Eger pêmanwabêt, wellamekanî ême tewaw û dwa derkî mrovayetîn, ewa xerîkîn le xoman btêk sazdekeyn. Herweha eger pêmanwabêt, ew sîstemî rêkxistney komellge, ke ême xebatî bo dekeyn, dwayîn çawerrwanî û geşeyeke, ke mrovayetî pêydegat, ewa dîsanewe xerîkîn pûçgerayyekî dî le teputozî powçgerayyekanî dîke, çêdekeynewe. Soşyalîzm beheştêk nîye le asmanekanewe daygrîn û le perrawî efsanekanda bîdozînewe û modêrnîzey bkeyn, soşyalîzm xewnî mrovî zînduwe û be praktîkî şorrşigêrrane ketwarîy debêtewe û serkewtinîşî le kultûrbûyinda debêt, bebê ewe, le xeyallî goşegîrane û fentazî aydyalîstane bewlawetir nabêt.
Hejên
Beşî nohem
Êwe le korrukomellekanda wnin û amade nîn, îtir dekrêt bzanîn meydanî xebatî îwe kwêye? Ya eweta bo êwe piştî dezgayekî çap û nûsîn buwete hemû meydanêkî ’emelî?
Azîzm, ber lewey wellamî pirsyareket bdemewe, dekrêt bzanim ew korr û komellaney ke to mebestin û enarkîyekan beşdarîyan têdanaken, kamanen û le kwêy xebatî komellayetîyda westawn?
Eger mebestit le sendîkakanî serbedesellate ya rêkixrawe paşkokanî parte çepekane, ke her rojey le şwênêk wek kargî beharan qutdebnewe û paş maweyek bogendeken û depûkênewe, ewa be boçûnî min ewane nek korr û komellî krêkarîy û cemawerîy nîn, bellku hewllêkin bo destemokirdnî destbekarbûnî xobexoyî cemawer û krêkaran û nebûnyan zor le bûnyan baştre, çunke baş pûkanewe û nezokî her yekeyan, dunyayek naumîdî lay cemawer be xebat û twanay xoy, becêdehêllêt !
Lew barewe deyan nmûney bîst sallî raburdû leberdestdan, lewane “yekêtî bêkaran le kurdistan”, ke hezaran kes xoy wek endam têyda nawnûskirdbû û “rêkixrawî serbexoy afretan”, ke hemû ştêk bû, tenya serbexo nebû, “komelley awarekanî kurdistan”, rêkixrawekanî benaw krêkaran û karmendanî xestexanekan û şuray penaberan û le serûy ewanewe fêdrasyonî sertaserî rêkixrawe krêkarîyekanî kurdistan, ke hemûyan letek pûkanewey partekanî hîkmetîzm, bûne merekebî ser kaxez.
Ew hewlle partîyane nek tenya mayepûç û destemokerî krêkaran û zehmetkêşanî narrazî bûn, leweş xraptir naumêdgerî deyan û sedan endam bû, ke lew rêkixrawe paşkoyyaneda kobûbûnewe û henûke bawerryan ne bexoyan û ne betwanay çînayetîyan nemawe û qederî xoyan dawete dest bzûtnewey ramyarîy wek lîstî nîocelalîyekan (lîstî gorran).
Be boçûnî min, eger le kurdistan enarkîyek bûnî hebêt û le xebatî komellayetîyda bo baştirkirdnî barî jyan ya gorrînî komellge û sîstemekanî berrêwebirdnîda beşdarînekat, ewa enarkîbûnî xoy dexate jêr pirsyarewe. Çunke take meydanêk ke enarkîyekan be meydanî xebatî xoyanî bzanin, le rwangey ewanewe xebatî şorrşigêrrane, tenya xebatî komellayetîye û hemû gorranêkîş le gorranî komellayetîyewe destipêdekat. Îdî ew xebate komellayetîye bo parrastinî jînge bêt ya baştirkirdnî barî guzeran, ya bo frawankirdin û sepandinî azadîye takekesîy û giştîyekan bêt. Bepêçewanewey ewewe, enarkîyekan hemû hewllêk bo ramyarîykirdnî bzave komellayetîyekan û arastekirdnî şorrşî komellayetî berew ramyarîykirdin û bedestihênanî desellatî ramyarîy retdekenewe, çunke şorrş ya komellayetîye ya nîye û ewey be paşgirîy ramyarîyewe heye, dje-şorrşe. Her bew pêwere hemû rêkixrawe û korr û komellêkî paşko bo partekan û desellat dje-şorrşe. Çunke karî ew rêkixrawane berramyarîykirdnî xebat û pirse komellayetîyekane. Leberewey partekan tenya le ramyarîykirdnî xebat û pirsekanda bextî derkewtinyan wek destebjêr û nwêneranî serûxellkî debêt, bepêçewaneşewe enarkîyekan tenya le xebatî komellayetîyda bextî kirdeyyekirdnewe (praktîzekirdin)î bîrokekanyan debêt û hizrî enarkî geşedekat û bllawdebêtewe. Her boye le cyatî gemey parleman û şerredendûkî nêwendî û serkirdayetî partekan, serşeqamekan û mangirtin û karge û korr û komellekanî gerrek û xwêndinge û helldebjêrn, tawêk temaşay kenalle telefzyonîyekan û torre komellayetîyekan, gewahî ew rastîyet bo dedat, ke le wllatanî ewrupî û emerîkîyda enarkîyekan le kwêy korr û komelle cemawerîy û komellayetîyekanewe westawn.
Pêt wanîye eger desellat ledest jnan bêt, kuştubirr kemtir debêt û dadperwerî zyatir? Baştir nîye hawrrêyanî enarko fîmînîst ke to layengirî dekey xoyan kandîdbken ya rêkixrawe drustibken û le şwênêkewe bibne hêz û biçne desellatewe?
Ewey ke pêtwabêt desellat le destî jnan ya krêkaranda [wek beşêkî çewsawey komellge]da bêt, îdî dadperwerî msoger dekrêt, corêke le jyan le efsaneda û fêllkirdne le xudî jnan û krêkaran. Çunke desellatxuzan le hîç serdemêkda nehatûn benawî xoyanewe daxwazî bedestihênanî desellat bken, hemîşe lejêr nawêkî dîkey wek netewe, krêkaran ya jnan hatûn û kneyan kirduwete nêw rîzî xebatkaran û bzûtnewe cemawerîy û komellayetîyekan.
Be gwêrey ezmûnekan û be boçûnî mnîs, ewe bîrokey jnanêke, ke xoyan be destebjêrî nêw jnan dezanin û pêyanwaye, ke zorîney jnan twananî bîrkirdnewe û xorrizgarkirdnî xoyan nîye û pêwîstyan be şwaneyî ewan heye. Herweha ew boçûne be pagendeyekî jarawî pasawdeden, gwaye ” le komellgeda pyaw desellatdare” û madam waye, baştre komellêk jin ew desellate bgirnedest. Eme leser kêş û serway heman balorey nasîwnalîstekane, ke dellên “eger dewlletî xoyîman hebêt û xoman fermanrreabîn, hemû endamanî netewe azaddebin, ya balorey markisîst-lênînîstekan, ke dellên “eger desellat ledestî êmeda bêt û hkumetî krêkarîman hebêt, hemû krêkaran û komellgeş azad debin” .
Bo têgeyiştin le pûçî ew pagendeye, ewende bese lew barewe wek nmûne, sernicî rûdawekanî sedey raburdû û seretay em sedeye bdeyn, taweku bbînîn, ke çon krêkaran le sayey desellatî dîktatorîy markisîst-lênînîstekanda xraptir lejêr sayey desellatî desellatî parlemanî borcwakanda deçewsanewe û çon kurdan le herêmî kurdistanî em rojgareda wek caranî serdemî be’si le rûy abûrîy û ramyarîy û komellayetî û tenanet kultûrîyewe deçewsênewe û wek çon le serdemî be’sda takekanî herêm “şmal al’zîz” le rûy mafî bekarbirdnî zmanewe leçaw nawçekanî xwarû ple dû bûn, em roje le sayey desellatî borcwazî kurd”nasîwnalîstekan watenî desellatî xoyî”da nawçekan û zmanekan û zarawekanî dîkey kurdî be pledû dadenrên, herweha le sayey serwerîy şajn elîzabêt û serokşalyaran taçer û çîler û mêrkill’da jnan xraptir çewsanewe û deçewsênewe.
Weha pagendeyek deyewêt, awa nîşanbdat, ke jnan le hîç bwarêkî kargêrrîy û fermandarîy û ramyarîy sermayedarîda rollyan nîye û hemû ştêk bedest pyawanewe û jnan le derewey sîstemeken û her kes berregez nêrîne bû, îdî serwere ! Îngilîzwatenî eme “tersequle” ! Çunke jnan le heman sîstemî xêzanîda ballêkin le perurdey serkutgerane, her awa le dayenge û fêrgekanda ta degate zankokan, jnanî perwerdekar û mamwesta û wanebêj wek hawkare pyawekanyan azarî mindallan deden û be wanekanî serwerîy û pîrozkirdnî mêjûîy komellgey çînayetî û rewayetîdan be sîstemeke û demargîrîy ayînî û neteweyî mindallan û lawan debengdeken, jnan le fermangekanda wek hawkare pyawekanyan sûkayetî û karkirde dje mroyyekanî sîstemeke beser xellkîda deşkênnewe, jnanî krêkar wek pyawanî krêkar, sermaye bo sermayedaran kellekedeken, letek hawkarekanyanda kêbrrikêdeken û paşqul leyekdî degrin, jnanî berêweber, polîs û serbaz wek hawkarekanyan parêzgarîy le sîstemeke deken, jnanî sermayedar û ramyar û desellatdar wek pyawanî hawkaryan hewllî frîwdanî xellk û çewsaneweyan deden, jnanî parlemantar wek hawkare nêrînekanyan, deng be yasa dje mroyyekan deden, lewane yasay çend-jne bo pyawanî dewlletmend !
Dekrêt pişkî jnan lew hemû tawananeda bepêy kemî hej marî jnan lew bwaraneda kemtir bêt, bellam eme bew wataye nîye, ke jnan lew sîstemda destîyan nîye û tawanbarnîn ya djî sîstemeken! Eger behîç şêweyek le bwarekanî berrêwebirdnî komellge û ragirtnî sîsteme çînayetîyekeda beşdarnebûnaye û jnan wek sruşt û taybetîmendîy xoyan le mrovbûnî pyawan cyabûnane û xudbexud djî ew hemuwe tawanane bûnaye, ya belayenî kemewe ewaney ke ew pagendeye deken, djî hemû pêkhateyekî çînayetî û djî hemû core çewsaneweyek û hemû sîstemêkî çewsêner û hemû amraz û aydyolocyakanî çewsanewey mrov bûnaye, ewsa demantwanî bllêyn, egerî drustibûn û drustderçûnî weha pagendeyekî nalocîkî heye. Bellam bedaxewe ketwarî komellge û rûdawekan û sruşt û pêkhatey stemgerîy le komellgeda pêçewanewey ew pagendeye deselmênin. Min lêreda tenya yek nmûne dehênmewe: ewendey jnan bexoyan le xeteney kçanda, le dûrînewey koendamî zawzêy bêwerijnanda, le kêbrikê û şûkirdin beser yekdîda rollyan heye, pyawan natwanin ew karayî û rolleyan hebêt !
Paşan, ew rêkixrawaney ke ta êsta pagendey rizgarî û azadî û yeksanî jnanyan kirduwe, bekirdewe pêçewaney eweyan selmanduwe; bewey ke xoyan xerîkî qutkirdnewe û rêkxistnewey jnanî narrazîn le pêkhate qûçkeyye stemkarekanda, wate sepandnewey rêkxistin û pêkhateyekî dîkey qûçkeyî fermander û fermander, pêşrew û paşrrew, ke le pêkhate qûçkeyye komellayetîy û abûrîy û ramyarîyekanîşda heman bûn heye; xêzan, fêrge, mizgewt, karge, fermange û kargêrrîy û parleman û fermandarîy û dewllet. Bewatayekî dîke pesendnanewey heman pêkhatey zordarane û pirr stemkarîy, bellam em care benawî xudî jnan û rizgarî û yeksanîyewe.
Leberewe be boçûnî min [lêreda mercinîye eme boçûnî hemû enarkîyek bêt], eger birryarbêt grup û rêkixrawêk benawî jnanewe hebêt, ewa debêt rêkxistinêkî asoyî hebêt û amancî xokomekîykirdnî jnan bêt. Bellam ewey ke stem le jnan û pleçendîy û jêrdesteyî regezîy lenêwbibrêt, leberewey ke stemeke pêgey kultûrîy û abûrîy û ramyarîy heye û pirsêkî komellayetîye, kewate jnan tenya le bzûtnewe komellayetîye na nêwendîy û na qûçkeyyekanda detwanin hengaw bo welananî bnên û herweha bebê rakêşanî regeze komellayetîyekey dîke, ke le hemû bwarêkî jyan û karubarî komellgeda pêkewe kardeken û dejîn û ewîndarîy deken, esteme ew balldarey azadî bitwanêt betenya yek beall bifrrêt. Be watayekî dîke leberewey ke pirsî jnan, pirsêkî komellayetîye û bnemay abûrîy û kultûrîy û ramyarîy heye û be pêkhatey sîstem û berrêweberayetî komellgewe peyweste, hem rizgarî jnan be rizgarî komellge û xudî pyawanîşewe peyweste û hem erkî ser şanî pyawanî azadîxwaz û rizgarîxwaz û soşyalîstixwaze, ke peygrane hawpiştî bzûtnewey rizgarîxwazaney jnan bken. Çunke esteme çîn û twêje bindestekan bebê rizgarîy jnan wek beşêk lewan, rizgaryan bbêt, leberewe eger pyawanêk hen û xwazyarîy rizgarbûnyan le kotubende abûrîy û ramyarîy û kultûrîyekan, ewa hem wek erkî mroyaneyan û hem be naçarî pêwîste lepênaw rizgarîy jnan le pleçendî abûrîy û komellayetîy û hellawardin û stemî regezîy, şan be şanî jnanî azadîxwaz têbkoşn, wek gutim tenya leber rizgarbûnî jnan na, bellku leber rizgarbûnî xudî pyawanîş!
Ştêkî dîke ke nabêt lebîrî bkeyn, eweye, eger caran pêş pêkhatnî dewlletî sertapagîrî hawçerx [neteweyî], stem le jnan zyatir barêkî kultûrîy bexowegirtbêt û ayîn rêkxer û dyarîkerî roll û pêgey pledûy jnan le komellgeda bûbêt, ewa lem rojgareda parleman û fermandarîy û wi yasa û dewllet û dezge ramyarîyekan dyarîgerî ew rêwşiwênen, be nmûne birryarî çend-jne lelayen parlemanî herêmewe, geştî jnan be hamrrayî nêrîneyekî xêzanekey û ..tid. Bem core eme selmênerî ew rastîyeye, ke stem le jnan lem rojgareda rîşe û bnemay ramyarîy û abûrîy û sîstmatîkî heye û ewî djî hellawardin begşitî [regezîy, zmanî, nejadî, ayînî, hellawirdin leser bnemay reng û şwênî ledaykbûn] û lem peywendeda be dyarîkrawîy hellawardinî regezîy [jnan û pyawan] bêt, xobexo naçardebêt, ke djî hemû pêkhate û dezge qûçkeyyekan, ple û paye ser û xwarekan, nayeksanî abûrîy û nayeksanî desellat û nayeksanî erk û maf û djî sîstemî ramyarîy be parlemanî û naparlemanîyewe, têbkoşêt û hewllî komellayetîykirdnewey çareserî pirsekan û natebayyekan bdat, eger na, ewa xobexo serî le drustkirdin û qutkirdnewey deyan rêkixrawî qûçkeyî destebjêrane û ramyarîy benawî jnan û mindallan û jînge û ajell û çîn û twêjekanewe derdeçêt û dwacar herçende amancîşî xizmetkarîy serwerîy çînayetî nebêt, her aw be aşî serwerîy dewlletda dekatewe .
Cyawazî enarko-fêmînîzm û fêmînîzmekanî dîke çîye?
Eger be çend destewaje kurtî bkemewe, ewa be xwêndnewey min bo enarkofêmînîzm wek têrrwanînî enarkîstî lemerr nehêştinî stem û hellawardin beramber jnan, enarko-fêmînîstekan amancyan zîndûkirdnewey gyanî xorrizgarî û xokarabûne lenêw bzavî jnanda dij be koyletî ple-çendîy jnan le paş koyletî pyawanewe. Bewatayekî dîke enarko-fêmînîstekan bepêçewaney araste fêmînîstîyekanî dîke, kar bo destemokirdnî jnanî azadîxwaz lejêr raberayetî xoyan naken; hem raberayetî xoyan beser ewanî dîkeda retdekenewe û hem raberayetî ewanî dîke beser xoyanda retdekenewe, be watayekî dîke raberayetî û rêkxistinî quçkeyî (hîrarşî) be parêzerî koylemanewey jnan û çewsawan begşitî dezanin.
Enarko- fêmînîstekan pêyanwaye û beboçûnî mnîş boewey jnan azadî bistênin û xoyan le dawekanî babsalarî û sîstemî hellawarêzî mrovekan begşitî rapsênin, sereta pêwîste lenêw rîzekanî xoyanda ew pêkhate û plebendîye bawane retbkenewe û lenêwbern. Rizgarî jnan le ple-çendî komellayetî û yasayî tenya be rîformî çend xallêk le yasay serweranda nayête dî, bellku pêwîstî be lêdan û lenêwbirdnî paye abûrîy û ramyarîy û kultûrîy û yasayyekanî hellawardin û hellweşandnewey pêkhate parêzerekanî ew bnemayane heye, ke hemû pêkhateyekî qûçkeyî degrêtewe.
Berrêzm, lew bawerreda nîm, leser ewe nakok bîn, ke azadî nadrêt, bellku desênrêt. Dey kewate kesêk xoy wîstî (îradey) azadbûnî têda nebêt, kes natwanêt bbête rizgargerî le rêwşiwênî nalebarî komellayetîy. Emeş pêwîstî be huşyarî xokarabûn û xorraderbrrîn heye û ew rêkixraw û komellaney ke hawşêwey xudî dewllet û part û xêzan, rêkixrawn û pêkhatûn, natwanin çwarçêweyekî guncaw bin bo xorrizgarî û xokarabûn. Çunke lewêşda komellêk fermander û ple-yekin û komellêkîş fermanber û ple-dû. Her bew core jnanî ple-yek ( raberan û skirtêran û lîprisrawan û serkirdan ) û jnanî ple-dû ( gwêrrayellan û fermanberan û jêrkirdan ) lew rêkixrawaneda berhem dehênrênewe. Bem core rêsekeman debêewe xurî û jnanêk ke le taw stem û bêderetanî hatûneteder û deyanewêt rizgaryanbêt, em care lelayen hawrregezekanî xoyanewe, be torêkî wirdtir û zîrekanetir lewey bawk û mizgewt û part û dewllet û yasakanyan, jnanî narrazî rawdekrêtewe û le çwarçêwey yasay serwer û jêrwer, fermande û fermanber, pêşrrew û paşrrewda kotubend dekrênewe. Îdî bew core rizgarbûnyan lew callcalloke aydyolocîyey hellawardin û ple- plekirdin estemtir debêt, leberewey ke dllixwastaney xoyan û le nahuşyarîyewe xoyan ew biryareyan dawe û her katêkîş serpêçî û hellgeranewe le koyletî nêw ew rêkixrawane bbête xeyallî serî jnêkî azade, ewa tomete morrallîyekan û yasa û sza komellayetî û abûrîy û ramyarîyekan amaden û dergey zîndanekan bo tawanbarkirdinyan be tometî hellbestraw, awella dekrêt.
Beboçûnî min, rizgarî; hengawî yekem le naxî xomanewe destipêdekat, lewêwe ke dîwar û kot û zincîre kultûrîy destkirdekanî xêzan, mizgewt û komellge û dewllet û hawşêwekanyan le awezmanda brruxênîn û bipsênîn û le kollyanbkeynewe, taweku bitwanîn le têkoşanêkî komellayetîyda letek hawçîn û hawtiwêj û hawderdekanimda yekbigrînewe. Eme bo her mrovêkî çewsawe û bindest, ke xwazyarî azadbûne, druste. Paşan “na”gutin be her ferman û yasayek, ke desellatî [oturîtey] kesanî dîke besermanda desepînêt û milkeçî zallbûn û pawangerîy [domîneytgerîy] ewanî dîkey hawcor ya nacorman dekat, xobirryardanî gereke. Êmey çewsawe ya jnan natwanîn xwast û xewnekanyan be kesanî dîke bispêrîn û byankeyne demrrastî xoman, çunke le nêwan fermandanî nêrînekanî xêzan û fermandanî desellatdaranî komellge û yasakanî dewllet û peyrrewprogramî partekanda cyawazî nîye û ewey kê dyarîbkat, ke çî bkeyn û çî nekeyn, ya ewey kesanêk dîke benawî êmewe bibne skirtêr û raberî rêkixrawe û komellekanman û fermanman pêbden çon xebat bkeyn û le kwê xebat bkeyn û çon hellwêst werbigrîn, hîç cyawazî nîye û nabînrêt !
Eger jnanî azadîxwaz xwazyarî hellweşanindnewey hellawardnin lenêwan xoyan wek regezî mêyne û bawk û brakanyan û nêrînekanî komellgen, ewa hengawî yekem pêwîste lenêw xudî bzavekeda djî her hellawardin û plewêrîyek bin ke pêkhatey qûçkeyî rêkxistin deysepênêt. Bzavêk ya rêkixrawêk ke hellgirî towî ple-yekî û ple-dûy xudî jnan benêwî raberan û rêberîkrawanewe bêt, natwanêt hellgirî peyamî yeksanî û dijbûn be hellawardin bêt û serencam becorêkî dîke jnan destemoy pêkhate quçkeyye pirr hellawêrîyekan dekatewe. Leberewe jnanî azadîxwaz (enarko-fêmnîst) xobexo djî plebendî nêw bzaveke û rêkixrawekan debin û şwaneyî hîç jin û pyawêk be rewa û drust nazanin û bewperrî twanayanewe wek her pêkhateyekî dîkey babsalarî û sîstemî nayeksanî mrovekan, djayetîyan deken û lenêwbirdinyan be erkî destbecêy xoyan dezanin.
Jnanî azadîxwaz pêwîstîyan be forumî komellayeyî leser astî gerrek û şwênî kar, nîtworkî jnan, ke pişt be rêkxistin û peywendî zincîreyî û labelayî asoyî (nek serewixwarî) heye. Bo nmûne: jnanî kollanêk, gundêk, gerrekêk detwanin forumêkî kraweyan hebêt û leser pirsekanyan wtuwêjbken, bo nmûne awkêşan ke karêkî taqeprrukênî komellgekemane, beser pyawanîşda bsepênin û bew core pyawan rastewxo letek griftêkî komellayetî û her rojey komellge rûbewudebin û naçar şan beşanî jnan deçne cengî awdzanî komellgewe, deçne pay xebat bo dabînkirdnî awî pêwîst bo hemuwan. Em nmûneye bo zor bwar û goşey xebatî rojane kirdeyye û dekrêt sûdî lê werbigîrdirêt. Eme şêwazî xebatî jnanî (kirla)î hîndustane djî karxanekanî kokakola û xwardnewe gazîyekanî dîke, ke bûnete hoy kemkirdnewey awî xwardenewe le nawçekanyanda.
Wek amarekan nîşanîdeden, jnan leser kar nîwe ya kemtir le mûçey pyawan werdegrin û tenanet le emerîka û wllate ewrupîyekanî wek allmanya û brîtanya’şi her waye, jnan le beramber karêkî hawşêweda berrêjey 25% mûçe û krêy kemtir le pyawan wer degrin. Dekrêt lem bareda kemkarî bew rêjeyey kemî mûçekeyan berawrid be hawkare pyawekanyan, karî kemtir bken û kare kellekebuwekan bxene serşanî hawkare pyawekanyan [-ke bo tenya carêkîş bebîryanda nehatuwe û bîryan lê nekirduwetewe; boçî jnanî hawkaryan beramber hemankar, mûuçey kemtir werdegrin]- û becore naçarîyek detwanin byankêşne pay xebat bo mûçe û krêy yeksan. Jnanêk ke karî derewey mall deken û hawkatîş karî nêwmall û serperşitî mindallyan leestoye, her be harîkarî û hawrrîzî jnanî gerrek û kollan û tenanet serkarîş, detwanin le çwarçêwey sekokeyanda [forumekeyanda] birryarî sepandinî beşêk le karî nêwmall û serperşitî mindallan beser pyawekanyanda bden û bew core pyawanyan beşdar û naçar be bîrkirdnewe bo rizgarbûn û komellayetîykirdnewey karî nêwmall û serperşitîkirdnî mindall, bken. Emeş daxwazî dayenge û baxçey mindallan û çêştxaney giştî dênête arawe, ke detwanin payey komellgeyekî nwê bin, ke têyda karî nêwmall û bexêwkirdnî mindall kar û erkî komellgeye.
Beboçûnî min, leber roşnayî aydyay jnanî enarko-fîmînîstda cyawazîyekan gelêk zorn. Lepall emaneşda pêwîste eweman lebîrneçêt, her awa rizgarî jnan, krêkaran, cutyaran û xwêndkaran û … Tid tenya le twanay xudî jnan, xudî krêkaran, xudî cutyaran, xudî xwêndakarn û … û .. Tiddaye, her awaş gorrînî bendêkî yasayî wek çend-jne ya nehêştinî nerîtêkî komellayetîy wek xetene û paşekşê be rêsayekî ayînî wek şelaqdan û zîndebeçallkirdnî jnan, be wajokokirdnewe û namegorrînewe letek serweran û çûne parlemanî sedan jin, natwanêt allugorr le jyanî ketwarîmanda bkat û le rizgarbûn le dest ew yasa û nerîtane nzîkmanbkatewe. Bellku her gorrnêk, pêwîstî be hellxirran û bercestebûnî bzavî komellayetîy heye, pêwsitî be amadeyî tak heye, pêwîstî be hoşyarî xokarîy û xobirryardan û xohengawnan û xocêbecêkirdin û xopyadekirdin heye, emeş pêwîstî be rêkixrawe cemawerîye serbexokan heye wek fêrge û perwerdgey jnanî azadey komellgey nwê. Lêreda rêkixrawekan bêcge le çwarçêweyek ya çetrêk bo kowebûn û huşyarîy û yekgirtin û zîndûkirdnewey wîstî azadîxwazîy û yeksanîxwazîy, fêrgeyekîş debin bo û perwerdey mrovî komellgey nwê, her leberewe grupe xocêyî [forumekanî gerrek û torre sertaserîyekan] û cemawerîyekanî jnan pêwîstîyan be raber û serkirde û jnanî pleyek nîye, pêwîstîyan be rênwênî pyawanî serkirdayetî partekan û çepllerrîzan û çenebazîy holekanî perleman nîye, bellku tenya pêwîstyan be xohuşyarîy û xokarayî û xokomekîy û xowîstekî endamanyan heye.
Min, stem û hellawardin beramber jnan tenya lelayen pyawanewe nabînim, bellku zorcar lelayen xudî jnanewe em stem û hellawardne pere pêdedrêt. Bo nmûne kem nîn ew jnaney ke xoyan bezor beşû drawn û keçî heman piştîwanî le heman stem dekenewe û kiç û newekanyan dexene jêr fşar û naçarkirdin. Kem nîn ew jnaney ke xoyan xetene krawn û bûnete qurbanî ew tawane û keçî bedestî xoyan kçekanyan debene berdem gwêzanî jengînî jnanêkî drrinde û xeteneger. Kem nîn ew jnaney ke le jyanî jin û mêrdayetîyanda bacî brre alltun û mareyî û ‘ewdallbûnî pyawî dewllemednîyan dawe, keçî kçekanyan leser heman şêwazî bîrkirdnewe perwerdedekenewe û deyanxenewe jêr çekmey sûkayetî pyawe darakan. Kem nîn ew jnaney jinyan beserda hatuwe û kihçî kçekanyan naçar be danîştin lay pyawanêkî frejendar [heremseradar] deken. Kem nîn ew jnaney ke le jyanî xoyanda hawellêkî xoşewîstî xoyan leser ewîndarî kujrabêt, keçî bexoyan wtî wtî leser kçe drawsê û xizmanî xoyan deken. Kem nîn ew jnaney ke lelayen xesûyanewe sûkayetî û stemyan lêkrawe, keçî bexoyan heman kar û reftar beramber bûkekanyan dekenewe, bem core debîn stem le jnan dyardeyekî allozî frerrehendî komellgekemane, nek tenya dahênrawî yasayekî nûsrawe ya zordarî pyawanêk. Katêk ew boçûne lawazane dexwênmewe, ke stem le jnan bo ayînî îslam betenya degêrnewe. Berrastî ew jin û pyawane cêgey bezeyîn, ke xwêndnewey awa serpêy bo dyarde komellayetîyekan deken. Stem le jnan rehendî mêjûy heye û ew rehende zor le îslam û aynekanî dîkeyş kontre. Bem core nebînî em drawe ketwarîyane, nebînînî zemîne kultûrîy û abûrîy û ramyarîyekanî stem lelayen rêkixrawe qûçkeyye ramyarîye paşkokanî dsellat û partekanewe, xallêkî dîkey cyawazî çonyetî têrrwanîn û derkkirdnî stem û hellawardinî jnane, lelayen fêmînîste desellatixwazekanewe û lelayen fêmînîste dje-serwerekanewe [enarkofêmînîstekan]. Enarko fêmînîstekan be qullî le hemû pêkhate û dezgeyekî komellge û berrêweberayetîyekeyda le dûy reg û rîşe abûrîy û kultûrîy û ramyarîyekanî stem û hellawardin, degerrên û radîkallane hemû amraz û mîkanîzm û pêkhatyek, ke aferêner û parêzerî stem û hellawardin bêt, retdekenewe û le xebatî rojaney cemawerîy û komellayetîyda hengaw be hengaw bo srrînewey le hoş û le kirdewe û le axawtinî takekan û le nêwende komellayetîyekanda, bebê wçan têdekoşn.
Min nallêm bawerrekanî îslam destîyan lew stem û tawananeda nîye, na û nexêr, hergîz betemanîm ştêkî awa bllîm. Bellam guncan û tebayî û rêkkewtêk lenêwan bawerrekanî îslam lemerr roll û rêwşiwênî jin û pêkhate û têrrwanînî xîllekîyaney komellgey kurdistanda heye. Egîna be kutuprrîy û le çawtrukanêkda tîrorî jnan û etkkirdinyan neydetwanî bew rehende rîşeyî û trisnakewe le dehey yekemî hezarey sîyemda amadebêt. Kesanêk ke bextî huşyarbûnewey radîkallî azadîxwazaneyan hebuwe ya rûdawekanî rojgar bew huşyarîyey geyandûn, ewe dezanin ke bawerrekanî îslam paşbnemayekî xêlekîyaney nîwedûrgey ‘erebîyan heye û komellgey kurdistanîş bnemayekî xêllekîyaney heye û yekangîrbûnî em duwaneye, ke zemîney berdbarankirdin û lutbrrîn û sutandin lebardeken û pêkdehênin. Bo têgeyîştin û derkirdnî em pêgeyîştne, xwênerî azîz detwanêt sernicî cyawazî hejmarî kuştinî jnan û barî yasaxî ewîndarîy bden; lew nawçaney ke be qonaxî xîllekîbûnda tîperrîwun û takayetî hêşta tyayanda bercestenebuwe û rêsaxêllekîyekan tyayanda serwern, letek bew nawçaney ke zû nîştecêbûn û şîraze û bnemay xêllekîy peywendîyekanî nêwan takekanî pêknahênêt û pêkewey nebestûn, berawirdibken. Meger îslam her ew îslame nîye, ke le herdûlayanda amadeye, boçî le şwênêk zortir jin dekujêt û le şwênêk ya hîç ya kemtir dekujêt. Herweha eger sernicî ayînekanî dîkey komellgeman bdeyn û gutrawekanyan bixwêninyewe, eger zortir le îslam jin bekem negrin, ewa sûkayetîykirdinyan be mêyne kemtir nîye. Leberewe ayînî îslam tenya wek amrazêkî guncaw lelayen komellgey xêllekîy kurdistan û kultûrî dje-jnîyewe kellkî lêwergîrawe, nek ewey ke le xudî komellgekeda têrrwanînî hellawêrrane û stemgerane û bkujane djî jnan nebûbêt û ayînî îslam letek xoy hênabêtî, wek çep û nasîwnalîstekan pagendey deken.
Herweha eger sernicî birryardanî perlemanî herêmî kurdistan leser yasay çend-jne bdeyn, debînîn hîç bzûtneweyekî komellayetî [bzûtnewey komellayetîy nek beyanname û sermayeguzarîy ramyarîy partekan] kardanewey nîşanneda û nebuwe hoy narrezayetî û mangirtin û destlekarkîşanewe. Eger be prupagendey bêbnemay jnanî serewey rêkixrawe babsalar û partsalarekanî benaw jnan û çepekan buwaye, debû jnan le hemû nawçekanî kurdistanewe, le hemû şar û gundekanewe be xopîşandan û mangirtin û rêpêwanî çend roje berew parleman û dezge ballakanî mîrî brron û dagîryanbken û daruperdûyan be yasa çendijnekeyanewe bsûtênin, her awa ke deheyek lemewber le wllatêkî eferîkayîda jnanî yaxî nêwendekanî desellatyan dagîrkirdin. [ Baş lebîrm nemawe le seretay hezarey sêyemda le çi wllatêkî efrîkî bû, ke jnan rabûn û zor şwênî giştî û dewlletîyan dagîrkird û beçek û be hêzî yekgirtûy xoyan daxwazîyekanyan sepandin]. Bellam le kurdistan hîç yek lemane rûyanneda û tenanet wek bllêy ke hîç ştêkî peywest be jnanewe le komellgeda rûynedabêt. Eme nîşaney bêbirwayî xudî jnane be hêzî xoyan, eme nêşaney wirduxaşbûnî kesayetî û destemobûnî hezaran salley jnane bo rêsay hêze kultûrîyekan û yasa ramyarîyekan. Eme nîşaney amadenebûnî xohuşyarî û wîstî azadrrewaney jnanî komellgekemane, eme berhemî piştbestinî jnane be rêkixrawe benaw jnîyekan û parte ramyarîyekan û bzave rîformîstekan. Eme nîşaney rambûn û destemobûnî jnanî rizgarîxwaz û yeksanîxwaze bo jnanî destebjêr û pêkhate serû jnîyekan.
Beboçûnî min, eger her yeke le ême, çend mangêk leser ew rûdawe buwestêt û bnûsêt û lêkîbdatewe û twêjînewey leser bkat, hêşta be encamî kotayî û hemelayene nageyn. Le komellgeyekda ke parte ramyarîyekan bo xoqebekirdin û sermayeguzarîy ramyarîy pagendey skîwlarîstibûnî kurdistanekeyan bken û rojane em destewaje pirr sûkayetî û pûçane “êre efxanistan nîye, êre efrîqa nîye, êre byaban nîye, êre wllatanî ‘erebî nîye” hezarbare bkenewe û rêkixrawe jnîyekan ke birryarî smêllizlekanî nêwendî partekanyan be jnan degeyêyn û tenanet hendêkyan dellallî bo hawpartîyekanyan deken û “8î mars” rojî narrezayetî û hawpiştî cîhanî djî hellawardinî jnan krabête boney ahengêrran û meynoşî ramyaran, îdî şayanî sersûrrman û gumankirdin nîye, ke boçî jnan awa bêdengin û tenanet jnan le kargeyek, fêrgeyek, gerrekêk, şarêk, zankoyek, bo çend çirkeyek yasay çend-jne nebuwe meşxelle û griftyan û bo berpêgirtnî û retkirdnewey wexonenekewtin !
Gorranî komellge le barêkî awa, gorranî rîşeyî dexwazêt, ke tenya le xwarewerra twana û bextî rûdanî heye, rêk bepêçewaney xewnî fêmînîste borcwazîyekanewe, ke xerîkî namegorrînewen letek desellatdaran û kirdnewey nûsînge û nêwendî benaw jnan lenêw desellat û be pare û komekî ew pyawaney, ke xoyan çend jinyan le mallewe wek koyle ragirtuwe û xoyan destekanî tîrorî jinyanyan pêkhînawe û xoyan yasakan derdeken û wajoyandeken. Aya eme bellge nîye bo hawbeşbûnî fîmînîzmî borcwazî, ke beşdarî le çewsanewey jnanda dekat û be yasakan û desellat û dîmokratîyetekeyan xoşbawerrîyan dekat û lenêwendyanda rêwşiwênî pleberzî û desellatdarî xoyan beser jnanda dekenewe û ewey lenêw partekan û dunyay sermayeguzarîda bedestîyan nehênawe, behoy destemokirdnî jnanewe, pêkeweydenên.
Be kurtî, emane beşêkî berçawî cyawazîyekanin le têrrwanînda, ke bêguman le karkirdin û têkoşanî rojaneda, le nêwendekanî xebatî komellayetîyda, ke jnanî azadîxwaz le hemû hengawêkda xoyan le beramber jnanî ramyar û desellatixwazda debînnewe, cyawazîye kirdeyyekan aşkratir û roşintir berçawdeken, bedillnyayîşewe, komellêk cyawazîy dîkeş dêne pêşewe, ke ême hergîz le wellamêkî ezmûngîraney snûr dyarîkrawda twanay derkkirdyanman nîye û tenya xebatî rojgarî dahatû detwanêt wellamyan pêbdatewe û bercesteyanbkat.