ئاڵا سووره‌كان
بۆ هاوڕێیان «شاپوور» و «قابیل»
هاوڕێیانی ئاواره
چه‌نده دڵبه‌رده، ئه‌و كۆنه شاره
له تاو كۆچی سووری ئێوه،
باباگوڕگوڕ، تازه‌یه‌باره
قه‌لای هۆلاكۆ به‌زێن
كه دی وا ئێوه،
له خوێنا ده‌گه‌وزێن
هاواری كرد
” به‌ر بگرن له تیرۆر
به‌م تاوانه، مێژووم شه‌رمه‌زاره “
*****
هاوڕێیانی ئاواره
كێ له تیرۆری ئێوه، به‌رپرسیاره
سه‌ربازانی خوا؟
ته‌ته‌رانی ئه‌نفال؟
مافیای بۆر، سه‌وز، زه‌رد؟
كێ بوو، ئێوه‌ی به‌و ده‌رده برد؟
كێ به مه‌رگی ئێوه به‌ختیاره؟
*****
هاوڕێیانی ئاواره
خه‌متان … قینه
ده‌نگتان… تینه
مه‌رگتان … ژینه
كۆچتان …. برینه
له نێو دڵی، كرێكار و زه‌حمه‌تكێش
گه‌ڕه‌كه و گه‌ڕه‌ك، شاره و شار
كاروانی سوور
به‌ره‌و به‌یانێكی نزیك نه‌ك دوور
به‌ڕێوه‌یه و ڕه‌دووی شوێن پێتانه
له كۆڕی گیانبه‌خشانا،
هاوڕێیان، ئه‌و شه‌و
(ئارام**)ی بادینان پێشوازیتانه
*****
هاوڕێیانی ئاواره
ده‌روونمان، پڕ ئازاره
ئه‌فسووس، نه‌كرا له‌وێ بین
تا بۆ ته‌رمی سوورتان
به‌ڕێزه‌وه، ڕێژه بەستین
له‌سه‌ر هه‌واری تازه‌تان
به‌ڵێنی سووربوونمان، بۆ خه‌بات
دژی سه‌روه‌ری سه‌رمایه، بڵێینه‌وه
ڕێژه به‌ستین و
ده‌ست هه‌ڵبڕین
له‌بری (ئۆژین پۆتیه) ده‌نگ هه‌ڵبڕینه‌وه
” هه‌ستن ئه‌ی هۆزی به‌شمه‌ینه‌تان … .”
شۆڕه‌سوارانی شورا، بانگه‌واز كه‌ینه‌وه …
******************
١٩ی ئه‌پڕیلی ١٩٩٨
Alla sûrekan
bo Hawrrêyan “Şapûr” û “Qabîl”
Hawrrêyanî aware
çende dillberde, ew kone Şare
le taw Koçî sûrî êwe,
Babagurrgurr, tazeyebare
Qelay Holako bezên
ke dî wa êwe,
le Xwêna degewzên
hawarî kird
” ber bigrin le Tîror
bem Tawane, Mêjûm şermezare “
*****
Hawrrêyanî aware
kê le Tîrorî êwe, berpirsyare
Serbazanî Xwa?
Teteranî Enfal?
Mafyay bor, sewz, zerd?
kê bû, êwey bew Derde bird?
kê be Mergî êwe bextyare?
*****
Hawrrêyanî aware
Xemtan … Qîne
Dengtan… Tîne
Mergtan … Jîne
Koçtan …. Brîne
le nêw Dllî, Krêkar û Zehmetkêş
Gerreke û Gerrek, Şare û Şar
Karwanî sûr
berew Beyanêkî nzîk nek dûr
berrêweye û redûy Şwên Şêtane
le Korrî Gyanbexşana,
Hawrrêyan, ew Şew
(Aram**)î Badînan pêşwazîtane
*****
Hawrrêyanî aware
Derûnman, pirr Azare
efsûs nekra lewê bîn
ta bo Termî sûrtan
berrêzewe, Rêje bestîn
leser Hewarî tazetan
Bellênî sûrbûnman, bo Xebat
djî serwerî Sermaye, bllêynewe
Rêje bestîn û
Dest hellbrrîn
lebrî (Eugène Pottier) deng hellbrrînewe
” hestin ey Hozî Beşmeynetan … .”
Şorreswaranî Şura, bangewaz keynewe …
************************
19î Eprrîlî 1998
نامەیەك بۆ كارل ماركس
هاوڕێ .. هێژا
خۆزگە زیندوو بای
دیتبات چۆن
مه‌ینه‌تئاوای ژینت
سه‌رپه‌نای كۆیله‌تیت
بۆته ته‌كیه و خانه‌قای ده‌روێشان
چۆن ناوت له‌به‌رئه‌گرنه‌وه
چۆن سیمات
به ئاڵتوناوی ئه‌فسانه ئه‌شۆنه‌وه
پله‌و پایه‌ت گه‌یشتۆته ئاسمان
*****
یادت به‌خێر هاوڕێ
خۆزگە بەخۆت لێره‌بای
سه‌رێكت هه‌ڵبڕیبا و
دیتبات چۆن
وێنه‌كانت بتئاسا
شاگرده‌كان له‌ملیانئه‌كه‌ن
مووی پرچ و ڕدێنت
وەك جێماوی پێخەمبەران
ده‌رمانی له‌رزوتایه و
بۆ نه‌خۆشانی ئه‌به‌ن
ناوت له‌ته‌ك سڵاوات
له ڕۆژانی پیرۆزا، وێردده‌كرێ
وته‌كانت هه‌ر مه‌پرسه
ئاوازێ له جۆری تەورات و ئینجیل و قورئان
مناڵانی پێگۆشده‌كه‌ن
نێوی كیژەكانت
وەك هۆنراوە، ئه‌وترێنه‌وه و
دووردیان لێده‌بارێ
سه‌رپه‌نات لە ھایگەیت و تریر
جێنزرگه‌ی هۆگرانە
ده‌سته ده‌سته
خۆ له دار و به‌ردیان ده‌سوون
هاوڕێ گه‌ر زیندووبیته‌وه و
له‌به‌رده‌می دادگه ڕاوه‌ستی
ئه‌بێ په‌تی سێداره له‌ملكه‌ی
ئاخر به‌نێوی تۆوه
زۆر تاوان ئەنجامدران
*****
خۆزگە لێره بای و
دیتبات چۆن ..
له زاری تۆوه چەند ڕاپەڕین ..
له‌باربران
چەند ئازادیخوا و سۆشیالیست ..
تیرۆركران
چەند ئیمپراتۆریی و دەوڵەتی نەتەوە ..
چێكران
چەند بەرەی ھاوبەش بۆ ئاشتی و پێكەوەژیان
لەتەك سەرانی سەرمایە ڕێكخران
خۆزگە لێرەبای و دیتبات بەخۆت
پاشڕەوانت لە نەزانی
چ بتێك سازدەكەن بۆت
١٤ی مارچی ١٩٩٨
Hawrrê .. hêja
xozge zîndû bay
dîtbat çon
Meynetaway Jînt
Serpenay koyletît
bote Tekye û Xaneqay Derwêşan
çon nawt leberegirnewe
çon sîmat
be Alltunawî Afsane eşonewe
Plew Payet geyiştote Asman
*****
Yadt bexêr Hawrrê
xozge bexot lêrebay
Serêkt hellbrrîba û
dîtbat çon
Wênekant Bitasa
Şagirdekan lemilyaneken
Mûy Pirç û Rdênt
wek cêmawî Pêxemberan
Dermanî Lerzutaye û
bo Nexoşanî eben
Nawt letek Sllawat
le Rojanî pîroza, wêrddekrê
Wtekant her mepirse
Awazê le corî Tewrat û Încîl û Quran
Mnallanî pêgoşdeken
Nêwî Kîjekant
wek Honrawe ewtirênewe û
Dûridyan lêdebarê
Serpenat le Highgate û Trir
Cênzirgey Hograne
Deste deste
xo le Dar û Berdyan desûn
Hawrrê ger zîndûbîtewe û
leberdemî Dadge rawestî
ebê Petî Sêdare lemilkey
axir benêwî towe
zor Tawan encamdran
*****
xozge lêre bay û
dîtbat çon ..
le Zarî towe çend Raperrîn ..
lebarbran
çend Azadîxwaz û Soşyalîst ..
tîrorkran
çend Împratorîy û Dewlletî Netewe ..
çêkran
çend Berey hawbeş bo aştî û pêkewejyan
letek Seranî Sermaye rêkixran
xozge lêrebay û dîtbat bexot
Paşrrewant le Nezanî
çi Btêk sazdeken bot
14î Marçî 1998
ناڵه‌ی شه‌قامه‌كان
بۆ منداڵانی بێنه‌وای بڕازیل
خانوویه‌ك له كارتۆن
پلیكانه‌ی دوكانێك، سه‌رین
ئاسمان لێفه و
لایه لایه‌ی شه‌وانتان،
شه‌ڕه پشیلە و سه‌گوه‌رین
قۆڕه‌ی سكتان
له چۆڵه‌وانی شه‌قامه‌كانا
سه‌مفۆنیایه ..
سه‌مفۆنیای خه‌می نان و
سه‌رخه‌وی نێو باڵاخانه‌كان
شه‌وان به‌ده‌م خه‌یاڵ
وه‌ك بازی به‌رزه‌فڕ،
ده‌ده‌ن له شه‌قی باڵ ..
به‌سه‌ر سنووره‌كانا،
بێ پاس، بێ پاوه‌ن ..
جار جاره وچانێ،
له‌م وڵات.. له‌و وڵات
بۆ گه‌ڕان له دووی قه‌راخێ نان
له پڕ وڵاتێكی نوێ ده‌دۆزنه‌وه،
وڵاتێ، سه‌راسه‌ر، پڕ له سۆز و له ژیان
بۆ ھەمووان پێكه‌وه،
بێ خاوه‌ن، بێ كڕیار
بێ پۆلیس و بێ دۆلار
به‌یانی زوو،
برسیه‌تی به‌ئاگاتاندێنێ ..
وه‌ك ته‌له‌زگه
به بیرتاندا تێده‌په‌ڕێ،
هه‌زار و یه‌ك خۆزگه ..
له‌م گەڕەك، له‌و كۆڵان
چه‌ند شه‌قام ئه‌وڵاتر..
له چنگتان گیرنابێ
چه‌ند قه‌راخه نانێ زیاتر
هاوده‌می یه‌كه‌م پاروو،
ده‌نگی شه‌لاق و تفه‌نگ
پڵیشانه‌وه‌ی سه‌رتان،
له ژێر چه‌كمه‌ی پۆلیسی ده‌به‌نگ
ئاره‌زووی ژه‌مێ تێری،
ده‌كا جوانه‌مه‌رگ
بۆ فتوای مه‌رگتان،
دزینی چه‌ند قه‌راخه‌نانێ،
ده‌كاته پاساوی مه‌رگ
مارچی ١٩٩٨
Nalley Şeqamekan
bo Mindallanî Bêneway Birrazîl
Xanûyek le Karton
Plîkaney Dukanêk, Serîn
Asman Lêfe û
Laye Layey Şewantan,
Şerre Pşîle û Segwerîn
Qorrey Siktan
le Çollewanî Şeqamekana
Semfonyaye ..
Semfonyay Xemî Nan û
Serxewî nêw Ballaxanekan
Şewan bedem Xeyall
wek Bazî berzefirr,
deden le şeqî Ball ..
beser Snûrekana,
bê Pas, bê Pawen..
car care Wçanê,
lem Wllat.. lew Wllat
bo gerran le dûy Qeraxê Nan
le pirr Wllatêkî nwê dedoznewe,
Wllatê, seraser, pirr le Soz û le Jiyan
bo hemwan pêkewe,
bê Xawen, bê Kirryar
bê Polîs û bê Dolar
Beyanî zû,
Birsyetî beagatandênê ..
wek telezge
be Bîrtanda têdeperrê,
hezar û yek Xozge
lem Gerrek, lew Kollan
çend Şeqam ewllatir..
le Çingtan gîrnabê
çend Qeraxenanê zyatir
hawdemî yekem Parû,
Dengî Şelaq û Tfeng
pllîşanewey Sertan,
lejêr Çekmey Polîsî debeng
Arezûy Jemê têrî,
deka cwanemerg
bo Fitway Mergtan,
dzînî çend Qeraxenanê,
dekate pasawî Merg
Marçî 1998
هاونیشتمانی ئازاد !
تۆ كێی؟
قه‌د له خۆت پرسیوه،
تۆ كێی؟
گه‌ر كه‌مێ، بیری به‌یتێ ..
له ڕابوردوویه‌كی نزیكا
له مه‌یدانه‌كانی یۆنان ..
له‌نێو كێڵگه‌كانی كوردستان
ده‌ستبه‌سه‌ر، خۆت ده‌ناسیته‌وه ..
پێرێ، وه‌ك مه‌ڕ و ماڵات
له جه‌نگه‌ڵه‌كانا ڕاوده‌كرای
ده‌سته‌مۆ له‌نێو قه‌فه‌س،
له مه‌یدانێكدا به‌شه‌ڕده‌درای
یا به كه‌شتی،
له‌بری ئاسن و گه‌نم
له‌م كیشور به‌و كیشوه‌ر
ده‌فرۆشرای
دوێنێ، ژیان و بوونت
به‌شێك بوو، له دارای ئاغا
گه‌ر به بوێری سورانه‌‌ت نه‌دابا
ئەوا یاخی دەبووی له فه‌رمانی خوا
ئه‌وڕۆ هه‌مان كۆیله‌ی، هه‌مان جوتیار
له كارخانه بی، یا له‌سه‌ر جاڕ
ناچاری بۆ مانه‌وه ..
بفرۆشی هێزی كار
چركه چركه، ژیانت ده‌كه‌یته به‌رهه‌م،
تا هه‌ڕاجی كەن له بازار ..
ده‌سته ده‌سته، چه‌كدار ده‌بی
به خه‌یاڵ بۆ نه‌ته‌وه و نیشتمان !
به نۆره‌بڕێ له‌نێوان ئه‌م و ئه‌و
بۆ چه‌وسێنه‌ر، ده‌چیته پای ده‌نگدان ..
له خه‌ونی نه‌ته‌وه و به‌هه‌شت
ھیچت ده‌ستگیرنابێ لێیان
شه‌كه‌ت و دۆڕاو و برسی
پاش تەواوبوونی ھەر شەڕێك،
ده‌گه‌ڕێیته‌وه مه‌ینه‌تاوای ژیان
جێنیوه‌ری ١٩٩٨
Hawnîştmanî Azad !
to kêy?
qed le xot pirsîwe,
to kêy?
ger kemê, Bîrî beytê ..
le Raburdûyekî nzîka
le Meydanekanî Yonan ..
lenêw Kêllgekanî Kurdistan
destbeser, xot denasîtewe ..
pêrê, wek Merr û Mallat
le Cengellekana rawdekray
destemo lenêw Qefes,
le Meydanêkda beşerrdedray
ya be Keştî,
lebrî Asn û Genim
lem Kîşur bew Kîşwer
defroşray
dwênê, Jyan û Bûnit
Beşêk bû, le Daray Axa
ger be bwêrî Suranet nedaba
ewa yaxî debûy le fermanî Xwa
ewrro heman Koyley, heman Cutyar
le Karxane bî, ya leser Carr
naçarî bo manewe ..
bifroşî Hêzî Kar
çirke çirke, Jyant dekeyte Berhem,
ta herracî ken le Bazar ..
Deste Deste, Çekdar debî
be Xeyall bo Netewe û Nîştman !
be norebrrê le nêwan em û ew
bo Çewsêner, deçîte pay dengdan ..
le Xewnî Netewe û Beheşt
hîçt destigîrnabê lêyan
şeket û dorraw û birsî
paş tewawbûnî her Şerrêk,
degerrêytewe meynetaway Jyan
Cênîwerî 1998
ساته‌كانی مه‌رگ *
مه‌رگی وشه
هه‌ڕاجی هۆنراوه‌یه،
كاتێ هۆنه‌ر
پیاوماقوڵی دیواخانان بێ
مه‌رگی ئاواز
ژه‌نینی ژێیه،
كاتێ نۆته‌ی موزیك
به‌زمی له‌شفرۆشخانه‌كان بێ
مه‌رگی به‌هار
ئه‌و ده‌مه‌یه،
وێنه‌كێش له تابلۆیه‌كه‌یدا
وێنه‌ی نائومێدییەكانی
خۆی ده‌كێشێته‌وه
مه‌رگی مه‌رگ
ئه‌و ڕۆژه‌یه، گۆڕهه‌ڵكه‌ن
قوڵینگه‌كه‌ی به‌گوڕتر هه‌ڵده‌بڕێ و
بۆ دواجار گۆڕی مه‌ینه‌ت، ده‌شێلێته‌وه
جولای ١٩٩٧
* پێشتر له ژماره (1)ی گوڤاری هونه‌ری «ژیله‌مۆ»، ئۆگوستی 1997 دا لەژێر سەردێڕی “دوێنێ و سبه‌ینێ” بڵاوكراوه‌ته‌وه .
Satekanî Merg *
Mergî Wşe
herracî Honraweye,
katê Honer
Pyawmaqullî Dîwaxanan bê
Mergî Awaz
jenînî Jêye,
katê Notey Muzîk
Bezmî Leşifroşxanekan bê
Mergî Behar
ew demeye,
Wênekêş le Tabloyekeyda
Wêney Naumêdîyekanî
xoy dekêşêtewe
Mergî Merg
ew Rojeye, Gorrhellken
Qullîngekey begurrtir helldebrrê û
bo dwacar Gorrî Meynet, deşêlêtewe
Culay 1997