پرسیارێك لە تەماشاچییانی شانۆی سێدارە :
ئەگەر کوردەکان هەموو شۆڕشگێڕ و دژە داگیرکەر و دژە کۆماری ئیسلامی ئێران و دژە زیندان و کوشتن و سێدارەن، ئەدی ئەو هەمووە تەماشاکەرە نادەربەستانە کێن، کە لە کەرنەڤاڵەکانی مەرگ’دا کۆدەبنەوە و چەند سات [سەعات]ێك لە چاوەڕوانی لەسێدارەدانی هاوسێ و هاوەڵ و هاوکار و خزم و هاوشاریی و هاوگوندییەکانیاندا ڕادەوەستن ؟
ئەگەر ئەوەی خواکان لە ئێران بەرامبەر ئازادیخوازانی ئەو وڵاتە [چ لە کورد و چ لە بلوج و عەرەب و ئازەر و فارس] ئەنجامیدەدەن، خوازراو و پەسەند و بەشێک لە کولتوور و بیرکردنەوە و حەزی خەڵکەکە نییە، ئەدی کو ئەو هەمووە خەڵکە، لە کاتێکدا هەرگیز ئامادەنین بۆ کۆمەك و هەرەوەزیی و کاری کۆمەڵایەتی و هاوپشتی چینایەتی و کاری چاك ئاوا خۆبەخشانە کۆببنەوە، ئاوا بە ئاسوودەییەوە وەك ئەوەی نۆرەیان بۆ بینینی فیلم یا تەماشای سێرك و شانۆی کۆمیدی گرتووە، کۆدەبنەوە ؟
ئەگەر هەموو خەڵکی ئێران دژی لەسێدارەدانن، ئەدی بۆ بایکۆتی تەماشای ئەو دڕندایەتییە ناکەن ؟ بۆچی پەلاماری جەلادان و لەسێدارەدەران نادەن ؟
من لە وەڵامدا، تەنیا دەتوانم ئەوە بڵێم، کە دڕندەیی بەشێکە لە کولتووری خەڵکی خۆرهەڵات، دڕندەیی کۆڵەکە و بنەمای ئایینیی خۆرهەڵاتییەکانە، دڕندەیی دایك لەتەك یەکەم قومە شیر و باوك لەتەك یەکەمین ماچکردنماندا دەیکەنە بەشێك لە گوفتار و ڕەفتار و بیرکردنەوەمان !
دەی کێ دڕندە نییە، با دەنگهەڵبڕێت، کێ دڕندە نییە با بایکۆتی ئەو تەماشاخانەیەی لەسێدارەدان بکات، کێ نایەوێت دڕندە و بەشداری دڕندایەتی بێت، با پەلاماری لەسێدارەدەران بدات، با خۆپیشاندان و ڕاپەڕین بکات، با پەلاماری زیندانەکان بدات، ئەگەرنا هەموومان دڕندەین، هەمووان بە لەسێدارەدانی زیندانیان ڕەزامەندین، ئەگەر نا …