دونیا تەنیا داعشیەکانی تێدانییە، بەڵکو سەدان ملیۆن مرۆڤی وەك ئەم خاتوونەشی تێدایە
“ببزوێ، تاوەکو شتێك لەتەك تۆدا بکەویتە بزووان”
ئەوە ئێمەی خۆشباوەڕ و جەنگخواز و مەرگدۆست و سەرکوتخواز و نادەربەست و خۆپەرستین، کە سەروەران خاترجەمدەکەین، بەرەی جەنگەکان گەرمدەکەین، یەکدی دەکوژین و سەرکوتدەکەین و لە نادروستییەکان چاوپۆشیدەکەین و خەمی هاوجۆرەکانمان ناخۆین !
لەنێوبردنی دیکتاتۆرەکان، سەروەریی چینایەتی و مشەخۆریی سەرمایەداران، بە لەنێوبردنی کۆیلەکانی ناخمانەوە بەندە، کەی چیدی ئامادەنەبووین، کۆیلە و بێدەنگبین، کەی چیدی ملمان بە کاری زۆرەملێ و کرێگرتە نەدا، کەی بازاری بەکاربەریی نادەربەستانەمان چۆڵکرد، کەی لوولەی چەکەکانمان بەنێو زەمیندا ڕۆکرد، کەی کارتی دەنگدانمان فڕێدایە تەنەکەی زبلەوە، کەی ڕیزی پارتەکان و میلیشیاکانمان چۆڵکردن، کەی پارووەنانمان لەتەك هاوسێ و هاوکار و هاوپۆلانمان بەشکرد، کەی شوناسنامە دەستکردەکانی نەتەوە و ئایین و ڕەگەز و کولتووریی و نەژدا و ئایینییەکانمان فڕیدان، ئەو کاتەیە، کە لە ناخی تاکایەتی ئێمە و دڵی گەورەی کۆمەڵدا شۆڕشی دژە چێنایەتی بەرپابووە؛ شۆڕش لە ئاوەز و لە شێوازی ژیان و کارکردن و بەرهەمهێنان و پەیوەندی و خۆشەویستی و سێکس و بیرکردنەوە و بڕیاردان، ئیدی وێناکردنی کۆمەڵگەی ناچینایەتی ئاسانترین و بەڵگەنەویسترین شتێکە کە هەموو کەس بڕوای پێدەکات !