Tîror ???????????
Griftî takî kurd lewedaye, tenya le legyanxistinî cesteda tîror debînêt. Hemû rojêk her yeke le ême be şêweyek le şêwekan tîrordekrêyn û wek rûdawêkî asayî û sruştî û birryarêkî serûmroyî letekîda rahatûyn!
Kam takî kurd rojane be yekêk lem core tîrorane rûberrûy tris û perêşanî û tundutîjî nabêtewe; tîror behoy peyamî mobayl, feyisbûk, îmeyl, nîgay drawsêy aydîlocî cyawaz, morrey polîs û pêşmerge, tîrorî derûnî le nêw mall û fêrge û karxane û fermange û mizgewt û klîsa û jûrî berêweber û xallî pişknîn û çawdêrîy û tid, tîrorî morrallî, tîrorî tarîkbîrîy û roşnibîrîy, tîrorî partîy û dewlletîy, tîrorî hewallîy û mîdyayî, tîrorî …tid.
Beboçûnî min tîror weha le jyanî rojaney takî kurd [betaybet jyan le şar û nêwendî ramyarîy]da rîşey dakutawe, ke eger rojêk ktupirr tîror nemênêt, xellkî hest be kemîy û dabrranêk bkat, tîror serapay bûnî kultûrîy û komellayetîy û abûrîy û ramyarîy takî kurd pêkhênawe û berradeyek ke hemûman rojane becorêk le corekan le kar û kardanewe wirdekanî jyanî rojanemanda hanay bo debeyn û bekarîdebeyn!
Eme ew berencameye, ke weremî ramyarîy beser komellgeda hênawyetî û be awirrdaneweyekî zor kurt û xêra, be pirsyarêk le pîrekanî dewruberman, ewaney ke enfal û kîmyabaran neykuştûn, ewaney ke serdemî pêş dewllet û partayetîyan leyadmawe, derdekewêt ke rojgarêk ke serok û netewe û part û dewlletman nebûn, tîrorîşman nebû, ewsa hemû kesê babayekî mallî xoy bû, ewsa ke weremî ramyarîy û partayetî serapay bûnmanî netenîbuwewe, ewsa ke tenya xwayek le asman û mrov le zewî bû, bellam em ro hezaran xwa dabarîwunete ser zewî û mrovî bêdesellatîş le dozexêkilda ke xwakan [serokî netewe, serokkomar, serokî part, serokî kompanî, xawenkar, serokî mîdya, delallî bazar] bo gerimkirdnewey xoyan berpayankirduwe, xerîkî gyanellaye û dwa çirkekanî nzîkbûnewey tîrorkirdnî dejmêrêt.
Bellê, reuf kamil û ‘elî boskanî û nezîr ‘umer û bekir ‘elî û selah horamî û ferhad ferec û şapûr û qabîl û soran û ‘ebdulistar û serdeşt û kawe’şi çend mang û roj û sat pêş ewey cesteyan tîrorbikrêt, be corekanî dîkey tîror, le pena destmanda û be berçawî êmewe tîrorkran, bellam leberewey ke tîror beşêke le kultûrî weremî ramyarîy, êmeş asayî wermangirt û tîroristanîş bêxem û xatircem, be rojî nîwerro be berçawî hemuwanewe kawe’şyan tîrorkird û sbenêş norey toye, komellge herwa bêdengdemênêtewe, cunke to xwazyarî eweyt û bîdengît hellbjarduwe!