastewe lawêk leser kursîyek, leberdem mêzêkî Nûsîn danîştuwe, Glopêk le raserî kizdesûtêt. Lelay çepewe Tabloyekî kîmyabaranî Hellebce û Enfal hellwasrawe û dezgeyekî têlefon berçawdekewêt. ]Muzîkêkî aram dêtegwê[ laweke nûqmî deryay Xeyall buwe û çawî brrîwete xallêk leser dîwarekey beramberî. Serêkî pênûsekey beddan girtuwe û bedestî yarî be pênûseke dekat. ]Lem bareda maweyek demênêtewe[ lepirr wek le xew rabûbêt, destêk bepriçe alozkawekeyda dehênêt û seyrî dîwarekanî dewruberî dekat û wek pesendkirdnî ewey be Xeyallîdadêt, serî deleqênêt.

Wek grêkwêrey kirdbêtewe, bepirtaw pênûsekey degrête dest û destbenûsîndekat. Letek darriştnî Wişe û Ristekan destekey dîkey girmolle dekat û girjî derûnî le hêllekanî nêwçewanîda derdekewêt, çendcarêk ştêk denûsêt û pere kaxezekan dedrrênêt, ]hestaneweyekî ktupir, çend car hatûçûn lem serewe bo ewserî jûreke[. Lepir bzeyek hêllegirjekanî nêwçewanî desrrêtewe, herdû destî behêmay dozînewey ştêk pêkdadedat. Le şêwey semada le dewrî xoy desurrêtewe û dûbare pênûsekey degrêtewedest. Letek berzibûnewey muzîkeke rewtî Nûsînekey xêratir debêt, herwek ewey ke leser awazî muzîke xerîkî honînewey arezuwekanî bêt.

[ Zengî têlefon lepirr raydeçllekênêt, wek ewey demêkbêt, ke çawerrêy ew zenge bêt, bepele xoy degeyênête lay têlefoneke]

Laweke : bellê. Aram ( dengî Kçêk ) debîstirêt

Dengeke : elu .. Elu ( dengeke dûr dyare)

Aram : [ paş hellwêsteyekî kurt, wek bllêy dengeke nanasêt]

Dengeke : elu .. Aram

Aram : [ wek bujaneweyek, bexoyda dêtewe] : Azîz Gyan toyt, çonît, Gullekem? Ewe lekwêwe, Kçî Asman?

Dengeke : lêrem.

Aram : ]aramî lêhelldegîrêt, bedem duwanewe hatûço deka û dest radeweşênêt[ lêre ! Çon hatî, key?

Dengeke : ewe çîdellêy ! Min lêrem, le sulêmanî.

Aram : ] dûbare degerrêtewe serbarî pêşûy[ xenî bûm, wamzanî …

Dengeke : watzanî çî, ey birryar nîye, xot bedwamda bêytewe ?

Aram : ay bedbextî, xo mint kuşt, nedeng û nerreng !

Dengeke : le xot bipirse, min herdem çawerrêm. Keçî toş, dellîy êmet lebîrnemawe ?

Aram : eme çîye ? Min berdewam namet bo denûsim, agadart dekemewe ke boçî nehatûmetewe. Axir sefer buwe be yarî qumar û min natwanim. Xot dezanît her Roje û leşkirî wllatêk kêşdekene suleymanî û hewlêr, to detwanî tenya seferbkey.

Dengeke : çon , letek kê ? Dellêy bîrtiçuwe, ke lêre kiç boy nîye tenya seferbkat, Yasa rêgenadat !

Aram : ax, letek Kesêk derbazbe, min bexom lem berî snûr çawerrêt dekem …

Dengeke : axir min çon lew hemû bazirge û rawetajîye rizgarimdebêt ?

Aram : toş wek hemuwan, debêt sûrane bdey. Pêmbllê, êsTake çi dekey, wrey carant mawe? Le etk û radûnanî Cengî nêwxoda bernekewutuy ?

Dengeke : ta êsTake na, bellam wexte şêtbim. be Gyanî to leme zyatir Twanamnîye. Were rizgarimbke ! Dûrî to û şerr û şorr. Hemû Rojêk le rêy karge ta degemewe Mall, çawerrwanî Merg dekem. Axir to nazanî barudoxeke çone! Her Kese û Xwaxwayetî derçê û rizgarîbêt. Bellam Twanay dewêt. To bom bnûse, min çî bkem, çon bgeme lay to? Bes tenya carêkî dîke bitbînmewe. Îdî hîçim nawêt. Şaduman debim, ger le amêzî toda bmirm. Ay le tenyayî û xoxwardnewe. Xeyall, tasem naşkênêt. Wexte le agrî …. Desûtêm û agir le bîrewerîyekanim berdedat. Rojane hezaran car hezekanim zîndebeçalldekem û Celadî ‘îşq kifnyan be Balladebrêt û bayequşêk be mnarey mizgewtêkewe wêrd û stayşî bêgerdîyan dexwênêt. Çi Rojgarêke têykewtîn ?

Aram : xot ragre, min le to xraptir. Axir eger to dêwezmey tenyayî xerîkbêt rawtibkat, ewa mnî qût dawe! Min le henawîda şerrî hatnederewe dekem, letek naumêdî dest û pence nerimdekem. Dillnyabe Gullegyan! Min le to hallm şirrtre. Meger bgeyte lam botî baskem, bêtoyî watay çîye! Xemî to û barî ew Xellke, xewî lêzrrandûm. (31)î ab temabirrtbûm. Bellam hîwam pête em careş destibxeynewe nêwdestî yek, ta le Şewêkî bêhawtada leberrrûnakî Mangeşewda, le kenarî rûbarî (Rhein) Xemekan bdeynedem şepole serşêt û yaxîyekan, qaqrrî em Sallane be Maç parawbê û sêberî lêkallawman bedem crîwey estêrekanewe semabka û dengdanewey qaqay pêkenînman snûrekan bibrrêt.

Dengeke : çîye dellêy bûy be honer? Ay ke namekant çende arambexşin.

Aram : Kçê axir Ewînî to Mrov dekate balldarêkî berzefrr. Hemîşe le hoşimda awazî dwant muzîkêkî cadûîyye û wşekan le mêşkimda danedane dehonêtewe, dengit le gwêmda dengdedatewe û kêş û serwa be Xeyallekanim debexşêt. Tenya katê aramdebim, ke Xeyall le deryay yadgarîyekantanda nûqmimdekat. Pêkenîne sadeket, Mergêgî arame bo janekanî derûnim.

Dengeke : zû zû namem bo bnûse, ta bzanim çîbkem !

Aram : beçawan. Her awaş debê. To bezûtrîn kat derbçît, axir boy heye Xwakanî serzewî Dergekan dabxen. Ewsake debîne ekterêkî şêt le şanogerîyekî Xemnakda.

Dey Azîzekem dû wşe le derewey Yasakan be gwêmda bçirpêne, taweku em Şew be yadî caran le sermestîda serxewêk bişkênim.

Dengeke : Gyanekem xoşimdewêy her lesnûrekan derbazbim, ewsake hemû Şewê pêş lecûllekewtinî Pêllwekanman, em Rojaney rebenî lebîrî xoman berînewe û toş parçe honraweyekim legirdinbkey. Hemû Rojêk ber le çûneserkar begzingî beyanda Maçim bo berrêke. Şewbaş xewêkî asûde û dûr le cencallî jyan.

Aram : zor supas Azîzekem, jêy yadgarîyekant têrjenîmewe û be awazey Ewîn mestitkirdim. Şewêkî şad û xewêkî dûr le tris .

[têlefoneke dadenêtewe û behengawî xêra dêt û deçêt. Ahêk helldekêşêt, le barî semada leser yek laq werdesûrrê û berew têlefoneke deçêtewe] :
Ay ke jyan çende dijware. Dest bo her ştêk debey, wekumar pêtewededat û wîstekan cwanemergdekat. Tenya Jyan herzane, Jyan, Jyan, Jyan..

[dûbare leberdem mêzeke dadenîşêtewe û pênûseke be Destewedegrêt û serhelldebrrêt]

Na, natwanim bxewm. Axir jandemgirê, Jan .. Janî … ( dest dekatewe be Nûsîn .. Ledllî xoyda …

” Janî Xeyallêkî dîke …. Swarî espeşêy xozge yaxîyekan debmewe. Em care le pêdeştêkî dîkewe. Le hewrazêkî dîkewe, dêmewe kîşwerekey êwe.
Snûr le dway snûr debrrim, herçî Serbazî çeqîndrawe, çekî pêdadenêm. Ta cêjuwanekey caran, xom tawdedem. Bo satêk wek Mnallêkî birsî, le şîlawî Ewîn têrdexomewe. Mestasa aram aram le amêztda denûm. Bellam daxekem, her ke dekewînerrê, espeşêy Xeyall brîndare û le lûley Merg tirsawe û dwa firmêsk le çawîda qetîs mawe ….

Herçende hêzdedate berxoy, bellam drenge û ejnokanî lehêzkewtûn. Naçardebîn mlî rêgey maniwneman bedeşt û kêwanda bigrîneber, ta degeyne Dergey snûr. Dergewan lûley Merg dekate dillman û daway bellgey Yasayî dekat, paşan sûrane. Bellam sûraney snûrî nîştîmanî pîroz, êsTake wek caran nîye! Natbene dîwaxanî axa, ta mîş û megezî hezî le henguynî Kçênîtda têr bkat.

Na .. Na .. Êstake sûraney em Nezme nwêye, debê şîley Gyan bdey, ta cenrrallekan le koşke spî û şîn û borekanî turkya û orupa û emrîkada, hîlakî û tris û turreyî berekanî Ceng, beser Kçe mêrimnalle taylendî û polonîyekanda damrikênnewe. Axir rêbwaranî sersinûr zorn. Bûk û zaway hellhatû zorn. Firyanakewn le dîwexane be kelleser hellçinrawekanda Şewanî sûrane gerimbken. Yan lewaneye tirsî nexoşyek bêt le bûke hellbzirkawekanewe, ke bûnete xorakî dêwezmey abloqey abûrî, neka cestey pîrozyan kirmawî bka. Xo eger bllêy kakî qareman, xo min kargey qîreke ya pengey pexme û kargey awetematem awdîwnekirduwe û bazirgan nîm, tabacim leserdabnîn .. Xo min le orupa torrî krrîn û froştinî jnanim nîye, lewêş her koyley serwerekanî êwem. Xoşewîstî xome û grawî xome, demhewê letekimda bjî … Pasewanekan robotasa, bê yek û dû beSermanda degurrênin:

Brro babe brro, xuşewîstî çî û grawî çî. Mem u Zîne ! Zûke dey, Xwaxwat bêt yekê le lêprisrawekan lem nêweda peydanebêt. Xot dezanît, em jnecwane bibînêt, ewkat îdî…

[Muçrikêk beleşîda dêt, bepele leser Nûsînekey berdewam debêt ]

“xêrake dey ! Yarmetî hkumetî saway herêm bde … “

[ masûlkekanî grijdebin û helldestêtewe û rû lebîneran]

“bellê Azîzekem, a bem core, bo beyekgeyîştnewe û derbazbûn le Ceng û meynet, debêt sûrane bdeyn, sûraney serdem …. Suraney serdem …. Suraney serdemmimim ….”

حه‌فت و هه‌شت *

شوێن : سه‌رشه‌قامێك [جار جاره‌ ده‌نگی ئۆتۆمۆبێل، هاواری ئه‌ره‌بانه‌چی و مناڵانی شتفرۆش]. له‌لای ڕاسته‌وه‌ مێزیك، كچێكی جوان، پۆشاكی جۆری پوله‌كه‌یی زه‌ردی كوردی پۆشیوه‌، جامه‌دانییه‌كی سوور له ‌پشتسه‌ری هه‌ڵاواسراوه‌ و به‌ ‌زەرد له‌ سه‌ری نووسراوه‌ “ئۆتۆنۆمی ڕاستەقینە …”. له‌لای چه‌په‌وه‌ میزێك، كچێكی باریكئه‌ندام، پۆشاكی له‌ جۆری ڕیشی مامه‌ی پۆشیوه‌ و پشتوێنێكی سه‌قزی له‌ كه‌مه‌ری به‌ستووه‌، جامه‌دانییه‌كی سه‌وز له‌ پشتسه‌ری هه‌ڵواسراوه‌ و له‌ ناوه‌ڕاستیدا به‌ سوور نوسراوه‌ “مافی چاره‌ی خۆنووس …”.

[پیاوێكی ته‌مه‌ن باڵا مامناوه‌ندی، سه‌ر و ڕیشی ماشوبرنجی، پۆشاكێكی كۆنه‌ و دڕاوی پۆشیوه‌، له‌ كچه‌ پۆشاك زه‌رده‌كه‌ نزیكده‌بێته‌وه‌ و به‌ وردی سه‌رنجی كچه‌كه‌ ده‌دات و له‌به‌رخۆیه‌وه‌ ده‌دوێت]

– ئای كه‌ پۆشاكه‌كه‌ی چه‌نده‌ جوانه‌، ئاخۆ گه‌ر مژده‌ بیپۆشێت، چه‌ندی لێبوه‌شێته‌وه‌ و چه‌ند خانومانبێت ؟ ئه‌ویش وه‌ك هاوه‌ڵه‌كانی له‌ ئاهه‌نگه‌كانی فێرگه‌دا خۆی بڕازێنێت، ئای له‌م ڕۆژگاره‌ لۆ هه‌مووان ناتوانن پۆشاكی جوانیان هه‌بێت ؟

[ له‌ پڕ ده‌نگێكی ناسك دایده‌چڵه‌كێنێت]

كچه‌كه‌ پۆشاكزه‌رده‌كه‌: مامۆستا، یاخوا به‌خێربێیت، هاتووی ده‌نگ به‌ لیستی خۆت بده‌ی، لیستی زه‌رد؛ لیستی برسییان، ده‌نگ به‌ ئاشتی بده ‌!

ڕێبواره‌كه‌ : [وه‌ك ئه‌وه‌ی كه‌ گوێی له‌ قسه‌كانی كچه‌كه‌ نه‌بووبێت، له‌به‌رخۆیه‌وه‌] ئای له‌م داستانه‌ چه‌نده‌ كۆنه‌، ئاوا ده‌زانێت، كە نه‌مبیستووه ‌! [ڕوو له‌ كچه‌كه‌ ده‌پرسێت] بابت كاری چییه‌ ؟

كچه‌كه ‌: به‌ڕێوه‌به‌ری شاره‌وانییه‌، پێشمه‌رگه‌ی شۆڕشی ئه‌یلووله‌ !

ڕێبواره‌كه ‌: [به‌توانجه‌وه‌] ئا .. ده‌یناسم، چاكی ده‌ناسم چ قاره‌مانێكه‌. كاتی خۆی پاش حه‌فتاكان لای من پیشمه‌رگه‌ بوو، كاڵا شایسته‌ی باڵا، ئمم … ئمم …
كچه‌كه ‌: ده‌ی كه‌واته‌ هاتووی ده‌نگ به‌ پارتی خۆت بده‌ی ؟

ڕێبواره‌كه ‌: نا كچی خۆم، به‌ هه‌ڵه‌داچوویت، من كۆنه‌ مسته‌شار نیم، خوا بازارتانبدات.

[ پاش كه‌مێك ئه‌وجار به‌ره‌و كچه‌ به‌رگ سه‌وزه‌كه‌ ده‌ڕوات و پۆشاكەكەی ئەویش زۆر سه‌رنجی ڕاده‌كێشێت، له‌به‌رخۆیه‌وه] ‌

– نا ئه‌مه‌یان جوانتره‌، ئه‌و پشتوێنه‌ كاتێك كه‌ خاتوون ده‌زگیرانم بوو، داوایلێكردم گوتی “توخوا جه‌مال بۆم بكڕه‌”. منیش وتم: كچێ ئاخر به‌چی؟ نیمه‌، مه‌گه‌ر خۆم بفرۆشم. ئای خاتوونه‌كه‌م زۆر ده‌ترسم ئه‌و ئاواته‌ به‌ریته‌ ژێرگڵ، به‌ڵام نا، بڕواناكه‌م تاسه‌ر دونیا هه‌ر ئاوابێت. ئه‌م شه‌وه‌زه‌نگه‌ی برسییه‌كان، هه‌ر ده‌بێت كۆتاییه‌كی هه‌بێت. دڵنیام له‌ته‌ك گزنگی ئه‌و به‌یانه‌، ئه‌م چارشێوه‌ ڕه‌شه‌ی سه‌روه‌ران له‌سه‌ر بیر و هۆشی مرۆڤایه‌تی لاده‌درێت. خاتوونه‌كه‌م ئه‌گه‌ر من و تۆش نه‌یبینین، ئه‌وا دڵنیام كه‌ نه‌وه‌كانمان ده‌یبینین.

كچه‌ پۆشاك سه‌وزه‌كه ‌: به‌خێربێیت خاره‌ گیان. دیاره‌، خه‌ركی زه‌حمه‌تكێش، خاوه‌نی خۆی ده‌ناسیتن. [به‌ په‌نجه‌كێشان بۆ كچه‌ پۆشاك زه‌رده‌كه‌] كۆنه‌په‌رست و به‌كرێگیراون. ئاخا و ئاخاوات له‌خۆده‌گرن. ناوی به‌ڕێزتان چیبوو؟ به‌دڵنیاییه‌وه‌ پاش ئه‌مه‌ یارمه‌تیتان ده‌درێت و سه‌ره‌نجامه‌كه‌ی به‌دڵی ئه‌نگۆ ده‌بیتن !

ڕێبواره‌كه ‌: به‌ته‌مان چی لۆ ئێمه‌ بكه‌ن ؟

كچه‌كه ‌: كوردستان ڕزگارده‌كه‌ین، كارگەكان ده‌خه‌ینه‌وه‌گه‌ڕ، گونده‌كان ئاوه‌دانده‌كه‌ینه‌وه‌، بارزگانی له‌ته‌ك ده‌رودراوسێیان و موچه‌ دواكه‌وتووه‌كانیش ده‌درێنه‌وه ‌…

ڕێبواره‌كه ‌: كەواته‌ بۆ من هیچ !

كچه‌كه ‌: كو هیچ، لۆ ئه‌وانه‌ هیچن ؟

ڕێبواره‌كه‌ : ئه‌وانی تۆ گوتتن، هیچیان لۆ ئێمه‌ نین، تەنیا لۆ بازرگان و خاوه‌نكار و خاوه‌نزه‌وییه‌كانن‌. كاتی خۆشی كه‌ به‌عس فه‌رمانڕه‌وابوو، بارزگانی هه‌بوو، كارگه‌كان له‌گه‌ڕدابوون، وڵات ئاوه‌دانبوو، موچه‌ هه‌بوو، به‌ڵام مناڵه‌كانی ئێمه‌ هه‌ر له‌ ژیان بێبه‌شبوون !

كچه‌كه ‌: خاره‌ وه‌ره‌ تاقیبكه‌ره‌وه‌، بزانه‌ هه‌ر ئاوایه‌، كو له‌ خۆته‌وه‌ ئه‌و بڕیارە بۆ سبه‌ینێ ده‌ده‌یت ؟

ڕێبواره‌كه ‌: نا كچی خاره‌ی، له‌ سه‌رده‌می باپیرانمانه‌وه‌ تاكو ئێستا هه‌ر تاقیده‌كه‌ینه‌وه‌، یه‌ك له‌ یه‌ك خراپتر، هه‌مووان زالوئاسا له‌ گه‌رووی مار و مندارماندا ئاوسان. به‌ڵام ئێمه‌ ڕه‌نگ زه‌ردتر و برسیتربووین. كچم ئه‌و قسانه‌ لۆ كەسانی گێل و نه‌فام به‌چێژن، خوا ڕزقتانبدات.

[ له‌م كاته‌دا ئه‌ره‌بانه‌چییه‌ك به‌ده‌م ڕاكێشانی ئه‌ره‌بانه‌كه‌یه‌وه‌ تێده‌په‌ڕێت و ھاواردەكات …]

ئه‌ره‌بانه‌چی : وه‌ره‌ خاره‌ گیان، وه‌ره‌ لۆ سرقی جوان، سرقی قودسی كوردستان، لۆ نیوه‌ڕۆی ئه‌م به‌هاره‌، له‌گه‌ر پیازه‌ته‌ڕه‌ی، خواردنی خه‌ركی هه‌ژاره‌. ئای كه‌ چه‌ند خۆشه‌ …..

[ له‌م كاته‌دا كچه‌ سه‌وزپۆشه‌كه‌ چه‌پڵه‌یه‌كی بۆ لێده‌دات و قسه‌كه‌ی پێده‌برێت …]
ڕێبواره‌كه‌ : كوڕم، مه‌لا …. فتوای داوه‌، سرقی قودس حه‌رامه‌، چونكه‌ جوله‌كه‌ تێیدا ده‌سه‌ڵاتداره‌ !

ئه‌ره‌بانه‌چی: خاره‌، جوله‌كه‌ی چی، كه‌ركووكی قودسی كوردستان.
ڕێبواره‌كه ‌: ببووره‌ كوڕم، نەمزانی سرقی كەركووك ده‌رێیت، بروابكه‌ برنج و ڕۆنمان نییه‌، تا بیكه‌ینه‌ دۆرمه‌، خۆزگه‌ به‌وه‌ی كه‌ ده‌یخواتن.

ئه‌ره‌بانه‌چی : وامزانی هه‌ر ئێمه‌ بێبرنج و ڕۆنین، هه‌ی ! [ ئه‌ره‌بانه‌چییه‌كه‌ به‌ وردی سه‌رنجێكی كچه‌كه‌ ده‌دات و ئاهێك هه‌ڵده‌كێشێت، له‌ پر ده‌نگی ئه‌ره‌بانه‌چییه‌كی دی ڕایده‌چڵه‌كێنێت]

ئه‌ره‌بانه‌چی دووه‌م: گندۆره‌، گندۆره‌ی ئێرانێ، زەردە، شیرینه‌ وه‌كی شه‌كری. وه‌ره‌ خاره‌ بیرتنه‌چێ، لۆ منداره‌كانت ئه‌و شه‌مامه‌ جوانه‌ی [به‌ لاچاوێك سه‌ریری كچه‌ زه‌ردپۆشه‌كه‌ ده‌كات] هه‌ر ده‌رێی گێمه‌ڕه‌، ئای چه‌نده‌ نه‌رم و خۆشه.‌ [ ڕوو له‌ ئه‌ره‌بانه‌چی یه‌كه‌م] خۆت لاده‌ حه‌لۆ، با ده‌ركه‌وێت مانگی چارده ‌!

ئه‌ره‌بانه‌چی یه‌كه‌م : باشه‌ هه‌تیم خۆ نه‌تكڕییه ‌! [دە تێده‌په‌ڕێ]

ئه‌ره‌بانه‌چی دووه‌م : ده‌ی خاره‌ لێمبكڕه‌، گوندۆره‌ی ئیرانێ، خۆزگه‌م به‌وه‌ی ده‌یخواتن.

ڕێبواره‌كه ‌: خاره‌ گیان، منداره‌كانم له‌ به‌دخۆراكیدا تووشی سكچوون بوون، گوندۆره‌ خراپه‌ لۆیان.

ئه‌ره‌بانه‌چی : ئاخر خاره‌، هی ئێرانه‌، بۆ سكچوون باشترین ده‌رمانه‌. گوێم له‌ ته‌له‌فزیۆنی [گوران] بوو، گوتی “له‌به‌رئه‌وه‌ی كه‌ له‌ نه‌خۆشخانه‌كاندا داووده‌رمان نییه‌، بۆ سكچوون گوندۆره‌ بخۆن، باشترین ده‌رمانه‌”، به‌تامه‌، نه‌رمه‌، شیرینه‌، شیریین !
ڕێبواره‌كه‌ : ها.. ها..ها [به‌ده‌نگێكی به‌رز] كوڕی خۆم، خه‌تای تۆ نییه‌، دونیاكه‌ پێچه‌وانه‌یه‌، بۆیه‌ ژه‌هری ماریش ده‌بێته‌ هه‌توان. ته‌مه‌ڵ و ته‌وه‌زه‌ڵ پۆشته‌ و ئێمه‌ش برسی و بێسه‌رپه‌نا.

[ ڕێبواره‌كه‌ ملیڕێ ده‌گرێ و ئه‌ره‌بانه‌چییه‌كه‌ بە لاچاوێك تەماشای كچەكان دەكات و هاوار ده‌كات] ..

– وه‌رن لۆ گندۆره‌ی، زەردە، خڕه‌، نه‌رمه‌، شیرینه‌، خۆ حه‌رام نه‌كرایه‌، ئای كه‌ خۆشه‌، لۆی بمرم !

نۆڤه‌مبه‌ری ١٩٩٧

* پێشتر له‌ ژماره‌ (٢)ی دێسه‌مبه‌ری ١٩٩٧ی گۆڤاری (ژیله‌مۆ)دا به‌ناوی (دوو تاكی یه‌ك جووت پیڵاو) بڵاو بووه‌ته‌وه‌، له‌به‌رئه‌وه‌ی كه‌ پێڵاو لای خه‌ڵكی كورد واتای نیگه‌تیڤی هه‌یه‌ و بۆ ئەوەی لای خوێنه‌ر ناڕۆشنی دروستنه‌كات، له‌م بڵاوكردنه‌وه‌یه‌دا گۆڕیم به‌ (حه‌وت و هه‌شت) كه‌ وه‌ك (6 ، 9)ی ئینگلیزی وان و هه‌مان مه‌به‌ستی پێشوو ده‌گه‌یێنێت و له‌ هیچ بارێكیاندا ئامانجم گه‌یاندنی تێڕوانینی خێڵه‌كیی و ده‌ره‌به‌گیی نییه‌ بۆ پێڵاو.

Hewt û Heşt *

Şwên : serşeqamêk [car care dengî otomobêl, hawarî erebaneçî û mnallanî ştifroş]. Lelay rastewe mêzîk, kçêkî cwan, poşakî corî pulekeyî zerdî kurdî poşîwe, camedanîyekî sûr le piştserî hellawasrawe û be zerd le serî nûsrawe “otonomî rasteqîne …”. Lelay çepewe mîzêk, kçêkî barîkendam, poşakî le corî rîşî mamey poşîwe û piştwênêkî seqzî le kemerî bestuwe, camedanîyekî sewz le piştserî hellwasrawe û le nawerrastîda be sûr nusrawe “mafî çarey xonûs …”.

[pyawêkî temen balla mamnawendî, ser û rîşî maşubrincî, poşakêkî kone û drrawî poşîwe, le kçe poşak zerdeke nzîkdebêtewe û be wirdî sernicî kçeke dedat û leberxoyewe dedwêt]

– ay ke poşakekey çende cwane, axo ger mijde bîpoşêt, çendî lêbweşêtewe û çend xanumanbêt? Ewîş wek hawellekanî le ahengekanî fêrgeda xoy brrazênêt, ay lem rojgare lo hemuwan natwanin poşakî cwanyan hebêt?

[ Le pirr dengêkî nask daydeçllekênêt]

Kçeke poşakzerdeke: mamosta, yaxwa bexêrbêyt, hatûy deng be lîstî xot bdey, lîstî zerd; lîstî birsîyan, deng be aştî bde !

Rêbwareke : [wek ewey ke gwêy le qsekanî kçeke nebûbêt, leberxoyewe] ay lem dastane çende kone, awa dezanêt, ke nembîstuwe ! [Rû le kçeke deprisêt] babt karî çîye ?

Kçeke : berrêweberî şarewanîye, pêşmergey şorrşî eylûle !
Rêbwareke : [betwancewe] a .. Deynasm, çakî denasm çi qaremanêke. Katî xoy paş heftakan lay min pîşmerge bû, kalla şayistey balla, mim … Mim …

Kçeke : dey kewate hatûy deng be partî xot bdey ?

Rêbwareke : na kçî xom, be helledaçûyt, min kone misteşar nîm, xwa bazartanbdat.

[ paş kemêk ewcar berew kçe berg sewzeke derrwat û poşakekey ewîş zor sernicî radekêşêt, leberxoyewe]

– na emeyan cwantre, ew piştwêne katêk ke xatûn dezgîranim bû, dawaylêkirdim gutî “tuxwa cemal bom bikrre”. Mnîş wtim: kçê axir beçî ? Nîme, meger xom bifroşm. Ay xatûnekem zor detrism ew awate berîte jêrgill, bellam na, birrwanakem taser dunya her awabêt. Em şewezengey birsîyekan, her debêt kotayyekî hebêt. Dillnyam letek gzingî ew beyane, em çarşêwe reşey serweran leser bîr û hoşî mrovayetî ladedrêt. Xatûnekem eger min û toş neybînîn, ewa dillnyam ke newekanman deybînîn.

Kçe poşak sewzeke : bexêrbêyt xare gyan. Dyare, xerkî zehmetkêş, xawenî xoy denasîtin. [Be pencekêşan bo kçe poşak zerdeke] konepersit û bekrêgîrawn. Axa û axawat lexodegrin. Nawî berrêztan çîbû? Bedillnyayyewe paş eme yarmetîtan dedrêt û serencamekey bedllî engo debîtin !

Rêbwareke : beteman çî lo ême bken?

Kçeke : kurdistan rizgardekeyn, kargekan dexeynewegerr, gundekan awedandekeynewe, barizganî letek derudrawsêyan û muçe dwakewtuwekanîş dedrênewe …

Rêbwareke : kewate bo min hîç !

Kçeke : ku hîç, lo ewane hîçin ?

Rêbwareke : ewanî to guttin, hîçyan lo ême nîn, tenya lo bazirgan û xawenkar û xawenzewîyekanin. Katî xoşî ke be’si fermanrrewabû, barizganî hebû, kargekan legerrdabûn, wllat awedanbû, muçe hebû, bellam mnallekanî ême her le jyan bêbeşbûn !

Kçeke : xare were taqîbkerewe, bzane her awaye, ku le xotewe ew birryare bo sbeynê dedeyt ?

Rêbwareke : na kçî xarey, le serdemî bapîranmanewe taku êsta her taqîdekeynewe, yek le yek xraptir, hemuwan zaluasa le gerûy mar û mindarmanda awsan. Bellam ême reng zerdtir û birsîtribûyn. Kçim ew qsane lo kesanî gêl û nefam beçêjn, xwa rizqtanbdat.

[ lem kateda erebaneçîyek bedem rakêşanî erebanekeyewe têdeperrêt û hawardekat …]

Erebaneçî : were xare gyan, were lo sirqî cwan, sirqî qudsî kurdistan, lo nîwerroy em behare, leger pyazeterrey, xwardinî xerkî hejare. Ay ke çend xoşe …..

[ lem kateda kçe sewizpoşeke çeplleyekî bo lêdedat û qsekey pêdebrêt …]

Rêbwareke : kurrm, mela …. Fitway dawe, sirqî qudis herame, çunke culeke têyda desellatdare !

Erebaneçî: xare, culekey çî, kerkûkî qudsî kurdistan.

Rêbwareke : bbûre kurrm, nemzanî sirqî kerkûk derêyt, birwabke brinc û ronman nîye, ta bîkeyne dorme, xozge bewey ke deyixwatin.

Erebaneçî : wamzanî her ême bêbrinc û ronîn, hey ! [ Erebaneçîyeke be wirdî sernicêkî kçeke dedat û ahêk helldekêşêt, le pir dengî erebaneçîyekî dî raydeçllekênêt]

Erebaneçî duwem: gindore, gindorey êranê, zerde, şîrîne wekî şekrî. Were xare bîrtneçê, lo mindarekant ew şemame cwaney [be laçawêk serîrî kçe zerdpoşeke dekat] her derêy gêmerre, ay çende nerm û xoşe. [ Rû le erebaneçî yekem] xot lade helo, ba derkewêt mangî çarde !

Erebaneçî yekem : başe hetîm xo netkrrîye ! [De têdeperrê]

Erebaneçî duwem : dey xare lêmbikrre, gundorey îranê, xozgem bewey deyixwatin.

Rêbwareke : xare gyan, mindarekanim le bedxorakîda tûşî sikçûn bûn, gundore xrape loyan.

Erebaneçî : axir xare, hî êrane, bo sikçûn baştirîn dermane. Gwêm le telefzyonî [guran] bû, gutî “leberewey ke le nexoşxanekanda dawuderman nîye, bo sikçûn gundore bxon, baştirîn dermane”, betame, nerme, şîrîne, şîrîyn !

Rêbwareke : ha.. Ha..ha [bedengêkî berz] kurrî xom, xetay to nîye, dunyake pêçewaneye, boye jehrî marîş debête hetwan. Temell û tewezell poşte û êmeş birsî û bêserpena.

[ rêbwareke mlîrrê degrê û erebaneçîyeke be laçawêk temaşay kçekan dekat û hawar dekat] ..

– wern lo gindorey, zerde, xrre, nerme, şîrîne, xo heram nekraye, ay ke xoşe, loy bmirm !

Novemberî 1997

* pêştir le jmare (2)î dêsemberî 1997î govarî (jîlemo)da benawî (dû takî yek cût pîllaw) bllaw buwetewe, leberewey ke pêllaw lay xellkî kurd watay nîgetîvî heye û bo ewey lay xwêner narroşnî drustnekat, lem bllawkirdneweyeda gorrîm be (hewt û heşt) ke wek (6 , 9)î îngilîzî wan û heman mebestî pêşû degeyênêt û le hîç barêkyanda amancim geyandinî têrrwanînî xêllekîy û derebegîy nîye bo pêllaw.

چاوشاركێی مه‌رگ و ژيان

ئای داپيره‌ گيان، پاش چه‌ند مانگ چاوه‌ڕوانی و شه‌ونخوونی كۆرپه‌كه‌مان له‌دايكبوو، ڕه‌نگهه‌ڵبزركاو و لاواز، پاش چه‌ند چركه‌يه‌ك پێڵوه‌ نه‌رمه‌كانی شلبوونه‌ سه‌ريه‌ك و نه‌يزانی له‌ كوێوه‌ خۆرهه‌ڵدێ و له‌كوێدا ئاوا ده‌بێت.

مه‌رگی پاش چه‌ند ساته‌ ژيانی ساواكه‌مان، ڕه‌شه‌بايه‌ك بوو، له‌ خه‌م و تاسه‌ی ئێوه‌ هه‌ورێكی چڕی له‌ ئاسمانی دڵمدا چڕكرده‌وه‌.

ئه‌م خه‌مه‌ له‌ لايه‌ك و له‌ولاشه‌وه‌ له‌تاو پرسياره‌ بێئەژماره‌كانی ‘ژينۆ’ی كيژمان ده‌سته‌پاچه‌م، زۆرجار باوه‌ڕ به‌ وه‌ڵامه‌كانی من ناكات و ده‌ڵێت “بابه‌ گيان، چۆن داپيره‌ ناوی پێنج كيشوه‌ره‌كه‌ی نه‌ده‌زانی، چۆن تامرد ژووری تايبه‌تی بەخۆی نه‌بوو، من بڕوا به‌ تۆ ناكه‌م، كه‌ ده‌ڵێی “داپیرە لە سەراپای ژیانیدا شاری نه‌ديتووه‌”، چۆن تا له‌نێوڕان گه‌ڕاوه‌ته‌وه‌، شه‌كراوی خوراوه‌ته‌وه‌ و له‌ باوه‌ هۆمه‌ر ماره‌كراوه‌ ؟ ” … ”

ئاخ چ بكه‌م، نه‌ تۆ زيندوو بوويته‌وه‌، نه‌ ئەويش بڕوای به‌ وه‌ڵامه‌كانی من ده‌هێنا. ناچار بڕيارمدا ئه‌م هاوينه‌ بيبه‌مه‌وه‌ بۆ زێدی خۆمان و ماڵه‌ بێپه‌نجه‌ره‌كه‌ی تۆی نيشانبده‌م. كه‌ گه‌يشتينه‌ ماڵی هاوكاری برام، واقی وڕما و چاوی به‌ ماڵه‌ يه‌ك ژووره‌كه‌يان كه‌وت، به‌ شه‌رمه‌وه‌ خۆی هاويشته‌ باوه‌شی من و داوایلێبوردنی لێكردم. پاش كه‌مێك كڕكه‌وتن، وه‌ك ئەوەی له‌دووی شتێك بگه‌ڕێت، وتی:
– بابه‌ گيان، داوايه‌كم هه‌يه‌، تۆش پێیڕازی ده‌بیت ؟

وتم: ئا كچم، هه‌رچيم پێبكرێت و كارێكی دروستبێت، بۆتی ده‌كه‌م!

ئەو جار سه‌يری دايكی و مامه‌ هاوكاری كردو وتی:
– من ژووره‌كه‌ی خۆم ده‌ده‌م به‌ مامه‌ هاوكار و پله‌ بێگه‌رد و ژێوه‌ر، ئاخر ئه‌وه‌ كه‌ی ژووره‌، كه‌ ئەوان هه‌يانه‌، چۆن ماڵ ته‌نيا يه‌ك ژووری ده‌بێ ؟

وه‌ڵامه‌كه‌ وه‌ك سكڵ زاری سووتاندم، به‌ڵام ناچاربووم، ده‌بوو وه‌ڵامی بده‌مه‌وه ‌..
وتم: ئاخر گيانی بابه‌، نه‌ ئه‌وان ڤيزای هاتنه‌ ئاڵمانيايان هه‌يه‌، نه‌ ژووره‌كه‌ی تۆش هی خۆمانه ‌!

وه‌ڵامه‌كه‌ی به‌لاوه‌ سه‌يربوو، كه‌مێك ڕاماو زمانی پرسينی پژا:
– چۆن ژووری خۆمان نييه‌، ئه‌ی هی كێيه‌؟ بۆچی ئه‌وان ناتوانن بێن، ڤيزايان بۆچييه‌، حه‌زيان له‌وێيه‌ و ته‌واو !

ئه‌ی مه‌گه‌ر تۆ نه‌تگوت، مامه‌ هاوكار بەخۆی وه‌ستايه‌ و خانوبه‌ره‌ دروستده‌كات، ئەگه‌ر وه‌ستايه، ئەدی‌ بۆچی خانوويه‌كی جوان و گه‌وره‌ی سێ ژووری بۆ خۆيان دروستناكات، ها پێمناڵێی بۆچی؟

çawşarkêy Merg û Jyan

Ay Dapîre Gyan, paş çend Mang çawerrwanî û Şewnixûnî korpekeman ledaykbû, renghellbzirkaw û lawaz, paş çend çirkeyek Pêllwe nermekanî şilbûne seryek û neyzanî le kwêwe xorhelldê û lekwêda awa debêt.

Mergî paş çend sate jyanî sawakeman, reşebayek bû, le Xem û tasey êwe hewrêkî çrrî le Asmanî dllimda çirrkirdewe.

Em Xeme le layek û lewlaşewe letaw pirsyare bêejmarekanî ‘Jîno’î kîjman destepaçem, zorcar bawerr be wellamekanî min nakat û dellêt “babe Gyan, çon dapîre nawî pênc kîşwerekey nedezanî, çon tamrid jûrî taybetî bexoy nebû, min birrwa be to nakem, ke dellêy “dapîre le serapay jyanîda şarî nedîtuwe”, çon ta lenêwrran gerrawetewe, şekrawî xurawetewe û le bawe homer marekrawe? “ …”

Ax çi bkem, ne to zîndû bûytewe, ne ewîş birrway be wellamekanî min dehêna. Naçar birryarimda em hawîne bîbemewe bo zêdî xoman û Malle bêpencerekey toy nîşanbdem. Ke geyiştîne Mallî hawkarî bram, waqî wirrma û çawî be Malle yek jûrekeyan kewt, be şermewe xoy hawîşte Baweşî min û dawaylêburdinî lêkirdim. Paş kemêk kirrkewtin, wek ewey ledûy ştêk bgerrêt, wtî:
– babe Gyan, dawayekim heye, toş pêyrrazî debît?

Wtim: a Kçim, herçîm pêbkirêt û karêkî drustibêt, botî dekem!

ew car seyrî Daykî û mame hawkarî kirdu wtî:
– min jûrekey xom dedem be mame hawkar û ple bêgerd û jêwer, axir ewe key jûre, ke ewan heyane, çon Mall tenya yek jûrî debê?

Wellameke wek skill zarî sûtandim, bellam naçarbûm, debû wellamî bdemewe ..

wtim: axir Gyanî babe, ne ewan vîzay hatne allmanyayan heye, ne jûrekey toş hî xomane !

Wellamekey belawe seyirbû, kemêk ramaw zmanî pirsînî pja:
– çon jûrî xoman nîye, ey hî kêye? Boçî ewan natwanin bên, vîzayan boçîye, hezyan lewêye û tewaw !

Ey meger to netgut, mame hawkar bexoy westaye û xanubere drustdekat, eger westaye, edî boçî xanûyekî cwan û gewrey sê jûrî bo xoyan drustnakat, ha pêmnallêy boçî ?

جاڕی گه‌ردوون

چه‌ند خوله‌كێك لێپرسينه‌وه‌ بوو به‌چه‌ند مانگ، ئیدی كه‌سێك نه‌بوو دڵنيانه‌بووبێت و بۆی ڕۆشننه‌بووبێته‌وه‌، گيرانه‌كه‌ی په‌يوه‌ندی به‌دامه‌زراندنه‌وه‌ی ده‌زگەی ئاسايیشه‌وه‌ هه‌يه‌، كه‌ له‌ سه‌رده‌می ڕاپه‌ڕيندا له‌لايه‌ن جه‌ماوه‌ری تێكشكێندرابوو، ڕۆژی فيدراڵی له‌ كوردستان، ڕۆژی مانۆری هێز بوو بۆ ترساندنی جه‌ماوه‌ر له‌وه‌ی كه‌ هه‌ر هه‌نگاوێك دژی شه‌ڕ، به‌گرتن و ئه‌شكه‌نجه‌ وه‌ڵامده‌درێته‌وه‌. چه‌كداره‌ شڕه‌خۆره‌كانی ئه‌فواج خه‌فيفه،‌ كه‌ جه‌ماوه‌ر ملكه‌چی كەتواری كردبوون … ئه‌وڕۆكه‌ ئاسایيش پارێزبوون ! ڕه‌شبگيری ڕۆژی جاردانی فيدراڵی، خه‌ڵكی له‌و خه‌وه‌ داچڵه‌كاند، كه‌ له‌ سايه‌ی كوڕانی گه‌ل و نيشتمان چاوه‌ڕێی هه‌ڵهاتنیخۆر بوون. ڕاڕه‌وی نێوان ژووره‌كان وه‌ك ڕۆژه‌كانی ده‌ساڵ له‌وه‌وبه‌ر ژوور به‌ ژوور زيندانیيه‌كان بۆ سه‌رژمێركردن، ڕێزكرانه‌وه‌. پاسه‌وانه‌كان لووله‌ی چه‌كه‌كانيان ئاراسته‌ی نيگای پڕ پرس و چاوه‌ڕوانی زيندانیيه‌كان ڕاگرتبوو، زيندانه‌وان (‌عەبدولخالق) ده‌تووت ياریيه‌ چه‌قاوه‌سووییەكانی سەردەمی مناڵی خۆی وه‌بيرهاتووەتەوه‌، خێرا خێرا ده‌ستی بۆ زيندانییەكان ڕاده‌كێشا ده‌ستی ئاراسته‌ی دواكه‌س ده‌كا …

– تۆ .. ٣٣

زيندانی ژمارە ٣٣ : ئالان محه‌مه‌د عه‌لی

عەبدولخالق : چییی؟ جارێكی دیكە

ئالان : ئالان محه‌مه‌د عه‌لی.

عەبدولخالق : نه‌خێر، تۆ يه‌كه‌م جار ناوێكی دیكەت گووت.

ئالان : نه‌خێر، هه‌ر ئاوھام وت.

عەبدولخالق : ئمم، با ئاوھابێت. خێرا برۆنه‌وه‌ ژووره‌وه‌، خۆتان كۆبكه‌نه‌وه‌. له‌ بيرتان نه‌چێت، نێو ژووره‌كه‌ش خاوێنبكه‌نه‌وه‌، ئه‌گينا …

لەتەك ژيانه‌وه‌ی هيوايه‌ك، هێز وه‌به‌ر ئه‌ژنۆ و بزه‌ بۆ سه‌ر لێو ده‌گه‌ڕايه‌وه‌. به‌خێرايی پرسياره‌ بێئه‌ژماره‌كان، هه‌نگاوه‌كان پێشبركێانده‌كرد. هه‌ر كه‌سه ‌و له‌ناخی خۆیدا، خۆزگه‌يه‌كی ده‌خواست و به‌رنامه‌ی بۆ شتێك داده‌ڕشت، كه‌ لەتەك يه‌كه‌م چركه‌ی ده‌رچوون و ئازادبوون، چیبكات. له‌ خۆشياندا، به‌په‌له‌ نێو ژووره‌كه‌يان ئه‌م ديو ئه‌و ديو كرد، ده‌توت چاوه‌ڕوانی ميوانێك ده‌كه‌ن ، يان له‌سه‌ر سه‌فه‌رن هه‌ريه‌كه‌ شتێكی ده‌گووت:
– من نه‌مگوت هيچ نیيه،‌ به‌رده‌بين …

– بابه‌ گيان خۆ پياوماننه‌كوشتووه‌، هه‌ر ده‌بێ ئازادبين …

– كاكه‌ ئه‌مانه‌نش هه‌قی خۆيانه‌ له‌خه‌ڵك بپرسنه‌وه‌، چاك و خراپ
هه‌يه ‌…

– ئه‌دی كو كاكه‌، هه‌ر پياو تووشی ده‌ردیسه‌ری ده‌بيتن …

– ئه‌م قسانه‌ هێنده‌ی دیكە خۆزگه ‌و هيواكانی سامان و ئارام و ‘ئالان’یان وه‌به‌ر پێله‌قانده‌دا …

ئالان : ئه‌وه‌ چيتانه‌ ئاوا كه‌وتوونه‌ته‌ ماستاوساردكردنه‌وه‌، مه‌گه‌ر قسه‌كانی خۆتان له‌بيرچوونه‌وه‌، كه‌ دوێنێ شه‌و چۆن كه‌ستان به‌م بارە‌ ڕازینه‌بوون، بۆ پێتانوايه‌ ئازادده‌بن؟ نا به‌هه‌ڵه‌داچوون، گه‌ر ئازادبوونايه،‌ سه‌ره‌تا بانگده‌كران و لێپرسينه‌وه‌ ده‌كرا و پاشان به‌ڵێنيان لێوه‌رده‌گرتن، كه‌ جارێكی دیكە كاری دژی ياسا نه‌كه‌ن و گوێڕايه‌ڵبن، هه‌روا به‌ئاسانی ميوانداریيه‌كه‌ ته‌واو نابێت !

كوڕه‌ ئاغا : خواده‌كات به‌رەڵامده‌كه‌ن، من مه‌منوون و تا ماوم له ‌قسه‌يان ده‌رناچم.

سامان : بۆ پێتوايه‌ ئێستاكه‌ خه‌ريكی چيت، ئێستاش هه‌ر بەكرێگیراوی ئه‌وانیی، تۆ زيندانی نيت، هه‌ر كات وه‌رسبی ده‌توانیت بڕۆیت !

كوڕه‌ ئاغا : ده‌متبگره‌، ئه‌گينا ئێستا عه‌بدولخالقی زيندانەوان بانگده‌كه‌م.

ئالان : جا بۆ بانگی ناكه‌ی، له‌وه‌ زياتر چیده‌كه‌ن، كه‌ كردوويانه‌، خۆ‌ زيندانێكی دیكە له‌نێو ئەم زيندانەدا دروستناكه‌ن؟! ئێمه‌ به‌ئاشكرا ده‌ڵێن، كه‌ خۆيان و سه‌ركرده‌كانيان خوێنخۆر و خوێنڕێژی خه‌ڵكن، خه‌ڵك ڕاپه‌ری و ده‌زگه‌كانی ئاسايش و پۆليس و سه‌ربازگه‌كانيان تێكشكاندن، ئه‌وان لەو دیو سنوورەكانەوە هاتنەوە و دەزگەكانی سەركوتیان تازه‌كردنه‌وه‌. له‌بيرتانچوو، كە له‌ ڕاپه‌ڕينی دووه‌مدا چۆن هه‌ر ئه‌م جه‌نابانه‌ لەتەك ئه‌منه‌كاندا له‌به‌رده‌م پارێزگه‌ ده‌ستيان به‌سه‌ر جه‌سته‌ی له‌خوێنگه‌وزاوی چه‌ند كه‌سدا گرت، كه‌ به‌ده‌ستی به‌عسیيه‌كان كوژرابوون. لێژنەی ھاریكاری بەرەی كوردستانی و بەعس، ده‌ستی به‌سه‌ر جه‌سته‌ی ‘ئاراس مەولود’دا گرتبوو ؟

سمايل: بابه‌گيان وازبێنن، كه‌ی كاتی ئه‌وه‌يه‌، بابزانين چيمانبه‌سه‌ردێت، ئه‌وسا شه‌ڕبكه‌ن.

ته‌قوهوڕی كرانه‌وه‌ی ده‌رگه‌، وشه‌كانی له ‌زاردا پچڕاند، عه‌زيزی پاسه‌وان و چه‌ند چه‌كدار : هه‌ستن، به‌ڕيز ده‌ستی يه‌كدی بگرن و به‌هێواشی به‌دوامدا وه‌رن !

لووله‌ی چه‌كه‌كان به‌ڕووی پرسياره‌ سه‌ربزيوه‌كاندا هه‌ڵشاخانه‌وه‌، هه‌نگاوه‌ لاوازه‌كان به‌دوای چاويلكه‌ی خوزگه‌كانه‌وه‌ ده‌كشان و له‌ ساڵۆنه‌كه‌ی ئه‌وبه‌ر به‌ربه‌ستكرانه‌وه‌. بۆنی بۆياخی ژووره‌كان، مشته‌كۆڵه‌ی له ‌ده‌می حه‌زه‌كان ده‌دا. شوێنه‌واری نووسين و ياداوەری زیندانیانی سه‌رده‌می به‌عس هێشتاكه‌ مابوون. له ‌چاوی واقووڕماو و دڵه‌ خه‌مگرتووه‌كانه‌وه‌ پرسياری په‌رێشان و نائارام، خۆيان به‌ ته‌لبه‌ندی په‌نجه‌ره‌ ژه‌نگنيه‌كه‌دا ده‌دا و په‌لوپۆشكاو، له‌تاو ناڵە و ھاواری ئه‌شكه‌نجه‌دراواندا ده‌بوورانه‌وه‌. گومان ئه‌ژنۆی خۆزگەكانی شكاندبوو:
– له‌وانه‌يه‌ لێره‌ چاوه‌ڕێی لێكۆڵینەوە بكه‌ين …

– له‌وانه‌يه‌ بۆ هه‌ميشه‌ لێره‌ بين …

– له‌وانه‌يه‌ چاوه‌ڕێی ده‌ستووری ئازادبوونمان بكه‌ن ….

– له‌وانه‌يه‌ تاوانبار و بێتاوان لەیەكدی جيابكه‌نه‌وه …

ئارام : به‌ڵام من پێموايه‌ به‌شی دووه‌م ميوانداریيه‌كه، لێرە‌ ده‌ستپێده‌كات.

سامان : بزانه‌ چ فێڵ و ته‌له‌كه‌يه‌ك له‌ژێر سه‌رياندايه ‌ !

ئالان : له‌وانه‌يه‌ زيندانیانی دیكەیان هێنابن و ئێمه‌ كۆنه‌كان له‌به‌ر بەرتەریبوون ڕێزيان بۆ دانابين و وەك كۆنه‌ ….

جيره‌ی ده‌رگه‌كه‌ زنجيره‌ی خه‌ياڵەكان ده‌پسێنێ و خه‌و له‌چاوی حه‌زه‌ برينداره‌كان ده‌زڕێنێ. دره‌وشانه‌وه‌ی تيشكی گڵۆپه‌كه‌ له‌سه‌ر پرچی زه‌رد و لێوی سووری دوو خاتوونی جوان و شيكپۆش، وەڵام به‌ بۆچییەتی و گومانە ناخئاژنه‌كان ده‌داته‌وه‌. گۆنای ئاڵ و باسكی سپیوسۆڵيان، سوێيان وه‌به‌ر ڕه‌به‌نی دێنايه‌وه‌. به ‌نه‌رمه‌ جووڵه‌يه‌ك وشه‌ی هه‌لە‌و له‌سه‌ر زاريان سه‌مای ده‌كرد … پێكه‌نين و به‌زه‌يی، ئاوێزانی یەكدی بووبوون، بڵێسه‌ی نيگا به‌ربه‌ست-كراوه‌كان ئاوێزانی باسك و گه‌ردنيان ده‌بوو … ده‌نگی پياوه‌ هاوكاره‌كه‌يان، هه‌نگاوی خه‌ياڵه‌ سه‌رشێته‌كانی سڵمانده‌وه …

– من وه‌رگێرم، لەتەك ئه‌م دوو خاتوونه‌ هاتووم، تاكو چاوپێكه‌وتنتان له‌تەكدا بكه‌ين، ئه‌م دوو خاتوونه‌ ڕۆژنامه‌گه‌رن، ئه‌گه‌ر ئاماده‌بن، ئه‌وا چاوپێكه‌وتنتان لەتەكدا ده‌كه‌ين.
لەتەك دانيشتنيان له‌ نێوه‌ڕاستی ژووره‌كه‌دا، زيندانیيه‌كان لە دەوريان خربوونه‌وه‌، دوو پاسه‌وانيش له ‌ده‌رگه‌ی ژووره‌كه‌دا چه‌قيبوون و چاويان له‌ زيندانه‌كان زه‌قده‌كرده‌وه‌. له‌سه‌ر زاری هه‌ريه‌كێك، خه‌روارێك سكاڵا نۆره‌يان بۆ چرين گرتبوو، به‌چرنووك كاتيان ڕاده‌گرت، تاوه‌كو نۆره‌يان بێت. وشه‌كان له‌زاردا وه‌ك باڵدارێك له ‌قه‌فه‌ز هه‌ڵده‌هاتن و له‌سه‌ر په‌ڕاوی خاتوونه‌كان ده‌نيشتنه‌وه ‌… جارجاره‌ حه‌زه‌ كۆتكراوه‌كانی ڕه‌به‌نی نيگا جادوويی-يه‌كانيان ڕاده‌مووسی و به‌دزی لووله‌ی چه‌كه‌كانه‌وه‌ تێكه‌ڵ ده‌بوون، هه‌ندێك جار هه‌سته‌كان يه‌گتريان ده‌دواند و په‌يامه‌ نهێنیيه‌كانيان به‌يه‌كدی ده‌گه‌ياند. وشە‌ ياساخه‌كان پاسه‌وانه‌كانی هه‌راسانده‌كرد و پيشيانده‌خوارده‌وه‌…

وه‌رگێر : خاڵه‌ ناوتان چیيه ‌و خه‌ڵكی كوێن ؟

زيندانی : من ناوم مه‌ولووده‌ و خه‌ڵكی ئه‌م شاره‌م ( هه‌ولێر )، زياتر
له‌ (٢٠) ساڵه‌ كرێكاری كارگه‌ی جگه‌ره‌م.

وه‌رگێر : ته‌مه‌نت چه‌ند ده‌بێت؟

مام مەولوود : ٥٧ ساڵ‌ .

وه‌رگێر : له‌سه‌ر چی گيراوی ؟

مام مه‌ولوود : نازانم .

پاسه‌وان : درۆ ده‌كات، چۆن نازانێت !

وه‌رگێر : له‌كوێ گيرایت؟

مام مه‌ولوود : له‌ ماڵه‌وه‌ خه‌وتبووم .

وه‌رگێر : لێكۆڵینەوەت له‌تەكدا كراوه‌ ؟

مام مه‌ولوود : نه‌خێر .

وه‌رگێر : سه‌ر به‌ چ پارتێكی ؟

مام مه‌ولوود : هيچ پارتێك.

وه‌رگێر : پێشتريش هه‌روا ؟

مام مه‌ولوود : به‌ڵێ، سه‌ر به‌ هيچ پارتێك نه‌بووم، به‌ڵام هه‌ميشه‌ دژی به‌عس بووم.

وه‌رگێر : زۆر باشه‌ مامه‌، سوپاس.

مام مه‌ولود : ئاخر كاكه‌ تاكه‌ی ئە‌مه‌ لێرۆكانه‌ بين، بۆ ناهێڵن، ژن و مندارمان بێنه‌ كنمان ؟

وه‌رگێڕ : خاڵە، ئێمه‌ هيچمان پێناكرێ، من وەرگێڕم و ئەوانیش ڕۆژنامه‌گه‌رن.

وەرگێڕ : ئه‌ی تۆ خاڵه‌ گيان، ناوتان چیبوو ؟

زيندانی : خدر حه‌مه‌د ئه‌مين .

وه‌رگێر : بۆ گيراوی ؟

مام خدر : نازانم

وه‌رگێر : كارت چیيه‌ ؟

مام خدر : سايق لۆری .

وه‌رگێر : له‌كوێ گيراوی ؟

مام خدر : چوو بووم بۆ سه‌ردانی خزمێكمان له ‌ته‌يراوا، لە ماڵی ئەوان‌.

وه‌رگێر : سه‌ر به‌ چ پارتێكی ؟

مام خدر : هيچ پارتێك، به‌ڵام كوڕه‌كه‌م شه‌هيدی پارتیيه‌.

پاسه‌وان : درۆی ده‌كاتن، پياوخراپه ‌ !

مام خدر : كوڕم پياوخراپ له ‌ده‌رێيه‌، كه‌يف ده‌كاتن !

وه‌رگێڕ : ئه‌ی تۆ براده‌ر، بۆچ نايێيته‌ پێشێ، ناوت چیيه‌ ؟

زيندانی: من ئاماده‌ نيم وه‌ڵام بده‌مه‌وه‌، تاوه‌كو نه‌زانم بۆچ گيراوم !

وه‌رگێر : به‌ڵێ، چۆنت پێباشه‌.

زيندانیيه‌كی دی: ئه‌من ناوم ئا‌زيزه‌.

وه‌رگێر : خه‌ڵكی كوێی ؟

ئا‌زيز : خه‌ڵكی هه‌ولێرێ.

وه‌رگێر : له‌سه‌ر چی گيراوی ؟

ئا‌زيز : نازانم، له‌سه‌ر براكه‌م، براكه‌شم له‌سه‌ر برا گه‌وره‌كه‌م، برا گه‌وره‌كه‌شم له‌سه‌ر من.

وه‌رگێر: تێنه‌گه‌يشتم، مه‌به‌ستت چیيه‌، بۆمان ڕوونناكه‌يته‌وه‌ …

خاتوونه‌كان : ڕوو له‌ وه‌رگێڕ چي وت، پێمان بڵێ ؟

وه‌رگێڕ : لێیتێنه‌گه‌يشم، داوامكرد مەبەستەكەی ڕوونبكاته‌وه‌…

ئا‌زيز : ئێواره بوو، كاتێك كە گه‌ڕامه‌وه‌ ماڵ، وتيان خۆتبشاره‌وه‌ به‌دواتدا ده‌گه‌ڕێن، منيش وتم بۆ؟ وتيان مەحموو‌د و زەردەشت له‌سه‌ر تۆ گيراون.

وتم چۆن له‌ كوێ؟ وتيان سه‌ره‌تا مەحموو‌د، پاشان وتويانه‌ تا زەڕدەشت نەی‌ێت، ئەو ئازادی ناكه‌ين، كه‌ زەڕدەشت چووه‌، ئه‌ويش گيراوه‌ و وتويانه‌ تا ئا‌زيز نەی‌ێت، ئەوان ئازاد نابن، منيش بەبێ سێ و دوو هاتم تاكو براكانم ئازادبكەن. ئاخر ماڵ و منداڵيان هه‌يه ‌و براگه‌وره‌كه‌م تا ڕاپه‌ڕينه‌كه‌ بەخۆی پێشمه‌رگه‌ بووه، بەڵام نە ئەوان ئازادكران، نە بەمنیشیان گوت، لەسەرچی دەمانگرن ‌.

وه‌رگێر : كارت چیيه‌ ؟

ئا‌زيز : ئێمه‌ چوار براين، وێنه‌گرين.

وه‌رگێر : پله‌ی خوێنده‌واريت چه‌نده‌؟

ئا‌زيز : له‌به‌رئه‌وه‌ی نه‌خۆشی بورانه‌وه‌م هه‌بوو، نه‌متوانی خوێندن ته‌واوبكه‌م.

خاتوونه‌كان: پرسيار له‌و لاوه‌ی دیكە بكه‌، زۆر په‌رێشان دياره‌ !

وه‌رگێر : كاكە، وه‌ره‌ پێشێ، نزيك به‌رەوه‌، ناوت چیيه‌ ؟

لاوه‌كه‌ : عبدالنادر.

وه‌رگێر : كارت چیيه‌ ؟

عبدالنادر : خوێندكاری زانكۆم، دوای خوێندنيش له‌ سەرتاشی‌ كارده‌كه‌م.

وه‌رگێر : له‌كوێ گيراویت ؟

عبدالنادر : له‌ ماڵه‌وه‌.

وه‌رگێر : بۆ گيراویت ؟

عبدالنادر : نازانم

وه‌رگێر : چۆن گيرايت ؟

عبدالنادر: له‌ ماڵه‌وه‌ بووم. كاتێك زانيمان، له‌ سه‌ربانه‌وه ‌چه‌كدار دابه‌زينه‌ حه‌وشه‌كه‌مان، ميلی چەكیان لێڕاكێشام و ده‌ستگيريان-كردم. دايكم باوه‌شی پێداكردبووم، نه‌يده‌هێشت بمگرن، به‌ڵام بێسوود‌ بوو. چه‌كدارێكيان قۆنداخە تفەنگێكی له ‌دايكم دا و قوڵی دايكم شكا، منيش په‌لامارم دايێ و ئیدی هه‌ر ئه‌وه‌نده‌ دونيام دیت، وه‌ك جلكه‌كۆنيان لێكردم.

پاسه‌وان : قوربان درۆده‌كاتن، كابلی ته‌له‌فۆنی دزيوه،‌ بۆيه‌ ده‌ستگيركراوه‌.

عبدالنادر : من نه‌ دزم و نه‌سه‌ر به‌هيچ پارتێكم. ئه‌مانه‌ درۆده‌كه‌ن. ئه‌وانه‌ ده‌ستی دايكميان بۆ شكان، گه‌ر من دزم ئه‌مانه‌ی دیكە بۆچی گيراون ؟

خاتوونه‌كان : ئه‌و چه‌كداره‌ چی گوت ؟

وه‌رگێڕ : ده‌ڵێت درۆده‌كات، ئه‌وە‌ دزه‌ .

خاتوونه‌كان : داوايان لێبكه‌ با بچنه‌ده‌ره‌وه‌، يان ئێمه‌ ده‌چينه‌ده‌ره‌وه‌ ؟

وه‌رگێر : كاكه‌ وا خاتوونه‌كان داواده‌كه‌ن، كه‌ ئێوه‌ بچنه‌ده‌ره‌وه‌ !

پاسه‌وانه‌كان: ئاگاتان له‌ زارتان بێت، پاشان بەخۆتان ده‌زانن، پێتانوانه‌بێت ئه‌م قسانه‌ بڵاوده‌كرێنه‌وه‌ !

وه‌رگێر : تۆ ناوت چیبوو ؟

زيندانی: من

وه‌رگێر : به‌ڵێ تۆ !

زيندانی: من ناوم، ئارامه‌. ئێمه‌ سێ كه‌سين، پرسياره‌كان ئاراسته‌ی ئه‌م هاوڕێيه‌مان بكه‌ !

وه‌ڕگێر : فه‌رموو، ناوتان چی بوو ؟

زيندانی: ئالان محه‌مه‌د عه‌لی.

وه‌رگێر : خه‌ڵكی كوێی ؟

زيندانی : كه‌ركووك.

وه‌رگێڕ : له‌كوێ گيراویت ؟

ئالان : له‌ماڵه‌وه‌، دوو كه‌س بووين. ئه‌و هاوڕێيه‌مان له ‌سلێمانیيه‌وه‌ به‌سه‌ردان بۆ لای ئێمه‌ هاتووه ‌و كە زانیویەتی ئێمە گیراوین، چووەتە لای (عقید سمكۆ) و هه‌واڵی ئێمەی پرسیوە، يه‌كسه‌ره‌ ئەویشیان گرتووه‌.

وه‌ڕگێڕ : له‌ چ پارتێكدا كارتانده‌كرد ؟

ئالان : ئێمه‌ كۆمۆنيستين .

وه‌رگێر : مه‌به‌ستان په‌كه‌كه‌يه‌ ؟

ئالان : نه‌خێر، په‌كه‌كه‌ ناسيوناليستن.

وه‌رگێڕ : كارتان چیبوو ؟

ئالان : پەرتووكفرۆش.

وه‌رگێر : پەیوەندیتان لەتەك په‌كه‌كه‌ چۆنه‌ ؟

ئالان : ھیچ پەیوەندیمان نیيه‌، بۆ ئێمه‌ هه‌ردوو لای شه‌ڕكه‌ وه‌ك يه‌كن، ئێمه‌ دژی ئه‌م شه‌ڕه‌ين.

وه‌رگێر : ئه‌شكه‌نجه‌دراون ؟

ئالان : ئه‌شكه‌نجه‌ی جۆراوجۆر، ئه‌شكه‌نجه‌ی ده‌روونی و جه‌سته‌يی هه‌موو شتێ ده‌كه‌ن. هه‌ر ئه‌وه‌نده‌ی كه‌ ئێمه‌ ئازاديمان لێ زه‌وتكراوه‌، بۆخۆی گه‌وره‌ترين ئه‌شكه‌نجه‌يه‌، زيندان زيندانه،‌ چ ئه‌شكه‌نجه‌ بدرێی يان نه‌. سه‌رله‌به‌يانی ڕۆژی ڕه‌شبگيریيه‌كه‌ی ڕۆژی فيدراڵه‌ت، دژی دامه‌زراندنه‌وه‌ی ده‌زگه‌ی ئه‌من وه‌ستاينه‌وه‌، هه‌ر له‌سه‌ر ئه‌و شتانه‌ش گیراوين.

وه‌رگێر : زۆر سوپاس كاكه‌ گيان، با پرسيارێكيش ئاراسته‌ی هاورێكه‌ت بكه‌ين

– تۆ چۆن گيرايت برا ؟

ئارام : من ئه‌مڕۆ له‌ سلێمانیيه‌وه‌ هاتم، كه‌ چوومه‌ ماڵی ئه‌م ھاوڕێیانەم، دراوسێكانيان وتيان “ئاسايش گرتوونی”. منيش يه‌كسه‌ره‌ هاتمه‌ لای به‌ڕێوه‌به‌ری ئاسایيش و لێم پرسی بۆچی و لەسەرچی گيراون، له ‌وەڵامدا وتی “ياخوا به‌خێر بێيت، كاكی كۆمۆنيست، زۆرچاكه‌ به‌پێی خۆت هاتووی”.

وه‌رگێڕ : خاتوون … وابزانم، ڕوونه‌.

خاتوونه‌كان : ئۆكه‌ی ..

جيره‌ی ده‌رگە،‌ كۆتری نيگا تامه‌زرۆكانيانی هه‌ڵفڕاند و خۆزگه‌كان له ‌ژانی دابڕاندا ده‌تلانه‌وه‌.

پاسه‌وان : كاكه‌، كاتی چاوپێكه‌وتنه‌كه‌ ته‌واوبووە، كاك سمكۆ گازتان ده‌كات.

خوێن زابووه‌ ده‌ماری خۆزگه‌كانه‌وه‌، لەتەك نيگای به‌زه‌يی ئاوێزانی يه‌كدی بووبوون و بزه‌يان له‌سه‌ر لێوه‌ ڕه‌قهه‌ڵهاتووه‌كان ده‌چاند و وشە‌ ياخیيه‌كان له‌ دووتوێی په‌ڕاوی خاتوونەكانه‌وه‌ هه‌ڵپه‌ی هه‌ڵهاتنيان بوو. بريسكه‌ی خه‌ونه‌كان له‌سه‌ر به‌رده‌ نێژراوه‌كانی قەڵا ده‌دره‌وشانه‌وه‌. كۆتره‌ لانه‌وازه‌كان گۆرانييان بۆ سه‌رخه‌وێكی بێ پاسه‌وان ده‌چڕی. له‌ كپی شه‌وه‌زه‌نگدا، ئاوازه‌ی ئەوین، ڕازه‌ ته‌نياكانی ده‌هۆنیيه‌وه ‌و ده‌يكردنه‌ ملی ئه‌ستێره‌ چاوورديله‌كان، تا ڕێبوارانی خه‌ونه‌ناس له‌ كه‌شكۆڵی ئاواره‌يیەدا بيانپارێزن. خه‌ونه‌ سرگه‌كان، برينه‌ كۆنه‌كانی سامان و ‘عه‌لی’يان ده‌هێنايه‌وه‌ سۆ و ده‌روونی لێوانلێوی خه‌م و په‌ژاره،‌ ده‌نگه‌ژێی حه‌زه‌كانيانی له‌رانده‌وه‌، ئه‌شكی چاو و پڵمه‌ گريانی په‌نگخواردووی سۆزه‌ وێڵه‌كان ته‌قينه‌وه‌. ده‌نگی ده‌ستڕێژێ ڕووناكی له‌ گڵۆپ و ھاواری له ‌قوڕگدا بڕین، ده‌ستڕێژ به‌ده‌ستڕێژه‌وه‌ ده‌نرا و جنێو به‌گه‌رووی جنێودا ده‌چزا… شه‌ق و پيلاقه‌ی سه‌رپشتی نامۆ، جيڕه‌ی له‌ ده‌رگه‌ هه‌ستاند و جه‌سته‌ی له‌خوێنگه‌وزاويان كرده‌ مۆمێ بۆ تيشكدانه‌ چاوی پرسياره‌ بزێو و نائارامه‌كان.

پاسەوان : سه‌گی كوڕی سه‌گ، ته‌قه‌ی له‌ سه‌ياره‌ی كاك كۆسره‌تی ده‌كه‌ی، ده‌بخۆ ئه‌وه‌ ده‌ردت بێت.

نامۆ : كه‌ره‌ من نه‌بووم، من پێشمه‌رگه‌م. بۆ ئاوھام لێده‌كه‌ن،

دايك … ينه‌ !

پاسه‌وان : ده‌رگه‌كه‌ به‌توندی به‌ڕووی پرسياره‌كه‌ی نامۆدا داده‌خات.

ده‌موچاوی توكن و ڕوخساری دێوانه‌ی نامۆ و ڕێچكه‌به‌ستنی خوێن له‌ برينه‌كانیيه‌وه،‌ چه‌خماخەی‌ له ‌بيری زيندانیيه‌كان ده‌دا و بارانی پرسيار به‌سه‌ريدا ‌باری :
– :بۆ ته‌قه‌ت له ‌كۆسره‌تی كرد … ؟

– : خه‌ڵكی كوێی … ؟

– : سه‌ر به‌ چ پارتێكی …؟

– : ناوت…؟

نامۆ : ناوم ‘مه‌مۆ’ يه‌ خه‌ڵكی كه‌ركووكم، پێشمه‌رگه‌ی گه‌رميانم.

– : ئه‌دی بۆ واتكردووە، ماڵخراپ ؟

مه‌مۆ : هيچم نه‌كردووه‌، له‌ نادی به‌ره‌و ماڵ ده‌رچووم ، بوو به‌ته‌قه ‌و له‌و نێوەدا‌ من گيرام.

– : هه‌ر ئاوھا له‌خۆڕا ؟

مه‌مۆ : ئه‌ی چی!

– ئه‌ی ته‌قه‌تان له‌كێ كردووه؟

مەمۆ:‌ ها ها ها، ئای باڵم !

– : كێ ته‌قه‌ی لێكردی، تۆش ته‌قه‌ت له ئە‌وان كرد، كوێنده‌رێت برينداره‌ ؟

مه‌مۆ: بوتڵه‌ عاره‌قێكم پێبوو، داميانه‌ به‌رده‌ستڕێژ و بێهۆش كه‌وتم، ئیدی نازانم، به‌پێله‌قه‌ی عه‌قيد سمكۆ به‌ئاگاهاتم…

جيڕه‌ی ده‌رگه،‌ قسه‌ شه‌كه‌ت ‌و بێگيانه‌كانی مه‌مۆيان بڕی و ده‌موچاوی هه‌ڵپێچراوی ئەشكەنجەدەران عه‌بدولخالقی پارتی و عه‌لی یەكێتی، ڕازه‌كه‌ی مه‌مۆيان له‌سه‌ر لێوی كفنكرد. لەتەك هه‌ر پرسيارێ جێكوته‌كی فيفتی فيفتی له‌سه‌ر جه‌سته‌ی ڕووت و هه‌ڵواسراوی مه‌مۆ ده‌نه‌خشێنرا.

عەبد‌ولخالق : قه‌حبه‌ باب، ده‌تويست كاك كۆسره‌تی بكوژی، كێ هانيداوی، به‌عس ؟

مه‌مۆ : ئه‌ی هاوار من پێشمه‌رگه‌م، كوشتنی چی و به‌عسی چی، ئای …

عه‌لی : سه‌گباب قسه‌ بكه‌، كێن ئه‌وانه‌ی دیكە، كه‌ له‌تەكتدا بوون ؟

مه‌مۆ : من له‌ مه‌يخانه‌ بووم و چه‌كم پێنه‌بووه‌، ده‌توانن بپرسن، ئای پشتم …

عەبد‌ولخالق : دان به‌ تاوانه‌كه‌تدا بنێ، نكۆڵیكردن بێسووده ‌ !

مه‌مۆ : ئای.. ئای .. ئاااااااااااااای

هاوار و ناڵه‌ی مه‌مۆ و زرمه‌ی تێڵا و پێله‌قان، ئاوازه‌ی مه‌گ بوو، خه‌وی له‌ چاوی خۆزگه‌كان ده‌زڕاند. ده‌نگی ژان له‌ قورگی ڕاڕه‌و و هۆڵه‌كاندا ده‌له‌ریيه‌وه ‌و ده‌بووه‌ مۆته‌كه‌ی سه‌ر دڵی ئەوینێكی لانه‌واز. ئاهی ژان تێكەڵ به‌ گمه‌ی كۆتران ده‌بوو و سروه‌ی ساردی پاييزی ده‌يچرپانده‌ گوێی مناڵه‌ له‌برسانه‌خه‌وتووه‌كانی نێو كه‌لاوه‌كانی دەوروبەری قەڵا. زرموهوری كوته‌ك و پێله‌قان له‌ چاوه‌ڕوانی زيندانیيه‌كاندا، چركه‌ چركه‌ تێپه‌ڕبوونی شه‌وگاری له‌ هه‌نگاوی به‌ياندا ده‌ژمارد. جووڵانه‌وه‌ی سێبه‌ره‌ ئه‌شكه‌نجه-‌ده‌ره‌كان له‌سه‌ر ديواره‌كه‌ی به‌رامبه‌ر، شانۆيه‌كی وێوڵه‌يی بوو بۆ ترساندن و ئه‌شكه‌نجه‌ی ده‌رونیی ئەمان. به‌ده‌م دوا نوزه ‌و نركه‌ی ‘مه‌مۆ’وه‌ كازيوه‌ به‌بزه‌يه‌كی تاڵه‌وه‌ مه‌ينه‌تئاواكانی ده‌وری قەڵای لە خەو بەئاگاھێنا. له ‌ژاوه‌ژاوی سه‌رله‌به‌يانیدا جه‌سته‌ ئه‌شكه‌نجه‌-دراوه‌كان ونبوون.

جيڕه‌ جيڕی ده‌رگه‌ زنجيره‌ی خه‌ياڵه‌ ئاڵۆزه‌كانی بڕی و ڕيشی چڵكنی پاسه‌وانه‌كه‌ به‌چاوی چاوه‌ڕوانیدا ڕۆده‌چوو …

پاسه‌وان : فه‌رموو فه‌رموو

ميوان : سوپاس.

پاسه‌وان : ئه‌وه‌ هاتييه‌ لێتانبپرسێت ..

مام مه‌ولود : ئه‌دی كو قسه‌ی لەتەك بكه‌ين، كوا وه‌رگێڕ ؟

پاسه‌وان : خۆتان به‌ ئينگليزی قسان بكه‌ن !

ميوان : كه‌سێك هه‌يه‌ به‌ئاڵمانی يان ئينگليزی قسه‌بكات ؟

عه‌لی : به‌ڵێ من، ده‌توانم به‌ئاڵمانی بدوێم، به‌ڵام ئاماده‌نيم به‌خۆم وەڵامی پرسياره‌كانت بده‌مه‌وه ‌ !

ميوان : باشه‌، من ‘نوێنه‌ری ڕێكخراوی مافی مرۆڤ’م و خەڵكی ئاڵمانیام، هاتووم ئێوه‌ به‌سه‌ر بكه‌مه‌وه ‌و بۆ ئه‌وه‌ش پرسيار ئاراسته‌ی چه‌ند كه‌سێكتان ده‌كه‌م.

مام خدر: ئه‌دی كو ده‌بێ نه‌ كاخه‌ز و نە پێنووس نه‌ ده‌نگتۆماركه‌ری پێيه‌، كو وا ده‌بی ؟

میوان: به‌ڵێ، ڕاستده‌كه‌یت، ئاوھايه‌، بەڵام لێرە ڕێگه‌يان پێنه‌دام ئه‌و شتانه‌ لەتەك خۆم بێنمه‌ ژوورێ. هه‌ر چۆنێك بێت، من قسه‌تان لەتەك ده‌كم و هه‌وڵده‌ده‌م جارێكی دیكە له‌ لێپرسراوانی حكومه‌تی هه‌رێم مۆڵه‌ت وه‌رگرم. ئێستاكه‌ كێ ئاماده‌يه‌ وەڵامبداته‌وه‌ ؟

ئارام : من ئاماده‌م، به‌مه‌رجێ ده‌نگمان بگه‌يێنيته‌ ده‌ره‌وه‌ .

میوان : باشه‌، تۆ بۆ دەستگیركراویت؟

ئارام : من هاتم هه‌واڵی هاوه‌ڵه‌كانم بزانم، منيشيان گرت .

میوان: ئه‌شكه‌نجه‌ دراویت ؟

ئارام: به‌ڵێ، ده‌روونی و جه‌سته‌يی. ئه‌شكه‌نجه‌ی ده‌روونی به‌رده‌وامه‌.

جيره‌ی ده‌رگه ‌و سيمای ‘ملازم بورهان’ دڕی به ‌پرسياره‌كه‌ دا:
– : ئه‌زبه‌نی، ئه‌ڤه‌ جه‌نابی كاك سمكو ژ بو ته‌ نارد.

میوان : سوپاسی منی پێبگه‌يێنه‌.

پاسه‌وان : سەرچاڤا، بە خاترا تە..

میوان : باشه‌ كه‌ تۆ سه‌ر به‌ په‌كه‌كه‌یت، ئايا ليپرسينه‌وه‌ت له‌تەكدا كراوه‌ ؟

ئارام : په‌كه‌كه‌ نيم، من كۆمۆنيستم، تا ئێسشتاكه‌ش له‌ ئێمه‌يان نه‌پرسيوه‌ته‌وه‌.

میوان : حكومه‌تی هه‌رێم ڕايگه‌ياندووه،‌ كه‌ ئێوه‌ گشت په‌په‌كه‌ن، ئه‌م شته‌ وايه‌ ؟

پاسه‌وان : قوربان جه‌نابی به‌ڕێوه‌به‌ر گازتان ده‌كات، تكايه‌ له‌تەكم وه‌ره ‌ !

میوان : به‌نيازی ديدار، هيوادارم دووباره‌ بتوانم بێمه‌وه‌ سه‌ردانیتان.

ئا‌زيز : قسه‌ی قۆڕ، ناكرێ له‌مه‌ زياتر چاوه‌ڕێ بين

عه‌بدولنادر : كاك عه‌لی، ئه‌م كابرايه‌ كێ بوو و له‌كوێوه‌ هاتبوو ؟

عه‌لی : وه‌ك خۆی وتی نوێنه‌ری ڕێكخراوی مافی مرۆڤی جيهانیيه‌، خه‌ڵكی ئاڵمانه‌.

ئا‌زيز : چۆن بەبێ وه‌رگێڕ و پێداويستی نووسين و تۆماركردن هاتووه‌ ؟

عه‌لی : وتی ڕێگه‌يان پێنه‌داوه‌، عه‌قيد سمكۆ، ئه‌ڵمانی ده‌زانێت و پێیوتووه‌ ” گه‌ر پێويستت به‌ يارمه‌تی هه‌بوو، بانگم بكه”‌.

مەحموود : ئێستا تێگه‌يشتم، بۆ خێرا بانگيانكرده‌وه‌، كه‌ زانييان خۆمان ده‌توانين به‌زمانی خۆی له‌تەكیدا قسان بكه‌ين، یەكسەر بانگیانكردەوە. ئه‌م ئاڵمانیيه ‌و سمكۆش هێشتاكه‌ ژن و منداره‌كه‌ی له‌وێنده‌رێن.

ئا‌زيز : كه‌وابوو هيچ !

سامان : بێده‌نگی به‌سه‌، هيچ دادمان نادات. ئێمه‌ تاوانێكمان نه‌كردووه‌، من له‌مه‌ زياتر ناتوانم ددان به‌خۆمدا بگرم. من بڕيارمداوه‌ مانبگرم، ئێوه‌ چ ده‌ڵێن؟!

ئارام : پێویستە مانبگرين …

عەبدولنادر: ئەرێ مانده‌گرين …