خەمێكی قەترانی
ئای له‌و خەمه
كاتێ منداڵی چەقاوه‌سوو
لە هێلانه پاساری،
گڕ به‌رده‌دا و
هیچ لك و پۆپێ نییە
سه‌رخەوێكی ماندوو
بگرێته خۆی
*****
ئای له‌و خەمه قەترانییە
كاتێ سه‌ربازی وڵاتپارێز
سه‌رپه‌نای جووتیارێ
خاپوور ئه‌كا و
گۆشه‌ی هیچ خیابانێ نییە
شه‌وێكی بێسه‌رپه‌نا،
داڵده بدا
*****
نەفرین له‌و ماسكانەی
ئاگر له كەپرەكانی گوندێ وه‌رده‌ده‌ن
په‌نجە و وێوڵەی منداڵێ
له بیابانا، ژێر لم دەخه‌ن؛
لەوێ ئەوان لە مەرگی ئەنفالكراوانا شایی دەگێڕن
لێرەش ئەمان ده‌رگه‌ی شار
به‌ڕووی هانای بەجێماوانا قوفڵدەكەن
*****
ئای لەو خەمە؛
كاتێ گەوران، چیرۆكی دێو و درنج
بۆ مناڵانیان دەگێڕنه‌وه،
تا خۆیان بێخەم .. بخەون
كاتێ لاوان، خەیاڵیان دەشارنەوە و
لەبەردەم شەرما كڕدەكەون ..
كاتێ پیران، چرپەیان كپدەكەن و
خەمیان بۆ مەرگ، دەكەنە تەون ..
كاتێ منداڵان، نیگایان خواردەكەن و
ڕەدووی داوەڵی خوا دەكەون ..
كاتێ بەشمەیتان، قینیان، بەربەستدەكەن
تا خەیاڵە یاخییەكانیان دەرنەكەون
****************