سۆزانی نەزم
چاوە تێر سەوزەكەت ؛
وەك مناڵی زەندەقچوو،
لە ‘مەرقەدی شێخ و
چاوی ئەژدیھا لە شەوەزەنگا’
لێیدەترسم،
ناوێرم سەرێهەڵبڕم،
تۆ گیانم .. دڵم ..
مێشكم دەخۆی
تۆ جادووگەری !
*****
بریقەی كراسە واڵاكەت،
سەرنجم ڕاناكێشێ
ساڵانێكە بوخچەی
نووشتەكانتم فڕێداوە ..
لەو ساتەوەی،
هەست و سۆزت فریوداوم
ڕوخساری زەردهەڵگەڕاوت،
هەوەسم نابزوێنێ ..
ماچی لێوی مۆرگەڕاوت،
ناشكێنێ تاسەم ..
تازە تۆ،
سۆزانی نەزمی ..
لەرەی سمت و مەمانت
هەوەسی خواكان دەبزوێنێ
چیت لە من داوە، بڕۆ !
*****
لە بازاری خۆفرۆشی تۆدا
خەون و خەیاڵی من،
ئافەرینێكی پاشایانە نایێنێ
برۆ دەست لە بەرۆكی من بەردە ..
لە ئاهەنگی كۆیلەتی خۆتا
سەما بۆ سەروەران كە
تا خودای گەورە ڕازیبێ و
بە چاكە ناوت بێنێ ..
بڕۆ ئیدی وازملێبھێنە،
چیدی نیگای درۆینەی چاوەكانت
تامەزرۆیی ئەوینم نابزوێنێ.
************************